ǂKhoamîdi 18 - Khoekhoegowab 2020

¹ ǀGuri ra ūǂuisen khoe-i ge ǁî-i turab ǀguiba ra sao, ǁî-i ge gā-ai ǀapedi hoade ra mâǃoa.

² Gâre khoe-i ge xū-e ǁnâuǃā i ǀkha ǁae tama, xawe gā-ai i a ti ǂâi tsî ǂgao-i ran ǀguina ra ǃhoa.

³ Eloxoresasib hâbab ge ǃharaxūb tsîna hâ; ǃgôaoǃnâsib hâbab ge mîǁgaiǁgaigub tsîna hâ.

⁴ Khoe-i ams di mîdi ge ǃgam ǁgammi khami ī; gā-aisib ǀaus ge dâu ra ǃāb khami ī.

⁵ ǀHapixa khoe-e ǀkhāǁhûibas ge a tsū, tamas ka io ǀhapio khoe-e ǁî-i ǂhanu-aisiba ǀhanasa.

⁶ Gâre khoe-i amǁgaukha ge ǂkhababa ra ǃkhāǃnâ, ǁî-i ams ge ǃkhamsa ra ǃaroma.

⁷ Gâre khoe-i ams ge ǁî-i ǁnāsa ra ǃaroma, ǁî-i amǁgaukha ge ǁî-i ǂû-e ra ǂhao.

⁸ ǀHoe-ao-i mîdi ge ǁkhoaxa ǂû-i hoaraga soros khoe-i dis ǃnâ ra ǂgâ-i khami a ǁkhoaxa.

⁹ Sîsenni â-i ǃnâ a ǀopesa khoe-i ge aitsama ra dītoasen.

¹⁰ ǃKhūb di ǀons ge ǀgaisa ǂgō-ommi khami ī; ǂhanu-ai khoen ge ǁnāǀî ra ǁhaiǁhâ tsî ra sâuhe.

¹¹ ǃKhūsib ge ǃkhū hâ khoen ǁhaiǁhâǃkhai, ǁîn ge ǀgapi ǂnubiǂgoagu xan ǁkhaubahe hâ ti ra ǂâi.

¹² ǁÎǁâsens ge khoe-i ǂû-i di hîkākā, xawe ǃgamǃgamsens ge ǃgôasiba ra aiǃgûba.

¹³ Khoe-i ga aibe ǃgâ tamase ǃereamsa mā, os ge ǁnāsa ǁî-i gâresib tsî taosib ǀguiba ra ǁgauǂui.

¹⁴ Khoesi gagas ge khoe-e ǀaesenni ǃnâ ra taniǃkharu, xawe tari-e ǀaesen hâ gagasa nî ǂgauǂgau?

¹⁵ ǁNâuǃāxa khoe-i ge ǂansa hōs ǃaroma ra ǁkhāǁkhāsen, gā-ai khoe-i ge ǂansa ra ôa.

¹⁶ Māǂgaoxa khoe-i mādi ge daoba ra ǁkhowa-amba, nēs ǀkha i ge ǁî-e ǀgapi ǃharodi ǃnâ hâ khoena ǀhao-ū ǁkhā.

¹⁷ ǂGurose ǁî-i ǁhōba ra aoǁgui khoe-i a ǂhanu khami i ge ra mûsen, ǁî-i di mâǃoa-ao-i hā tsî ǁî-e dîǃnâ tamas kōse.

¹⁸ ǀKhūǂnaus ge ǁnâusāgude ǀamǀam tsî ǁkhāsiba ūhâ khoekha ǁaegu hâ ǂkhababa ra ǀgoraǃgâ.

¹⁹ Tsûaǂgao kaihe hâ ǀaokhoe-e ǀhao-ūs ge ǀgaisa ǂnubiǂgoagu ǀkha omǂnamisa ǃās ǃnâ ǂgâs xa ǃgom; ǁnâusāgudi ge daoǁkhaegu ǀkha ǃnau-amhe hâ dao-amdi khami ī.

²⁰ Sa ams di mîdi ǂûba xuts ge nî ǁâ; sa amǁgaukha mîdi ǃkhomma xuts ge nî ǃgâiǃgâ.

²¹ Nams ge ǁōb tsî ûib tsîkha ǂama ǀgaiba ūhâ tsî kaise ra ǃhoa khoe-i ge ǁî-i mîdi ǂûba nî ǂû.

²² Tarasa ra hō aob ge ǃgâi xū-e ra hō tsî ǃKhūb di ǃgâisiba ra ǃkhōǃoa.

²³ ǀGâsa khoe-i ge ǃgamǃgamsens ǀkha ra ǀkhomma, xawe ǃkhū hâ khoe-i ge ǀkhoase ra ǃeream.

²⁴ ǀNî ǀhōsa-i ge ǀhōsa-i khami ǀgui ra dīsen, xawe i ge ǀhōsa-e hâ sa ǃgâsa-i xa ǃnāsase sats tawa a ǀgū-e.