ǂKhoamîdi 23 - Khoekhoegowab 2020

ǃNaniǁî mîǀgaub

¹ Dana ǂgaeǂgui-ao-i ǀkhats ga ǂûǀhao, o ǃgâise ǃgaoǃgâ tari-i ǀkhats a ǁaxa ǃkhaisa.

² Kaisets ga ǂûna, o sa ǂûǀgauba ǀoroǀoro.

³ Tā dana ǂgaeǂgui-ao-i ra ǂû ǁkhoaxa ǂûna tura, ǁîn nî ǂgaeǂhapu tsi xuige.

Hûǁî mîǀgaub

⁴ Tā ǃkhūsib ǃaroma dītoasen; gā-aisib ǀkha ǁkhaesen.

⁵ ǃKhūsib ge hāb ra khami ǃhaese ra ǃkharu; ǁîb ge ǁnātimîsi ǁgapokha hō tsî ǃariǃkhās khami ǂoab ǃnâ ra ǁkhanabē.

ǁKhaisaǁî mîǀgaub

⁶ Tā xūǃgunuxa khoe-i ǀkha ǀguipa ǂû; tā ǁî-i ǁkhoaxa ǂûna tura.

⁷ ǁÎ-i ge ǀoms â-i ǃnâ mâtikō ǂgui marin nî matarehesa ra ǃgôakhâi khoe-i khami ī. ǁÎ-i ge “ǂÛ î ā” ti sa ǃoa ra mî, xaweb ǂgaob â-e ǂgao tama hîa.

⁸ ǂKhari ǂûro-i hîats go ǂû-ets nî ǀkhûiǂui tsîts ǃgâi mîdi âtsa nî ǁauǁau xuige.

Khoeseǁî mîǀgaub

⁹ Tā sa mîde gâre khoe-i ai ǂkhôa, ǁî-i sa gā-ai mîde nî ǃharaxū xuige.

Disiǁî mîǀgaub

¹⁰ Tā ǀoro saoǁnâuǀuisa ūbē tamas ka io ǃguniǀgôan di ǃhūǃâsa ǀhana.

¹¹ ǁÎn di Sâu-aob ge a ǀgaisa tsî ǁîna sats ǃoagu nî ǂnoaba.

Disiǀguiǀaǁî mîǀgaub

¹² Sa ǂgaoba sa ǁgauǃnâs ai ǃammâi tsî sa ǂgaera ǂans di mîdi ai.

Disiǀgamǀaǁî mîǀgaub

¹³ Tā sa ôa-e ǂgōǀausa ǀû, ǃnabas ǀkha ǁî-e ǂnaus ge ǁî-e ǃgam tide.

¹⁴ ǁÎ-e ǃnabas ǀkha ǂgōǀaus ge ǁî-e ǁŌhân Hâǃkhaiba xu nî sâu.

Disiǃnonaǀaǁî mîǀgaub

¹⁵ Ti ôatse, gā-ai ǂgaobats ga ūhâ, o ta ge tita tsîna nî ǃgâiaǂgao.

¹⁶ Ti ǀoms ge nî ǃgâiaǂgao, sa amǁgaukha ga ǂhanuse ǃhoao.

Disihakaǀaǁî mîǀgaub

¹⁷ Tā ǁore-aon ra dī xūna tura, xawe hoaǁae ǃKhūb di ǃaoǃgâb ǃnâ ûis ǀkha aiǃgû.

¹⁸ Ots ge amase ǃgoaxa ǁaeba ūhâ tsîs ge sa ǃâubasensa ǁkhaehe ǁkhā tide.

Disikoroǀaǁî mîǀgaub

¹⁹ Ti ôatse, ǃgâ î gā-ai re, î sa ǂâisa ǂhanu daob ai ǃammâi re.

²⁰ Tā ǀhoroseman tsî ǁganō-aon tsîn ǀkha ǀguipa hâ.

²¹ ǀHoroseman tsî ō-aon tsîn ge nî ǀgâǂnû tsîb ge ǁîn ǀopesasiba ǀoro tsî ǀharexa saran ǀguin ǀkha ǁîna nî ǃgau kai.

Disiǃnaniǀaǁî mîǀgaub

²² Sâ îb satsa ûib ǃnâ ge ǀkhī-ūba ǃgâ, î sa îsa kairas ka, o tā sora.

²³ Amaba hōbasen, tā ǁîba ǁamaxū; gā-aisib, ǃgâi ǂūsib tsî ǁnâuǃāb tsîga hōbasen.

²⁴ ǂHanu-ai khoe-i di îb ge nî ǃgâiaǂgao; gā-ai ǀgôa-e ga ǁora khoe-i ge ǁî-i ai nî ǂnīsa.

²⁵ A ra sa îb tsî îs tsîra ǃgâiaǂgao, as satsa ge ǁorasa dâ.

Disihûǀaǁî mîǀgaub

²⁶ Ti ôatse, sa ǂgaoba mā te re tsî a ra sa mûra ti daoba ǃgaoǃgâ.

²⁷ ǀAi-aos ge ǃgam āb khami ī xui-ao; ǃgame khôa-aos ge ǂō tsaus khami ī.

²⁸ ǃNari-ao-i khamis ge ǁîsa ǃâuǁgoe tsî ǂgomoǃnâ khoegu di ǃgôaba ra ǃnā kai.

Disiǁkhaisaǀaǁî mîǀgaub

²⁹ Tari-e ǂōǂōsib ǃnâ hâ-e? Tari-e ǃoab ǃnâ hâ-e? Tari-e ǂkhabab ǃnâ hâ-e? Tari-e kaise ra ǃhoa-e? Tari-e ǃaroma i ose ǂnau-amde ūhâ-e? Tari-i mûra ǀapa?

³⁰ ǁNān ǃkhariǃkhōs ǃnâ ǀgui ra hân ge, ǁnān ǃkharagaǃnâgu ǂauxûiba ra ān ge.

³¹ Tā ǂauxûib di ǀapa īsib tsî āǃnâxapas ǃnâb ra ǂkhai tsî ǁkhoaxase ǁgôa ǃkhais xa ǂgaeǁnâhe.

³² ǀAms ai i ge ǁî-e ǀaob khami nâ tsî ǃgais khami ra ǃkhā.

³³ Sa mûra ge ǀkhai a xūna nî mû tsî ǀhomaxa xūna nî ǃhoa kai tsi.

³⁴ Hurib ǁaegub ǃnâts ǁgoe khamits nî tsâ, ǀhommi ǃnâts ǀgapise ǁkhana garu khami.

³⁵ Sats ge nî mî: “ǂNauhe ta hâ, xawe ta ge tsûtsûhe tama hâ! ǂNau ten hâ, xawe ta ge hōǃâ tama hâ! Xare khâi ta kha nî? Tita ge ǁkhawa ǀnî ǂauxûi-e nî ôabasen.”