Mateub 1 - Khoekhoegowab 2020

Jesub Xristub* di surib

¹ Nēb ge surib ǂgaekhâib, Jesub Xristub ôananôagub, gao-aob Davidi tsî Abrahamma xu ǃnae hâb diba.

² Abrahammi ôab Isaki tsî Isaki ôab Jakob tsî Jakob ôab Judab tsî ǁîb ǃgâsagu.

³ Judab ôakha ge Peresi tsî Serab tsîkha. ǁÎkha îs ge Tamarsa tsî Peresi ôab ge Hesronna. Hesronni ôab ge Ramma.

⁴ Rammi ôab ge Aminadaba. Aminadab ôab ge Nasonna. Tsî Nasonni di ôab ge Salmonna.

⁵ Salmonni ôab ge Boasa. ǁÎb îs ge Raxabsa. Boasi ôab ge Obeda. ǁÎb îs ge Rutsa tsî Obedi di ôab ge Isaiba.

⁶ Isaib di ôab ge gao-aob Davida. Davidi ôab ge Salomoba. ǁÎb îs ge Batsebas, ǃoataras Uriab disa.

⁷ Salomob ôab ge Rehabeamma tsî Rehabeammi ôab ge Abiaba. Abiab ôab ge Asafa.

⁸ Asafi ôab ge Josafata tsî Josafati ôab ge Joramma tsî Jorammi ge ge Usiab di î i.

⁹ Usiab ôab ge Jotamma tsî Jotammi ôab ge Axasa. Axasi ôab ge Hiskiaba.

¹⁰ Hiskiab di ôab ge Manaseba, Manaseb ôab ge Amoba tsî Amob di ôab ge a Josia.

¹¹ Josiab ôab Jexoniab tsî ǁîb ǃgâsagu, Babilons ǃnâ ge hâ i ǃkhōsis ǁaeb ǃnâ ge ǃnaegu,

¹² Babilons ǃoa ǁgariǃgû-ūhes khaoǃgâ: Jexoniab ôab ge Sealtiela tsî Sealtieli ôab ge Serubabela.

¹³ Serubabeli ôab ge Abiuda. Abiudi ôab ge Eliakimma tsî Eliakimmi ôab ge Asora.

¹⁴ Asori ôab ge Sadoka tsî Sadoki ôab ge Aximma, Aximmi ôab ge Eliuda

¹⁵ Eliudi di ôab ge Eleasara tsî Eleasari ôab ge Matanna, Matanni ôab ge Jakoba,

¹⁶ Jakob di ôab ge Josefi, Marias ao ge iba. Tsî Marias ge Jesub, Xristub tis tsîna ǀon hâb, di îsa.

¹⁷ Nē ǂgaekhâib ge disihakaǀa ôananôaguga Abrahamma xu gao-aob Davidi kōse, disihakaǀaga Davidi ǁaeba xu Babilons di ǁgariǃgû-ūhes kōse tsî disihakaǀa ôananôaguga Babilons ǁgariǃgû-ūhesa xu Xristub di ǃnaes kōse ǃkhōǂgā hâ.

Jesub Xristub di ǃnaes

¹⁸ Nēs ge Jesub Xristub ge ǃnae ǀgausa: ǁÎb îs, Marias ge Josefi xa ǃgameba ge mîmâibahe hâ i. Xawe noxopas ao-e ǂan tama hîas ge ǃAnu Gagaba xu ǀgamǀkhāse ge hōhe.

¹⁹ Josefi, ǁîsa ǃgameba ge mîmâiba hâ ib ge ge ǂhanu-ai i tsîb ge ǂganǃgâsase gere ǁnāxū si ǂgao, ǁîsab ge ǂhaisase taotao ǂgao tama hâ i amaga.

²⁰ Nēsab ra ǂâiǃgâ hîab ge ge ǁom tsîb ge ǀhomǃgāb ǃKhūb diba ǁîba ǁhapos ǃnâ ǂhai tsî ge mî: “Josef, Davidi ôatse, tā ǃao Marias ǀkha ǃgamesa, ǁîs a ǀgamǀkhā ǀgôaro-i ǃAnu Gagaba xu hâ xuige.

²¹ ǁÎs ge ǀgôaba nî ǁora tsîts ge ǁîba Jesub ti nî ǀonǂgai, ǁîb nî ǁaes âba ǁorena xu ore amaga.”

²² Tsî nēn hoan ge ǀnai kēbo-aob ge ǃKhūb xa mîn nî dīǀoaǀoahese ge ī:

²³ “Mû! Oaxaes ge ǀgamǀkhā tsî ǀgôaroba nî ǁora, tsîs ge ǁîba Immanuel ti nî ǀonǂgai.” ǁNās ge ǂnûiǃkhunihes kao “Elob sada ǀkha hâ” ti ra ǂâibasen.

²⁴ Tsî Josefi ge ǂomsa xu ǂkhai, ob ge ǀhomǃgāb ǃKhūb dib ge mîba bi khami ge dī. Tsîb ge Mariasa taras ase ge ūbasen,

²⁵ xawes ge oaxaese ge hâhâ ǁîs ôab nî ǃnaes kōse. Tsî Josefi ge ǁîba Jesub ti ge ǀonǂgai.