Levitikus 3 - Khoekhoegowab 2020

ǀHûhâsib ǂkhîbagus ǁguibadi

¹ Khoe-i ga ǁî-i di goma-e ǂkhîbagus ǁguibas ase ǁguibao, o-i ge ūo ǁgōb tamas ka io gomasa nî ǁguiba.

² ǁNā khoeb hîa nî ǁguibaǀgoa-e ǀkhī-ūb ge ǁîb di ǃomma ǁî-i di danas ai ǁgui tsî ǁî-e ǃKhūb di Tentommi ǂgâ-ams tawa nî ǃgaoxadom. Tsî pristergu, Aronni ôagu ge ǀaoba altars di haka ǃnamgu ai nî ǀgapi.

³ ǁGuiba-aob ge sao ra ǃân ǀgoa-i dina ǂûǁguibas ase ǃKhūba nî ǁguiba: Hoaraga ǀhaukaub, ǃnāxūna ra ǃgū-aib,

⁴ ǃnaira, ǁîra ai hâ kaub ǀkha tsî ǂoaǂamsa ǃâ-i âis di-i tsîna.

⁵ Tsî pristergu ge ǁîn hoana altars ai nî ǂhubi, khauǁguibas, ǀaeǁguibas, ǃgâi ǁamaba ūhâs, ǃKhūba ǃgâibas ase.

⁶ Khoe-i ga aore tamas ka io tareǀgoa-e ǂkhîbagus ǁguibas ase ǁguibao, o-i ge nî ūo.

⁷ Khoeb ga gū-e ǁguibao,

⁸ ob ge ǁîb di ǃomma ǁî-i di danas ai ǁgui tsî ǁî-e ǃKhūb di Tentommi ǂgâ-ams aiǃâ nî ǃgaoxadom. Tsî pristergu, Aronni ôagu ge ǁî-i ǀaoba altars di haka ǃnamgu ai nî ǀgapi.

⁹ ǁGuiba-aob ge sao ra ǃân gū-i dina ǂûǁguibas ase ǃKhūba nî ǁguiba: Kaub, hoaraga ǂarekaub, ǂareǂkhōsa xu ra ǃgaoǁnâheb, hoaraga ǀhaukaub ǃnāxūna ra ǃgū-aib,

¹⁰ ǃnaira, ǁîra ai hâ kaub ǀkha tsî ǂoaǂamsa ǃâ-i âis di-i tsîna.

¹¹ Tsî pristergu ge ǁîn hoana altars ai, khauǁguibas, ǀaeǁguibas, ǃgâi ǁamaba ūhâs, ǃKhūba ǃgâibas ase nî ǂhubi.

¹² Khoeb ga piri-e ǁguibao,

¹³ ob ge ǁîb di ǃomma ǁî-i di danas ai ǁgui tsî ǁî-e ǃKhūb di Tentommi ǂgâ-ams aiǃâ nî ǃgaoxadom. Tsî pristergu, Aronni ôagu ge ǁî-i ǀaoba altars di haka ǃnamgu ai nî ǀgapi.

¹⁴ ǁGuiba-aob ge sao ra ǃân piri-i dina ǂûǁguibas ase ǃKhūba nî ǁguiba: Hoaraga ǀhaukaub ǃnāxūna ra ǃgū-aib,

¹⁵ ǃnaira, ǁîra ai hâ kaub ǀkha tsî ǂoaǂamsa ǃâ-i âis di-i tsîna.

¹⁶ Tsî pristergu ge ǁîn hoana altars ai nî ǂhubi, khauǁguibas, ǀaeǁguibas, ǃgâi ǁamaba ūhâs, ǃKhūba ǃgâibas ase. Hoaraga kaub ge a ǃKhūb di.

¹⁷ Israelǁî-i xare-i ge kau-e ǂûs tamas ka io ǀao-e ās xaresa ge mā-amhe tama hâ i; mâpa ǀguin ga hâ xawen ge Israelǁîna nē ǁgaraba ǃûǂam tide.