ǂKhoamîdi 4 - Khoekhoegowab 2020

Gā-aisib di ǃgâib

¹ Ti ôado, sadu î-i di ǁgauǃnâsa ǃgâ, î ǁnâuǃāba du nî hōse ǃgaoǃgâ.

² Tita ge ǃgâi ǁkhāǁkhāsa ra mā du, xuige tā ti ǁkhāǁkhāsa ǁnāxū.

³ ǀGôase ta ge ti îb ǀkha ge hâ i tsî ti îs di ǀguise ǃnae hâ ǀnamǀnamsa ǀgôata ase,

⁴ ob ge ti îba ǁgauǃnâ te tsî ge mî: “Sa ǂgaob hoab ǀkha ti mîde ǃkhōǀgaipe; ti mîmāde ǃkhōǀgara, ots ge nî ûi.

⁵ Gā-aisiba ôa, ǁnâuǃāba ôa! Tā ti mîde ǀuru tsî ǁîde xu ǁnāǁgôa.

⁶ Tā gā-aisiba ǂhara, ǁîb nî sâu tsi xuige; ǁîba ǀnam, ǁîb nî ǃûi tsi xuige.

⁷ Gā-aisib ge a ǂguro, ǁnā-amaga ǁîba hōbasen. Tare-i ǀgui-ets ga ôa xawe, ǁnâuǃāba hōbasen.

⁸ Gā-aisiba ǀgapiǃgôa, ob ge ǁîba nî ǀgapiǀgapi tsi; ǁîbats ga ǁnamǂgā, ob ge ǁîba ǃgôasiba nî mā tsi.

⁹ ǁÎb ge sa danasa krons ǀkha nî ǀgapa; ǁîb ge îsase anisa ǀgapas ǀkha nî ǀgapa-ai tsi.”

¹⁰ Ti ôatse ǃgâ, îts tita ra mîna ūǃoa, ǂgui ûikurigats nî ūhâse.

¹¹ Tita ge gā-aisib di daob ǃnâ ge ǁgauǃnâ tsi tsî ǂhanu daob ai ge ǂgaeǂgui tsi.

¹² ǃGûts ka, xawe i ge sa daob ǃnâ satsa nî ǁkhae xū-e hâ tide tsî ǃkhoets ka, xawets ge ǃnôa tide.

¹³ Sa ǁgauǃnâsa ǃkhōǀgaipe, î tā ǁnāxū; ǁîsa ǃûiǃgâ, ǁîs a sa ûi xuige.

¹⁴ Tā eloxoresan di daoba sao, î tā ǂkhabadī-aon di ǃganni ǃnâ ǃgû.

¹⁵ ǁÎba xu ǂgō, tā ǁîb ǃnâ ǃgû; ǁîba xu dabasen, î sa daob ǀguiba sao.

¹⁶ ǂKhabadī taman ga i, on ge ǁîna ǁom ǁoa; khoe-en tsûtsû tamas kōsen ge ǂoms xa hāhe tama hâ.

¹⁷ ǂKhabab ge a ǁîn di pere tsî ǂkhabadīb ge a ǁîn di ǂauxûi.

¹⁸ Xawe ǂhanu-ain di daob ge ǁgoas ǃnâb khami ī, ǀoasases nî soresa ǁhais aiǃâ, ǃaruǀî ǀgui ra ǃnâǃāba.

¹⁹ ǂKhabadī-aon daob ge ǃgam ǃkhaenas khami ī, tsîn ge ǁîna tare-i ain ra ǃnôa ǃkhais tsîna ǀū.

²⁰ Ti ôatse, ti mîde ǃgaoǃgâ; ti mîde ǂōrisase ǃgâ.

²¹ Tā di ǁîde sa ǁnâuǃāba xu ǂoa; sa ǂgaob ǃnâ ǁîde sâu.

²² ǁÎdi ge ǁîde ra ǃkhōǃoa khoe-i ǃaroma a ûi tsî ǁîde ra ūǃoa khoe-i hoaraga soros di ǂgauǂgau.

²³ Sa ǂgaob ǃnâ ra ī xūna ǂōrisase ǃûi, ǁîba xu gu ûib di ǁgamǃāga ra dâu xuige.

²⁴ ǀGamnamxasisa xu ū-oasen, î sa amǁgaukha gāxaǃnâ ǃhoana xu ǃûi.

²⁵ A ra sa mûra ǃgāsase aisǀkhāb ǃoa ǃammâisen, î sa mûra ǂhanuse aisǀkhāb ǃoa kō kai.

²⁶ Sa ǃgûdaoba ǂhauǂhau, îs sa dāǃharos hoasa ǁaposa.

²⁷ Tā amǀkhāb tamas ka io ǁareǀkhāb ǁga kāǁgôa; sa ǂaisa ǂkhababa xu ū-oa.