ǂKhoamîdi 21 - Khoekhoegowab 2020

¹ Gao-aob di ǂgaob ǂâidi ge ǃKhūb ǃomǁae hâ, ǁgamǃāgab ra ǂgaeǂguis ǁkhās xase; ǁîb ge ǁîga ǂgaob ra ǀgaub hoab ai ra ǂgaeǂgui.

² ǁÎ-i mûǂgāba ǃoa i ge khoe-e dī-i ra xū-i hoa-i a ǂhanu ti ra ǂâi; xawe ǃKhūb ge ǁî-i ǂgaob di ǃgamsiba a ǂan.

³ ǂHanu-aisib tsî ǂhanuba dīs ge ǃKhūb tawa ǃnāsase ūǃoasa, ǁîba ǁguibade ǀkhī-ūbas xa.

⁴ ǀGapiǂâixa mûdi, ǃguriǂgaoxasib tsî ǁî-aitsama ǀgapiǀgapisens eloxoresa khoe-i dis tsîn ge a ǁore.

⁵ Ôasa khoe-i ra ǀape ǀapedi ge amase ǃnāǂamsase nî ǃkhōǃoa, xawe ǃhaese ra ǃkhū ǂgao khoe-i ge ǀgâsib tawa ra ǀamǂoa.

⁶ ǂHumib ǀkha ǃkhūsiba ra hōbasen khoe-i ge ǀanni khami ī; ǁî-i ge ǁōba ra ôabasen.

⁷ Eloxoresan ge ǁîn ǂkhabadīb xa aitsama nî ǀnapubēhe, ǁîn ǂhanuse dī ǂgao tama xui-ao.

⁸ ǀHapixa khoe-i di daob ge a gamaǃgâxa, xawe ǃanu khoe-i ûiǀgaub ge a ǂhanu.

⁹ Omǂamǃnâb ai ǁans ge a ǃgâi, ǂkhabaxa taras ǀkha ǀgui oms ǃnâ ǁans xa.

¹⁰ Eloxoresa khoe-i ge ǂkhabadība ra tura; ǁî-i ǀgūkhoe-i ǀkha i ge ǀkhomxaǃnâse ra ûi.

¹¹ ǃHō-ao-i ga ǁkharahe, o i ge xūtama khoe-i tsîna ra gā-ai; gā-ai khoe-i ga ǁgauǃnâhe, os ge ǂans â-e ra ǀaroǃnâsen.

¹² ǂHanu-ai Elob ge eloxoresa khoe-i omsa ra ǃkhē; ǁîb ge ǁî-e ǀunis kōse ra hîkākā.

¹³ ǀGâsa khoe-i ǂgaidomma ga ǃgâ ǂgao tama i khoe-i ge ǃauǂgai-i ka xawe ǁnâu-amhe tide.

¹⁴ ǂGanǃgâsib ǃnâ ra māhe mās ge ǁaixa khoe-e ra ǃnomǃnom tsî ǁî-i ra māhe ǀkhaeb ge ǁaixasiba ra ǁgoea-ai kai.

¹⁵ ǂHanu-aisib ga dīhe, on ge ǂhanu-ai khoena ra ǃgâiaǂgao, xawe ǂkhabadī-aona ǃhurib ase ība.

¹⁶ ǁNâuǃāxa daoba xu ra ǁnāǁgôa khoe-i ge ǁō hân di ǀhûs ǃnâ sī ra ǀamǂoa.

¹⁷ ǂKhīǂkhurisensa ǀnam khoe-i ge nî ǀgâ; ǂauxûib tsî oli-i tsîna ǀnam khoe-i ge ǃkhū tide.

¹⁸ Eloxoresa-i ge ǂhanu-ai khoe-e ǁamaǂui maris khami ība, tsî ǂgomǂgomsa tama-e ǂhauǃnâ khoe-i ǃaroma.

¹⁹ ǃGaroǃhūb ǃnâ ǁans ge ǃgâi, mâǃoaxa tsî ǂkhabaxa taras ǀkha ǀguipa ǁans xa.

²⁰ Gā-ai khoe-i ge ǃkhūsib tsî oli-i tsîna hoaǁae ūhâ, xawe gâre khoe-i ge ǁîna hapus ǀguisa ra hî.

²¹ ǂHanu-aisib tsî ǃgâisib tsîkha ra ôaǃgon khoe-i ge ûib tsî ǃgôasib tsîkha nî hō.

²² Gā-ai khoe-i ge ǀgaisa ǃkhamaogu di ǃās ǃoagu khâimâ tsî ǁîgu ǁîsa ǂgomǃgâ hâ ǃās ǂnubiǂgoaga ra khôaǁnâ.

²³ ǁÎ-i ams tsî nammi tsîra ra ǃûi khoe-i ge ǂkhababa xu ra ū-oasen.

²⁴ ǀGapiǂâixa tsî ǁgauoǃnâ khoe-i, ǀgapiǂâixasib ǀkha ra sîsen-i ǀons ge a “ǃHō-ao.”

²⁵ ǀOpesa khoe-i turab ge ǁî-e ra ǃgam, ǁî-i ǃomkha sîsen ǂgao tama xui-ao.

²⁶ Hoaraga tsēsa i ge eloxoresa-e xūn di turab xa ǀoa hâ, xawe ǂhanu-ai khoe-i ge a māǂgaoxa tsî xū-e ǃkhō-oa tama hâ.

²⁷ Eloxoresa-i di ǁguibas ge ǃKhūba a ui-uisaba; mâtikō ǃnāsase ǂkhaba ǂâis ǀkha i ga ǁîsa ǁguibao?

²⁸ ǂHumi ǀhûǀguitimî-ao-i ge nî ǁō, xawe ǂan-i a xū-e ra ǃhoa khoe-i ge ǃgâise ra ǀhûǀgui.

²⁹ Eloxoresa khoe-i ge kaise i amaba ūhâ ti ra ǂâi, xawe ǂhauǃnâ khoe-i ge ǁî-i nî dī xū-e ǂâiǃgâ tsî ǀgui ra dī.

³⁰ Gā-aisi-i tamas ka io, ǁnâuǃā-i tamas ka io, ǀapemā-i xare-i ge ǀkhai ǃKhūb ǃoagu a khâi ǁkhā-e.

³¹ Hāb ge ǃkhams ǃaroma ra ǂhomihe, xawe dans ge ǃKhūba xu ǀgui ra hā.