ǂKhoamîdi 26 - Khoekhoegowab 2020

¹ Soreb ǃnâs tsamarosa hâ ǁoas tamas ka iob ǀnanuba ǃgaoǁaeb ai hā ǁoas, ǁkhās khami-i ge gâre khoe-e ǃgôasiba anu tama hâ.

² ǃAroma-e ūhâ tama ǀâxareb ge hâǃkhai-e ūhâ tama ǀui-aniro-i tamas ka io swabel-i hîa hâǃkhaiose ǁkhanamas ǀguisa ra hî-î khami ī.

³ ǃNabab ge hāb ǃaroma hâ, toms ge dâukib ǃaroma hâ tsî ǂnau-ū haiba gâre khoe-i ǁâb ǃaroma.

⁴ Tā gâre khoe-e gârese ǃeream, tamas ka iots ge sats tsîna nî gâre.

⁵ Gâre khoe-e ǁî-i gâresib ǃoa ǃeream, ǁnā tamas ka io i ge ǁî-e gā-ai i a ti nî ǂâi.

⁶ Gâre khoe-e ǂhôa-e sī māǁnâ kais ge aitsama ǂais ǃnâ ǂnoasens, tamas ka io aitsama ǂkhôasens khami ī.

⁷ ǃHom khoe-i di ǀnūkha ra ǀharas ǁkhās khamis ge gâre khoe-i amsa xu ra ǂoaxa ǂkhoamîsa ī.

⁸ Gâre khoe-e koas ge slengers ǃnâ ǀuisa ǂgās khami ī.

⁹ Gâre khoe-i amsa xu ra ǂoaxa ǂkhoamîs, ge ǀhoro hâ khoe-e ǁî-i ǃoms ǃnâ mâ ǁkhūba ūǂuis khami ī.

¹⁰ Gâre khoe-i tamas ka io ǃkharugaru khoe-e sîsen kais, ge khāǁkhâu-ao-i ǁae tamase mâ khoe-i hoa-e ra ǁkhâu-i khami ī.

¹¹ Ari-i ǁî-i ǀkhûiba ǁkhawa sī ra hapu-i khami, i ge gâre khoe-e ǁî-i ǂû-i di gâresiba ra ǁgaeǃgâ.

¹² Aitsama gā-aise ra ǃgôasen khoe-e mûts ge? Gâre khoe-i ge ǃnāsa ǃâubasensa ǁî-i ǃgâ-ai ūhâ.

¹³ ǀOpesa khoe-i ge ra mî: “Xammi ge ǁnāpa daob ǃnâ hâ! Xammi ge ǁnāpa ǃganni ǃnâ hâ!”

¹⁴ ǀOpesa khoe-i ge ǁî-i kharob ǃnâ ǁgoe ra dabasen, daos ra ǁîs di skarnirdi ai ǁkhowa-am ka ǂganamsen khami.

¹⁵ ǀOpesa khoe-i ge ǃomma ǃores ǃnâ ra ǂgā; xawe ǁîba ams â-i tawa hā-ūsa ǀopesaba.

¹⁶ ǀOpesa khoe-i ge ǁî-i ǂû-i mûǂgās ǃoa a gā-ai, hû khoen ǂuru ǁnâuǃāb ǀkha ra ǃereamn xa.

¹⁷ ǁÎ-i di tama go hâ i ǂkhabab ǃnâ ra ǂgobesen khoe-i, ge ǁaixa ari-e ǂgaera ai ra ǃkhō khoe-i khami ī.

¹⁸ ǃKhau hâ khoe-i ǁae tamase ǃapus tamas ka io ǁōǁōsa ǂāga ra ǂnoa-i,

¹⁹ khami i ge ǁî-i ǀgūkhoe-e ǀhôagaoǃnâ tsî: “Gās ǀguisa ta goro hî,” ti ra mî khoe-e ī.

²⁰ ǀAen ga toa, os ge ǀaesa ǃaruǀî khau ǁoa, tsî ǀhoe-ao-i ga ǀkhai, ob ge ǂkhabab tsîna ra toa.

²¹ ǂNomdi ra ǀgam tsî ǁhabuba ǃaroma tsî ǀaena ǀaesa khau kai, khami i ge ǂkhabaxa khoe-e ǂkhababa ra ǃaroma.

²² ǀHoe-ao-i mîdi ge ǁkhoaxa ǂû-i hoaraga soros khoe-i dis ǃnâ ra ǂgâ-i khami a ǁkhoaxa.

²³ ǂKhanu namsa ūhâ ǂkhaba ǂgao khoe-i, ge ǂnū sūs xlaǂganaisa ūhâs khami ī.

²⁴ ǁKhanao-i ge ǀgamnamxase ra ǃhoa, ǁî-i ǂgaob ǀhôagaosib xa ǀoa hâ hîa;

²⁵ ǀkhomxase i ga ǃhoa, xawe ǁî-e tā ǂgom; ǁî-i ǃnân hû ui-uisa xūna hâ xui-ao.

²⁶ ǁÎ-i di ǁkhanni ga ǂhumib ǀkha ǃgūǃgâhe, xawe ǁî-i ǂkhabasib ge ǀhûhâsib ǃnâ nî ǂhaiǂhaihe.

²⁷ Nau khoe-ets ga āba khaoba, ots ge ǁkhā āb ǃnâ nî ǁnāǂgâ; ǃgupu ǀuisa ga gari khoe-i ǃoas ge ǁkhā ǀuisa nî ǃkhoe-oa.

²⁸ ǂHumixa nams ge ǂkhôas ra khoe-e ǃhuisa tsî ǂkhanu namsa ūhâ khoe-i ge ǂkhôaba ra dī.