ǂKhoamîdi 27 - Khoekhoegowab 2020

¹ Tā ǁaris xa koasen, ǁaris tarena nî ǀkhī-ū ǃkhaisats ǀū xui-ao.

² An nau khoen tsî ǁkhāti ǃhaokhoen tsîna koa tsi, xawe tās sa ams tamas ka io sa amǁgaukha tsîna koa tsi.

³ ǀUis ge a ǃgom tsî ǃhūb tsîn ge ǃgom, xawe gâre khoe-i ra ôaǃnâ tsi ǀgaub ge îbe a ǃgom.

⁴ ǁAixasib ge ǁgaisi, ǁaib ge ǃnāǂamsa; xawe tari-e tauxasiba mâǃoa ǁkhā?

⁵ Khoe-e ǃoaǃū ǂgōǀaus ge a ǃgâi, ǂganǃgâsase ǁî-e ǀnams xa.

⁶ ǀHōsa-i ra ǃaroma ǀhapis ge ǂgomǂgomsa, khākhoe-i di ǁoas ge a gāxaǃnâsi.

⁷ ǁÂsa khoe-i ge dani-i tsîna ǂgao tama hâ, xawe ǃâ khoe-i ǃaroma-i ge au xū-i tsîna a ǂkhon.

⁸ Aniro-i ǁî-i ani-omsa xu ra bē-i khamib ge ǁîb omsa xu ra bē aoba ī.

⁹ ǀKhera-oli-i tsî ǃgâihamxū-i tsîn ge ra ǃgâiaǂgao kai, xawe ǀoms ge ǂōǂōsib xa ra hîkākāhe.

¹⁰ Tā sa ǀhōsa-i tamas ka io sa îb ǀhōsa-e ǀuru; î tā sa ǃgâsab oms ǃoa ǂōǂōsib âts tsēs ai ǃgû. Sa ǁanǁare-ao-i ge ǃnāsase hui tsi ǁkhā, sa ǃgâsa-i ǃnūse hâ i xa.

¹¹ Ti ôatse gā-ai re, îts ǂkhîkhî ǂgao te, tita ra ǃgôaǁnâ khoe-i ǃaroma ta ǃereamsa nî ūhâ ǁkhāse.

¹² ǁNâuǃāxa khoe-i ge tsūba mû tsî ǁnāpa xu ra ūbēsen; xawe ǁnâuǃāoǃnâ khoe-i ge tsūb ǃnâ ǂgâ tsî nî tsūǃgâ.

¹³ ǃHaokhoe-ets ga surudeb ai xū-e mā, o ǁî-i saraba ū tsî ǁîba ǀnî ǃhaokhoe-i ai sa hō-oas ase ǁamaxū.

¹⁴ Sa ǁanǁare-ao-ets ga ǁgoaga ǃgari dommi ǀkha ǀkhae, os ge nēsa ǀâxareb ase ra ǃgôahe.

¹⁵ ǂKhabaxa taras ge ǀnanub ga ǀapi ǁaeb hoaba ǀûs ose omǂamǃnâba xu ra ǂnâ ǁgam-i khami ī.

¹⁶ ǁNāti ī tarasa ǂkhās ge ǂoaba ǁkhaes tamas ka io oli-e ǃommi ǀkha ǃkhōs khami ī.

¹⁷ ǀUrib ra ǀuriba ǀāǀā khami i ge khoe-e nau khoe-e ra ǀāǀā.

¹⁸ ǀNomahaisa ra ǃûiǃgâ khoe-i ge ǁîs ǂûna nî ǂû, tsî ǁî-i ǀhonkhoe-e ra kōǃgâ khoe-i ge ǃgôasiba nî māhe.

¹⁹ Sa ais ǂûs ra ǁgam-i ǃnâ mûsen khami-i ge khoe-e ǁî-i ǂgaob ǃnâ ra mûsen.

²⁰ ǁŌhân Hâǃkhaib tsî ǁŌb tsîkha tātsē a ǁâ ǁoa khami ra ge khoe-i mûra a ǂâu tama hâ.

²¹ Tsunitsunisūs ǃnâb ra ǀhaiǀuriba ǃâihe tsî ǁganoms ǃnâ ǃhuniǀuriba, khami i ge khoe-e koas ǀkha ra ǃâihe.

²² Gâre khoe-ets ga ǃhorob khami a dāǃgâ, xawets ge ǁî-i gâresiba dāǂui tide.

²³ Sa ǀgoana ǃgâise ǃûiǃgâ, î sa goman ai ǂâisa ǂnûi;

²⁴ ǃkhūsib gaxuse hâ tama tsî gaosis ǃhaosa xu ǃhaos kōse hâ tama xuige.

²⁵ ǂGuro ǀgân ga ǃgaobēhe tsî ǀasa ǀgâna ǁhai tsî ǃnâudi ai hâ ǀgâna ǀhaoǀhaohe;

²⁶ on ge sarana gūna xu nî kuruhe tsî pirina xu ǃhūǃâsa nî ǁamahe.

²⁷ ǂÂusa dai-i ge sa ǂû-ūs ǃaroma nî hâ, sa omaris di ǂûs ase tsî sa ǃgādi di ǂûs tsî ās ǃaroma.