ǂKhoamîdi 24 - Khoekhoegowab 2020

Disikhoeseǀaǁî mîǀgaub

¹ Tā ǂkhabadī-ao-i ûiǀgauba tura tamas ka io tā ǁî-i ǀkha ǀhōsagu.

² ǁÎ-i ǂkhabab ǀguiba ra ǂâi tsî ǁî-i amǁgaukha hîkākās mîdi ǀguide ra ǃhoa xuige.

ǀGamdisiǁî mîǀgaub

³ Gā-aisib ǀkhas ge oms ra omhesa tsî ǁnâuǃāb ǀkhas ge ǁîs ra ǂnubikhâihesa.

⁴ ǂAns ǀkhas ge ǁîs ǃnā-omdi ǂguiǃnâgu ǀō-aisa tsî ǃgomǀgausa xūn ǀkha ra ǀoaǀoahesa.

ǀGamdisiǀguiǀaǁî mîǀgaub

⁵ Gā-ai ǃkhamao-i ge ǀgaisa tsî ǂansa ūhâ khoe-i ge ǀgaisa-i ǃgâ-ai a ǁkhā.

⁶ Gā-ai ǀapedi ǀkha ǀguits ge toroǃkhams ǃnâ nî ǂgâ tsî ǂgui ǀapemā-aon di ǀapemās ǀkha ǀguits ge dan ǁkhā.

ǀGamdisiǀgamǀaǁî mîǀgaub

⁷ Gâre khoe-i ǃaromab ge gā-aisiba kaise ǀgapi; ǀgoraǃgâǃkhaib tawa i ge ams â-e ǁkhowa-am ǁoa.

ǀGamdisiǃnonaǀaǁî mîǀgaub

⁸ Hoaǁaets ga ǂkhababa ǀape, ots ge ǃgomsiba ra ǃaroma khoese ra ǂansa.

⁹ Gâre khoe-i ra ǀapeǂui xū-i hoa-i ge a ǁore. ǃHō-ao-i ge hoa khoen aiǃâ a ui-uisa.

ǀGamdisihakaǀaǁî mîǀgaub

¹⁰ ǃGomsib ǁaeb aits ga ǂkhabusa, ots ge amase a ǂkhabusa.

ǀGamdisikoroǀaǁî mîǀgaub

¹¹ ǂHanuoǃnâse ǁōb ǁkharaba ra ǁgui-aihe khoe-e huiǂuisa dītsâ; ǁî-i ûiba sâusa hoaǁae dītsâ.

¹² Sats ga mî: “Xawe sida ge nēsa a ǀū” ti, ob ǂgaoga ra ôaǃnâba nēsa ǂâiǃgâ ǁoa? Sa ûiba ra ǃûiba nēsa ǂan tama hâ? ǁÎba mâ khoe-i hoa-e ǁî-i dīb ǃoa sîsenū tide?

ǀGamdisiǃnaniǀaǁî mîǀgaub

¹³ Ti ôatse, dani-e ǂû, ǁî-i a ǃgâi xuige tsî daniǂgoasa xu ra ǂnâ dani-i ge ǂkhonse ra ǁkhoa.

¹⁴ ǁKhā ǀgaus aib ge gā-aisiba sa ǀomsa ǂkhonba; ǁîbats ga hō, ots ge ǃgoaxa ǁaeba ūhâ tsîs ge sa ǃâubasensa ǁarahe ǁkhā tide.

ǀGamdisihûǀaǁî mîǀgaub

¹⁵ Tā ǂkhabadī-ao-i khami ǂhanu-ai khoen di oms ǃoagu gauǁgoe; tā ǁîn omsa hîkākā.

¹⁶ ǂHanu-ai khoe-i ge hû ǃnāde i ga ǁnā, xawe ǁkhawa ra khâimâ; xawe eloxoresa-i ge ǂkhabadīb xa nî ǁnā kaihe.

ǀGamdisiǁkhaisaǀaǁî mîǀgaub

¹⁷ Tā sa khākhoe-i ga ǁnā, o ǃgâiaǂgao tsî ǁî-i ga ǃnôa, o dâ.

¹⁸ ǁNā tamas ka iob ge ǃKhūba mû tsî ǃgâibahe tide tsî ǁîb ǁaiba khākhoen âtsa xu nî ǂgae-oa.

ǀGamdisikhoeseǀaǁî mîǀgaub

¹⁹ Tā eloxoresan ǂama ǂâiǂhansen, î tā ǂkhabadī-aon ǃoagu surixa,

²⁰ ǂkhabadīb ǃgoaxaǁae-e ūhâ tama xuige; eloxoresan di ǃamǀaes ge nî ǀari.

ǃNonadisiǁî mîǀgaub

²¹ Ti ôatse, ǃKhūb tsî gao-aob tsîkha ǃaoǃgâba ūhâba, tā ǁîkha ǁnâuǀnamoǃnâ.

²² ǁNā tamas ka io, ob ge ǂōǂōsiba ǃhaese nî hāǂam tsi, tsî tari-e ǁîkha nî ǃaroma ǂkhôaba nî ǂan ǁkhā?

ǃNāsa gā-ai mîǀgaugu

²³ Nē gu tsîn ge gā-ai khoen di mîǀgauga: ǀGoraǃgâs ǃnâ ǀkhāǁhûis ge a tsū.

²⁴ ǂKhabadī-ao-i ǃoa ga mî: “Sats ge a ǀhapio” ti khoe-i, ge khoen xa nî ǀâxarexūhe tsî ǃhaodi xa nî mîǁnâhe.

²⁵ Xawe ǂkhabadī-ao-e ga ǀhapixase hō khoe-i ge ǂkhîba nî ūhâ tsî ǁî-i ûib ge nî ǀkhaexaǃnâ.

²⁶ ǂHauǃnâse ra ǃeream khoe-i ge ama khoexasiba ra ǃaroma.

²⁷ ǂGuro ǃaugab ai sîsentsoatsoa, î aibe sa ǃhanaga ǂhomisase ūhâ; ǁnās khaoǃgâ ǀgui sa omsa omtsoatsoa.

²⁸ Tā ǃaroma i ose sa ǀgūkhoe-i ǃoagu ǀhûǀguitimî î tā sa amǁgaukha ǀkha ǂhumiǂgā-am.

²⁹ Tā mî: “ǁÎ-i ge tita dī i ǀgui-e ta ǁî-e ra dīǃoa; ǁî-i ge dī te i ǀgui-e ta ra ǀkhao,” ti.

³⁰ ǀOpesa khoe-i ǃhanab tawa ta ge ge ǃkharu, gâre-i di draibeǃhanab xōǀkhā.

³¹ Mû, ǁkhūn ge hoaraga ǃhanab ǃnâ ge ǀoa hâ i; ǁîǁhaiben ge hoaraga ǃkhaib ai ge ǂoaxa hâ i tsî ǀuiǂnubiǂgoab âb ge ge ǃkhom hâ i.

³² Nēsa ta ge mû, o ta ge ǂōrisase kō tsî ǁnāpa xu xū-e ge ǁkhāǁkhāsen.

³³ ǂKharirose ǀgui ǁoms, ǂkharirose ǀgui ǂomhîs, ǂkharirose ǀgui ǃomkha sâsâs,

³⁴ ge nî ǃaroma ǀgâsib ǃnari-ao-i khami nî hāǂam tsisa tsî ǁâtanisa ǃkhamao-i khami nî ǁnāǂam tsisa.