ǂKhoamîdi 25 - Khoekhoegowab 2020

ǃAruǀî hâ ǂkhoamîdi Salomob didi

¹ Nēdi ge ǃaruǀî hâ ǂkhoamîdi Salomob didi, Judab di gao-aob Hiskiab ǀgoraǃgâǃkhaib tawa ge khoen xa ǁgâiǁnâhede.

² ǃGôasib âb ǃaromas ge Elob ra xūna ǂganǃgâse ūhâsa, xawe ǃgôasib âb ǃaromas ge gao-aob ra xūna ôaǃnâǂuisa.

³ ǀHommi a ǀgapi khami tsî ǃhūbaib a ǃgam khami, ǁnātis ge gao-aogu di ǂâisa a ôaǃnâheǁoasa.

⁴ ǀUrixasib hoaba ǀhaiǀuriba xu ūǂui, ob ge ǀhaiǀurikuru-aoba îsa xapa-e ǁnāpa xu a kuru ǁkhā.

⁵ Eloxoresa ǀapemā-aona gao-aoba xu ūbe, os ge ǁîb tronsa ǂhanu-aisib ai nî ǃgaoǃgaohe.

⁶ Tā gao-aob aiǃâ ǁîǃgôasen, î tā ǃgôaǃgôasa khoe-i ǃkhais ǃnâ mâisen.

⁷ ǃGâi a ǃkhais ge nēti mîbahesa: “Nēǀî ǂoaxa,” ti gaoǀgôab aiǃâts nî ǃgamǃgamhes xa, sa mûra ge mû khami.

⁸ Tā sa ǀgūkhoe-e ǃhaese ǀgoraǃgâs ǃoa sī-ū; tare-ets ǁnās khaoǃgâ nî dī, sa ǀgūkhoe-i ga ǀams ai taob ǃnâ mâi tsio?

⁹ Sa ǀgūkhoe-i ǀkhats ga ǁhō-e ūhâ, o ǁî-i ǀkha ǁnā ǁhōba ǃhoa, xawe tā ǀnî khoe-i ǂganǃgâsa xūna ǁî-i tawa ǂhaiǂhai.

¹⁰ ǀNî khoe-i ga ǁnâuǃnâ tsi, ots ge nî taotaohe tsî ǁnā taob ǃnâ ǀgui nî ûi.

¹¹ ǃGâise ǂâiǂuihe tsî ǃhoahe hâ mîs ge ǀhaiǀurib ǃnâ kuruǂgāsa ǃhuniǀurib khami ī.

¹² Gā-ai ǂgōǀausa ra ǃgâ ǂgaes ge ǃhuniǀurirâis tamas ka io ǃhuniǀuri-anisenxū-i khami ī.

¹³ ǂGomǂgomsa sîsabe-i ge ǁî-i ǀhonkhoe-i ǂgaoba ra khoakhoa, tsamaros di ǃkhaib ra ǃgaoǁaeb di ǀgamma karakara khami.

¹⁴ Mā tama i hâ mās xa ra koasen khoe-i ge ǃâudi tsî ǂoab tsîn hîa ǀapi kai taman khami ī.

¹⁵ ǃNūǃnâxasib ǀkha ǀguits ge ǂgaeǂgui-ao-e ǃhoadan ǁkhā tsî tsaura mîdi ǀguidi ge ǂkhōba khôa ǁkhā.

¹⁶ Dani-ets ga hō, o tā ǂhâbasa-i as xa ǃnāsase ǂû, ǁnās xats ga ǃnāsase ǂû, ots nî ǀkhûi xuige.

¹⁷ ǀOrosets ge sa ǀgūkhoe-i omsa nî sari, ǁnā tamas ka io i ge ǁî-e tsau tsi tsî nî ǃhui tsi.

¹⁸ Sa ǀgūkhoe-i ǃoa-aits ra dī ǂhumi ǀhûǀguitimîs ge ǀā ǃōs tamas ka io, gôab tamas ka io ǀā ǂāb khami ī.

¹⁹ ǂGomǃgâheǁoasa khoe-e ǂōǂōsib ǁaeb ǃnâ ǂgomǃgâs ge tsûsa ǁgûb ǀkha ǂûs tamas ka io ǁkhuri hâ ǂais ǀkha ǃgûs khami ī.

²⁰ ǃOaxa ǀomsa ūhâ khoe-e am-e ǁnaebas ge ǃkhaib ǃnâ saraba ra ǁhû khoe-i tamas ka io ora ǀhapis ai ǀkhuruxûiba ra ǁhō khoe-i khami ī.

²¹ Sā khākhoe-i ga ǃâ, o ǁî-e ǂû-e mā; ǁgâsa i kao, o ǁî-e ǁgam-e mā.

²² ǁÎ-i danas aits ra ǀaexa ǂnomde ǀhaoǀhao xui-ao tsî ǃKhūb ge satsa nî mādawa-am.

²³ ǀApasǀkhāb ǂoab ge ǀnanuba ra ǀkhī-ū tsî ǀhoexa nams ge ǁaiba ra hā-ū.

²⁴ Omǂamǃnâb ai ǁans ge a ǃgâi, ǂkhabaxa taras ǀkha ǀgui oms ǃnâ hâs xa.

²⁵ ǃGâi ǂhôa-e ǃnū ǃhūba xu ǃkhōǃoas ge ǁgâsa ǀomsa ǃkhai ǁgam-e tsâ kais khami ī.

²⁶ ǂHanu-ai khoe-e eloxoresa khoe-i ǀkha ǂgobegus ge ǂgoaxa tsaus tamas ka io ǀuriǀurisa ǀaus khami ī.

²⁷ Dani-ets ga hō, o tā ǂhâbasa-i as xa ǃnāsase ǂû, tamas ka io tā ǃgôahets hâs xa ǃnāsa ǃgôasiba ôa.

²⁸ ǁÎ-i ǁaiba ǁkhae ǁoa khoe-i ge khôaǁnâhe tsî ǂnubiǂgoaga ūhâ tama ǃās khami ī.