Mixa 1 - Khoekhoegowab 2020

¹ ǃKhūb di ǂhôas ge Mixab, Moresetǁîb ǃoa Jotammi, Axasi tsî Hiskiab tsîgu ge Judab gao-ao i ǁaeb ǃnâ ge hā. Nē mîs ge Samarias tsî Jerusalems tsîra ǂama gere ǃgû.

Mixab ge Samarias tsî Jerusalems tsîra ǂama ra ā

² ǁNâu re sa ǃhaoso hoaso! ǃGaoǃgâ re ǃhūbaib ai hâdu hoado. ǃKhūb Elob ge sadu ǃoagu ra ǃkhō-am, ǃKhūb ge ǁîb di ǃanu Tempela xu ra ǃkhō-am.

³ ǃKhūb ge ǁanǃkhais âba xu ra ǂoaxa, ǁîb ge ǁgôaxa tsî ǃhūbaib ǃhomgu ai ra ǃgû.

⁴ O gu ge ǃhomga ǁîb ǃnaka nî tsuni, ǂnuruǁnui-i ǀaes ǃnâ ra tsuni khami. ǁÎgu ge ǁgamgu ǃgoaǃnāb ǃnâ ra dâuǁgôa khami ǃnâuga xu nî dâuǁgôa.

⁵ Nēn hoan ge nî ī Jakob di ǃûǂams ǃaroma tsî Israelǁaes di ǁoreb ǃaroma. Tari-e Jakob di ǃûǂamsa ge ǃaroma? Samaria tamasa? Tari-e Judab di ǁgôa-eloǃoabasa ge ǃaroma? Jerusalem tamasa?

⁶ “ǁNā-amaga ta ge Samariasa ǀuiǁkhopose nî dī ǃaub ai, draibeǃhanagu nî ǂgāhe ǃkhaise. Tita ge ǁîs ǂnubiǂgoagu di ǀuide ǃgoaǃnāgu ǃnâ nî tsoroǁnâ tsî ǃgaoǃgaogu âsa nî ǀkhaiǀkhā kai.

⁷ ǁÎs di ǁgôa-elo-īgu hoagu ge nî khôaǂkhūhe tsî ǁîs ǀai-aon di hōǂgādi ge nî khauǃkhūhe. Tita ge ǁîs di īgu hoaga nî hîkākā, ǁîgas ge ǀai-aon di hōǂgās ǀkha ǀhaoǀhaobasen amaga, ǁîgu ge ǁkhawa nî ǀai-aon di amǃnâ kai.”

⁸ ǁNās ǃaroma ta ge ǃgae tsî nî ā; tita ge ǀōǂaise tsî ǀōǀkhāse nî ǃgûma. ǀGirin khami ā tsî ta ge ǀamin khami nî ǃgae.

⁹ Samarias di ǀhapis ge a ǂgau ǁoa, ǁîs ge Judab kōse ge sī. ǁÎs ge ti ǁaes di dao-ams kōse go sī, Jerusalems ǂûs kōse.

Khākhoen toroǂnubis ge Jerusalemsa ra ǀgū

¹⁰ Tā ǁîsa Gats ǃnâ sī ǂhôa, tā hoaragase ǁîs ǂama ā. Bet-Leafras ǃnâ tsarab ǃnâ ǃhobosen.

¹¹ Sadu Safirs di ǁanǂgāsabedo, ǀōǀkhāse tsî taosib ǃnâ ǃgûǃkharu re. Saanans ǃnâ ǁan hân ge ǂoaxa ǁkhā tide. Bet-Esels ge ra ǃgae, ǁîs ge a hui du ǁoa.

¹² Marots di ǁanǂgāsaben ge ǃaob ǃnâ hâse ǃgâina ra ǃâubasen, ǂōǂōsib ge ǃKhūba xu Jerusalems kōse hā xui-ao.

¹³ Sadu Lakis di ǁanǂgāsabedo, hāga torokunidi ǃnâ ǂgāǃao. Sas ǃnâb ge Sions di ǁoreba ge tsoatsoa, Israeli di ǃûǂamdi ge sas ǃnâ ge hōhe.

¹⁴ Moreset-Gatsa ǃgûǀgoras ǀkhaexūna mā. Israeli di gao-aogu ge Aksibsa xu hui-i xare-e hō tide.

¹⁵ Maresas dido danaob ge nî ǁnāǂam du, Israeli di ǂgaeǂgui-aogu ge Adulams ǁga nî ǃhū.

¹⁶ Sa ǀûna ǃoab ǃnâ ǂkhomǁnâ re, sa ǀnam ǀgôan ǃaroma; sa danasa ǃgorase ǂkhom re kai-anis di danas khami, ǁîn sasa xu ǃkhōsabese ra ǃgû-ūhe xuige.