ǂKhoamîdi 10 - Khoekhoegowab 2020

Salomob ǂkhoamîdi

¹ Nēdi ge ǂkhoamîdi Salomob dide: Gā-ai ǀgôa-i ge ǁgûba ra ǃgâiaǂgao kai, xawe gâre ǀgôa-i ge a ǁgûs di tsûaǂgao.

² ǀHôagao ǀgaub ai ra hōhe ǃkhūsib ge aiǃgû-e ūhâ tama, xawe ǂhanu-aisib ge ǁōba xu ra ore.

³ ǃKhūb ge ǂhanu-ai khoe-e ǃâ kai tama hâ, xawe eloxoresa-i ǂhâsib ǃnâ dīǀoaǀoa tide.

⁴ ǀOpesa khoe-i ge ǀgâsiba ra ǃaroma, xawe ôasase ra sîsen khoe-i ge nî ǃkhū.

⁵ Soreb ǃnâ ǁî-i ǂûna ǃgao tsî ra ǀhaoǀhao-i ge gā-ai, xawe ǃgaos ǁaeb ai ra ǁomǁgoe-i ge taosiba ǁî-i ai ra hā-ū.

⁶ ǂHanu-ain ge ǀkhaeba nî ǃkhōǃoa, xawe eloxoresan di mîdi ǃnâb ge ǂkhababa a sâuǁguisa.

⁷ ǂHanu-ai khoe-e ǂâiǂâisens ge ǀkhaeb ase ī, xawe ǂkhabadī-ao-i di ǀons ge ǃhaese nî ǀuruhe.

⁸ Gā-ai khoe-i ge ǁgui-aide ra ūǃoa, xawe gâre ǃhoa-aina ūhâ-i di ûib ge nî hîkākāhe.

⁹ ǂHanu-ai ûiba ūhâ khoe-i ge ǃnorasase nî hâ, xawe ǀhôagao khoe-i ge nî ǂanǂuihe.

¹⁰ Mûs ǀkha ra ǂgamibagun ge ǂkhababa ra ǃaroma, xawe ǁnān ǃoa ra ǃhoa-aigun ge ǂkhîba ra sîsen.

¹¹ ǂHanu-ai khoe-i mîdi ge ûib di ǀaus khami ī, xawe ǂkhabadī-ao-i mîdi ge ǂkhabab xa hâǃnâhe.

¹² ǁKhanni ge ǂkhababa ra ǃaroma, xawe ǀnammi ge hoaraga dīsade ra ǃgū-ai.

¹³ ǁNâuǃāba ūhâ khoe-i amǁgaukha aits ge gā-aisiba ra hō, xawe gâre khoe-i ge ǂnauhesa anu.

¹⁴ Gā-ai khoe-i ge ǂansa ra sâubasen, xawe gâre-i ǃhoa-ain ge ǁîb di hîkākāhesa ra ǃhaeǃhae.

¹⁵ ǃKhūsib ge ǃkhū hâ khoe-i ǃgareǀui, xawe ǀgâsa-i ge ǁî-i di ǀgâsib xa ra hîkākāhe.

¹⁶ ǂHanu-ai khoen di mādawa-ams ge a ûi, xawe eloxoresasib ge ǁkharaba ra ǃaroma.

¹⁷ ǂGōǀausa ra ǃkhōǃoa khoe-i ge ûiba nî ǃkhōǃoa, xawe ǂgōǀausa ra mâǃoa-i ge ǂhanu daoba xu ra ǁnāǁgôa.

¹⁸ ǂGanǃgâsa ǁkhanna ūhâ khoe-i ge a ǂhumi-ao, xawe ǀhoe-ao-i ge a gâre khoe.

¹⁹ Kai ǃhoa-ao-i ge supuse ǁoreb ǃnâ ra ǁnā, xawe gā-ai khoe-i ge ǁî-i amsa ra ǃkhō.

²⁰ ǂHanu-ai khoe-i mîdi ge ǂoaǂamsa ǀhaiǀurib khami ī, xawe ǂkhabadī-ao-i di ǂâis ge a ǁau.

²¹ ǂHanu-ai khoe-i amǁgaukha ge ǂguina ra ǂûmā, xawe gâren ge ǁnâuǃāoǃnâsib xa ra ǁō.

²² ǃKhūb di ǀkhaeb ge ra ǃkhū kai, ǀhupuǀhupusens ǀkhats xū-i xare-e ǀaro tamase.

²³ Gâre khoe-i ǃaromas ge tsūse dīsa ǂgamǂgamsenǀhuru-i khami ī, xawe ǁnâuǃāxa khoe-i ge gā-ai tanisens â-i ǀkha ra ǃgâiǃgâisen.

²⁴ Eloxoresa-i ra ǃao xū-i ge ǁî-e ra hāǂam, xawe ǂhanu-ai khoe-i ge ǁkhore i ra xū-e nî māhe.

²⁵ ǁGao mâsib ga hā, o-i ge eloxoresa-e ra kā, xawe ǂhanu-ai khoe-i ge ǀamosib kōse a ǃgaoǃgaosa.

²⁶ ǀKhuruxûib ǁgûde ība tsî ǀanna mûde ība, khamin ge ǀopesana ǁîn sîsenmā-aon ība.

²⁷ ǃKhūba ǁnâuǀnam, ots ge gaxuse nî ûi, xawe eloxoresa-i ûiǁaeb ge nî ǃnubu.

²⁸ ǂHanu-ai khoe-i ǃâubasens ge ǃgâiaǂgaob ǀkha ra ǀam, xawe eloxoresa-i ǃâubasens ge a ǁau.

²⁹ ǃKhūb ge ǂhanu-ai khoe-i di ǃgareǀui, xawe tsūdī-aon di hîkākā-ao.

³⁰ ǂHanu-ai khoe-i ge tātsēs tsîna ǁnobe tide, xawe eloxoresa-i ge ǃhūb ǃnâ hâhâ tide.

³¹ ǂHanu-ai-i amsa xu ra ǂoaxa mîdi ge gā-aisib ǂûtaniba ūhâ, xawe ǂkhaba nammi ge nî ǃgaoǁnâhe.

³² ǂHanu-ai khoe-i amǁgaukha ge tare-i a ǃgâi ǃkhaisa a ǂan, xawe eloxoresa-i ams ge ǂkhabab ǀguiba ǂan.