Nahum 2 - Khoekhoegowab 2020

Nineves di ǁnās

¹ ǁNāǂamaob ge sas ǃoagu ra hā. Sa ǁkhui-omma ǃûiǃgâ, daob âsa ǃkhē; kamanab âsa ǃgae, î hoaragase ǀgaiǀgaisen.

² ǃKhūb ge Jakob ǂkhaisiba ǁkhawa ra ǀasaǀasa; Israeli di ǂkhaisiba ǂguros ǁkhās khami, hîkākā-aon ge ǁîna hîkākā tsî ǁîn di draibehaide ǂkhôa xui-ao.

³ ǁÎb khākhoegu di ǁkhaukhōgu ge a ǀapa, ǁîb di toroǃkhamaogu ge ǀapa saraga ana hâ. ǁÎgu ǃkhammi ǃoa ra ǂhomisen tsēs ai di ge ǁîn torokunide ǀaes khami ra ǂkhai, ǁîgu ge ǁhâigôagu âga ra sabu.

⁴ Torokunidi ge ǃgangu ǃnâ ra ǃnarihe, ǁîdi ge ǃās ǁaegub ǃnâ ra ǃnarimahe. ǁÎdi ge ǃamǀaedi khami ra ǃnâ, ǁîdi ge napagu khami ra ǂkhai.

⁵ ǁÎb ge ǂamkhoegu âba ra ǂgaiǀhao; ǁîgu ge ǃkhoeǂnôa gu ra hîa ra ǁnā. ǁÎgu ge ǃās di ǂnubiǂgoab ǃoa ra ǃnoe tsî ǁkhau-ūdasa ǁnāpa ra mâi.

⁶ ǃĀgu di ǁkhaegu ge ra ǁkhowa-amhe, gao-ommi ge ra ǃkhom.

⁷ Gao-aos ge ǃkhōsabese ra ūhe, ǁîs ge ra ǂgaeǂguibēhe. ǁÎs ǃgādi ge ǂnabun khami ǃgae tsî ǃoab xa ra ǂnaunǁkhai.

⁸ ǁGam-i âs ra dâuǂoatoa ǀaus, khamin ge Nineves khoena ra ǃkhoeǂoa. “Mâ, mâ” tin ra ǃauǂgai, xawe i ge khoe-i xare-e dabasen tama hâ.

⁹ ǀHaiǀuriba ǃnari. ǃHuniǀuriba ǃnari. ǃĀs ge toa ǁoa ǃkhūsib xa ǀoa hâ.

¹⁰ ǃĀs ge ǃnariǂuiǃnâhe, ǀkhaiǃnâ tsî a hîkākāsa. ǁAnǂgāsaben âs ge ǂkhabuǂâi hâ, ǁgoadi ge ra ǀkhū, ǃnāb ân ge ra tsû; aidi hoadi ge ǀhai hâ.

¹¹ Mâpas nēsi hâ xamn di hâǃkhaisa, ǂkham xamn ge ǁîs ǃnâ gere ǂûmāhesa; xamn ge ǁîs ǃnâ ǁîn ôan ǀkha gere hâsa, xū-i xare-i xa ǃao tamase?

¹² Xammi ge xamron âba ǂâu hâse gere ǀkhauǃāba tsî xamdi âba amǀnēna ra ǃgamba. ǁÎb ge hâǃkhaigu âba ǀkhauǃāb hâ ǁgan-i, ǃgammi hâ xūn di-i ǀkha gere ǀoaǀoa.

¹³ “Mû, tita ge sas ǃoagu hâ” tib ge ǃKhūb Hoaǀgaixaba ra mî: “Tita ge sa torokunide nî khauǃkhū, gôab ge sa ǂkham xamga nî ǃgamtoa. Tita ge sas ge ǀhaoǀhao xūn hoana ǃhūbaiba xu nî ūbē; sa sîsabegu ge ǃaruǀî ǁnâuhe tide.”