ǂKhanis Ruts dis 3 - Khoekhoegowab 2020

Naomis ge Rutsa ra ǀapemā

¹ ǀGui tsēs ge Naomisa ǁîs ǀuiǀgôas Ruts ǃoa ge mî: “Ti ôase, ǃgâiba te nî ǃkhais ge ao-e hō tsîs ga ǃgâise ǃkhōǂhomihesa.

² ǂÂis ǃnâ ūhâ re, Boasi, sam ǀaokhoeb, ǃgādi âb ǀkhas gere sîsenna. ǃGâ re, nē tsuxubab ge ǁîba dāǃnâǃkhais tawa ǃhoroba ǀhōba xu nî ǀgora.

³ ǁĀsen tsî ǃgâise hamhamsen, îs anaǂui tsî dāǃnâǃkhais ǃoa ǃgû, xaweb ǁîba tā ǂan ǂû tsîb nî ātoas kōse.

⁴ ǁOmǃgûb ka, os ge mâpab sī ra ǁgoe ǃkhaisa nî ǃgaoǃgâ; tsîs ge ǁîb ǂai-am sī kuiǂgâ tsî nî ǁgoe ǁîb tawas nî sâusenga, ob ge ǁîba tare-es nî dī ǃkhaisa nî ǂanǂan si.”

⁵ Os ge Rutsa “Mîba tes go xūn hoana ta ge nî dī” ti ge ǃeream.

⁶ Nētis ge dāǃnâǃkhais ǃoa ǃgû tsî ǀuiǁgûs ge mîba sin hoana ge dī.

⁷ Tsî Boasi ge ǂû tsîb ge ātoao, ǂkhî ǂgaob ǀkha ǃhoroǃgaeǀkhādi tawa sī ge ǁgoe. Os ge Rutsa ǀkhurisī tsî ǂaira âb tawa kuiǂgâ tsî ge ǁgoe.

⁸ Tsuxuǃgâb aib ge Boasa ǃhuriǂkhai tsîb ge ǂgōse a ǂnûo, kaise buru hâse tara-i ǁîb ǂai-am ǁgoe ǃkhaisa ge mû.

⁹ Ob ge “Tarisa sasa?” ti ge dî. Os ge ǁîsa “Rut ta ge; sa ǃgāta, ǁîta ǂamats ǃereamsa tani hâ ta, xuige sa sâub ǃnâ ū te re” ti ge ǃeream.

¹⁰ Ob ge ǁîba ge mî: “Ab ǃKhūba ǀkhae si re ǂkham khoese, nē ǃgâidīb titas go dībab ge ǂgurob sa ǀuiǁgûsas ge dībab ǃgâ-ai a kai. Sas ge ǂkham khoeba ôa tama go i, ǃkhū hâb kas, ǀgâsab kas hoasa, ǁîb ǀkhas nî ǃgamese.

¹¹ Nēsi ǁnâi tā ǃao, ǂgans gon hoana ta ge nî dī; ǃās ǃnâ hân hoan ǃgâiǂūxa taras a ǃkhaisa a ǂan xuige.

¹² Ama i ge sas ǂama ta ǃereamsa ūhâsa ǂkham khoese, xaweb ge ǀnî ǀaokhoeba hâ tita xa ǃnāsase sas tawa a ǀgūba.

¹³ Nē tsuxuba nēpa hâ re. ǁGoagab ga ǁîba sa ǂama ǃereamsa ū, o i ge a ǃgâi; tsî ǂgao tamab ga i, o ta ge ǃKhūb aiǃâ ra mîmâiba si, tita ǁnā ǃereamsa nî ūsa. ǁGoas kōse nēpa ǁgoe re.”

¹⁴ Nētis ge ǁgoas kōse ǂaira âb tawa ge ǁgoe, xawes ge ǃnâǃā tama i hâ, khoe-i ǁîsa nî mûǂan ǁkhāse, hîa ge khâimâ, Boasi ge ǂgao tama hâ i xui-ao, tara-i go dāǃnâǃkhais tawa hā hâ i ǃkhais nî ǂansa ǃkhaisa.

¹⁵ ǁNās khaoǃgâb ge ǁîs ǃoa ge mî: “Anaǂamxūb âsa ūǁnâ, îs ǁîba khoba.” Os ge ǁnāti ge dī. Tsîb ge ǁîba ǁaubexa ǀgamdisi kiloxramgu ǃhoro-e ge tsoroba si tsî ūkhâi tsî ǁîs ai ge ǂnûi. ǁNās khaoǃgâs ge ǁîsa ǃās ǁga ǃgû

¹⁶ tsî ǀuiǁgûs âs tawa ge sī. Os ge Naomisa “Mâti i go hāba si, ti ôa?” ti ge dî. Os ge Rutsa Boasi go dība sin hoana ǁîsa ge ǁgamba.

¹⁷ Tsîs ge ǁkhāti ge mî: “ǁÎb ge nētikō kai ǃhoro-e go mā te, a ta tā ti ǀuiǁgûs tawa ǀkhaiǃomse sī, tib go mî xui-ao.”

¹⁸ Os ge Naomisa ge mî: “ǃÂuǀgaras ǀguisa hî re ti ôa, î kō mâti i nî hāsa. Nē khoeb ge nētsē sâ tide, nē ǃkhaisab nî dītoas kōse.”