Levitikus 17 - Khoekhoegowab 2020

ǀAob ǃnâusib

¹ ǃKhūb ge Moseba ge mîmā,

² îb sao ra ǁgaraga Aronni tsî ǁîb ôagu tsî hoaraga Israelǁaes tsîna mā:

^3-4 Israelǁî-i hîa ga ǃKhūb di ǃgôasib ǃoa goma-i tamas ka io gū-i tamas ka io piri-e hâǃkhaib ǃnâ tamas ka io hâǃkhaib ǃauga ǃgam tsî ǃKhūb di Tentommi ǂgâ-ams tawa ǀkhī-ū tama i-i hoa-i ge ǂhanuba ra ǃûǂam. ǁÎ-i ge ǀaoba i go ǂnâxū xui-ao ǃaruǀî Elob ǁaes di ǀgui-i ase ǃgôahe tide.

⁵ Nē mîmās ge ra ǂâibasen Israelǁîn ǀgoan hîan ǁnaetisase ǀnî ǃkhain ai gere ǃgamna nēsi ǃKhūb ǃoa nî ǀkhī-ūsa. ǁÎn ge ǁîna ǃKhūb di Tentommi ǂgâ-ams tawa pristera nî ǀkhī-ūba tsî ǂkhîbagus ǁguibas ase nî ǃgam.

⁶ Tsî pristeri ge ǀaoba ǃKhūb di Tentommi ǂgâ-ams tawa mâ altars ai ǁhō tsî kauba nî ǂhubi, ǃgâi ǁamaba ūhâs ǃKhūba ǃgâibas ase.

⁷ Israelǁîn ge ǃaruǀî ǁîn di ǀgoana ǀnî ǃkhain ai ǁgâuapiriga ǁguibas ǃaroma ǃgams ǀkha, ǂgomoǃnâsiba ǁîn di ǃKhūb ǃoa ǁgau tide. ǁÎn ge nē ǁgaraga hoaǁae nî ǁnâuǀnamhâhâ.

⁸ Israelǁî-i tamas ka io ǁîn ǁaegu ǁan hâ ǃhaokhoe-i hoa-i hîa ga khauǁguiba-i tamas ka io ǀnî ǃnôa ǁguiba-e,

⁹ ǁguiba-i ase ǃKhūb di ǃgôasib ǃoa hâǃkhaib ǃnâ tamas ka io hâǃkhaib ǃauga ǁguiba tsî ǃKhūb di Tentommi ǂgâ-ams tawa ǀkhī-ū tama i-i, hoa-i ge ǃaruǀî Elob ǁaes di ǀgui-i ase ǃgôahe tide.

¹⁰ Israelǁî-i tamas ka io ǁîn ǁaegu ǁan hâ ǃhaokhoe-i hîa ǀaoxaǃnâ ǁgan-e ga ǂû-i hoa-eb ge ǃKhūba ǂhara tsî ǃaruǀî ǁî-e ǁîb ǁaes di ǀgui-i ase ǃgôa tide.

¹¹ Mâ ûitsama xū-i hoa-i di ûib ge ǀaob ǃnâ hâ, ǁnā-amagab ge ǃKhūba ge mîmā, îb hoaraga ǀaoba altars ai, khoen di ǂkhîbagus ǃaroma ǁhōǂuihe. Ûitsama ǀaob ra ǂkhîbagusa dī xui-ao.

¹² ǁNā-amagab ge ǃKhūba Israelǁîn tamas ka io ǁîn ǁaegu ǁan hâ ǃhaokhoen tsîn hoana ge mîmā ǀaoxaǃnâ ǁgan-en ǂû tidesa.

¹³ Israelǁî-i tamas ka io ǁîn ǁaegu ǁan hâ ǃhaokhoe-i ga xamari-i tamas ka io ani-i hîa a ǃanu-e ǃau tsî ǃgam, o-i ge ǁî-i ǀaoba ǃhūb ai ǃgûǂui kai tsî ǀaoba ǃhūb ǀkha nî tsoro-ai.

¹⁴ Mâ ûitsama xū-i hoa-i di ûib ge ǀaob ǃnâ hâ, ǁnā-amagab ge ǃKhūba Israelǁîna ǀaoxaǃnâ ǁgan-i xare-en ǂû tide ǃkhaisa ge mîmā tsî ǁnāsa ga ǁnâuǀnam tama i khoe-i hoa-i ge ǃaruǀî ǁîb ǁaes di ǀgui-i ase ǃgôahe tide.

¹⁵ Israelǁî-i tamas ka io ǃhaokhoe-i hîa ǁō hâ xamari-i tamas ka io ǁaixa ǀguru-i xa ǃgamhe hâ xamari-i di ǁgan-e ga ǂû-i hoa-i ge ǁî-i sarana ǁā tsî nî ǁāsen, tsî ǁnās khaoǃgâ hoaraga tsēsa nî ǃanuoǃnâ.

¹⁶ Xawe i ga ǁî-e ǁnāsa dī tama i, o-i ge nî ǁkharahe.