ǂKhoamîdi 20 - Khoekhoegowab 2020

¹ ǂAuxûib ge a ǃhō-ao, ǀgaisa xûi-i ge a ǃkhamao tsî ǁîkha xa ra ǂgaeǂhapuhe khoe-i hoa-i ge a gâre.

² Gao-ao-i di ǃaoǃaosa ǁaib ge xam-i di ǃgurub khami ī; ǁî-e ra ǁaiǁai khoe-i ge ǁî-i ǂû-i ûiba nî ǂoaǃnâ.

³ ǂKhababa xu ǁkhaesens ge ǃgôasiba hōbasensa, xawe gâre khoe-i ge ǂkhababa a ǀnam.

⁴ ǀOpesa khoe-i ge ǃhanaǁaeb ai ǃhana tama hâ; ǁnā-amaga i ge ǁî-e ǃgaos ǁaeb ai ǃgao-i nî xū-e ūhâ tama hâ.

⁵ Khoe-i ǂgaob di ǀapedi ge ǃgam ǁgammi khami ī, xawe ǁnâuǃāxa khoe-i ge ǁîde ra ūǂui.

⁶ ǂGui khoen ge ǁîn ǂgomǂgomsasib ai a ǂnīsa, xawe mâpats ǂgomǂgomsa khoe-e nî hō?

⁷ ǂHanu-ai khoe-i ge ǂhanu ǀgaub ai ra ûi; ǁî-i ôan ge a ǃgâiǃgâxa.

⁸ ǀGoraǃgâtrons ai ǂnôa gao-ao-i ge ǂkhabab hoaba ǁî-i mûra ǀkha ra kōǂuiǃnâ.

⁹ Tari-e kha “Tita ge ti ǂgaoba ge ǃanuǃanu; tita ge ti ǁorena xu a ǃanu” ti mî ǁkhā?

¹⁰ ǂHanuoǃnâse ǃkharagaǃnâgu ǀnō-ūdade sîsenūs ge ǃKhūb tawa ui-uisa xūse ī.

¹¹ ǀGôa-i tsîn ge ǁî-i sîsengu ai ra ǂanhe, ǁî-i dīgu ǃanu tsî a ǂhanu ǃkhaisa.

¹² ǃKhūb ge ǁnâu ra ǂgaes tsî mû ra mûs tsîra hoara ge kuru.

¹³ Tā ǁomsa ǀnam, îts tā ǀgâsib xa ǃkhōhe; mûra âtsa ǁkhowa-am, îts ǂâusa ǂûna ūhâ ǁkhā.

¹⁴ “ǁGai a, ǁgai a” tib ge ǁama-aoba ra mî, xaweb ge ǃgûbēb ka, o ra koasen.

¹⁵ ǃHuniǀurib tsî ǃnāǂamsa ǃgomǀgausa ǀuidi tsîn ge hâ; xawe ǂans di mîdi ge ǀō-aisa ǀuidi khami ī.

¹⁶ ǃHaokhoe-e ga mâba-ao kaiba-i di saraba ū, î ǁî-e ǃhaokhoe-i di mîmâis ase mā.

¹⁷ ǃNarihe hâ ǂû-i ge khoe-e a ǁkhoaxaba, xawe ǁaero-i khaoǃgâs ge ǁî-i amǃnâsa ǃhūb xa nî ǀoa.

¹⁸ ǃGâi ǀapemās ǀguis ge ǂhanu sîsenǂuiba ūhâ; gā-ai ǀapemās ǀkha ǀgui torodī.

¹⁹ ǀHoe-ao-i ge ǂganǃgâsa xūna ra ǂhaiǂhai; ǁnā-amaga ǀhoe-ao-i ǀkha tā ǁaeǁaesen.

²⁰ ǁÎ-i îra ra ǀgoe khoe-i di ûib ge ǃkhaeb ǃnâ ra ǀari ǃamǀae-i khami nî ī.

²¹ ǃHae ǀgaub ai ra hōbasenhe ǃkhūsib ge ǀams ai a ǀkhaeoǃnâ.

²² Tā “ǂkhababa ta nî dīdawa-am” ti mî; ǃKhūba ǃâu, îb ǁîba ǀkhaoba tsi.

²³ ǂHanuoǃnâ ǀnō-ūdade sîsenūs ge ǃKhūb tawa ui-uisa tsî ǀhôagao ǀgaub ai ǀnō-ūdade sîsenūs ge ǃgâi tama hâ.

²⁴ ǃKhūb ge khoe-i ǃgûdaoba ǀnai ǂhomi hâ; ǁnā-amaga mâti i khoe-e ǁî-i daoba ǁnâuǃā ǁkhā?

²⁵ ǃNuis ase i ge khoe-e ība, ǃhaese i ga “ǃAnu a!” ti mî tsî ǁnā mîmâis khaoǃgâ ǀgui, ǁnās xa ôaǃnâseno.

²⁶ Gā-ai gao-ao-i ge eloxoresana ra sabiǂui tsî ǁîna ǀkhomoǃnâse ra ǁkhara.

²⁷ Khoesi gagas ge ǃKhūb di ǃamǀaes khami ī, tsî hoaraga ǃnākhoesiba ra ôaǃnâǃganu.

²⁸ ǀNammi tsî ǂgomǂgomsasib ge gao-ao-e ra sâu tsî ǁî-i trons ge ǂhanu-aisib xa hâ-aihe.

²⁹ ǂKham khoe-i di ǀgaib ge ǁî-i di ǂkhaisi tsî kaira khoe-i di anusib ge ǁî-i di ǀhaiǀûn ǃnâ ǁgoe.

³⁰ ǂNauǀhapidi ge ǂkhababa ra ūbē, ǂnaus ge ǃnākhoesiba ra ǃanuǃanu.