Jesaja 8 - Khoekhoegowab 2020

Jesajab ôab ge khoena saose ība

¹ ǃKhūb ge tita ǃoa ge mî: “Kai ǀuiǂgapaba ū, î ǁîb ai ǁnaetisa xoaǀgaub ǀkha kaise xoa; ‘Maher-salal-has-bas.’

² O ta ge ti ǂgomǂgomsa ǀhûǀguitimî-aokha, prister Uriab tsî Jeberekiab ôab Saxariab tsîkha nî ǂgaiǀkhī.”

³ Tsî ta ge sorosise kēbo-aos ǀkha ge ǂangu; ǁîs ge ǀgamǀkhā tsî ǀgôaba ge ǁora. Ob ge ǃKhūba tita ǃoa ge mî: “Maher-salal-has-bas ti ǀonǂgai bi.

⁴ Nē ǀgôarob ‘Ti îtse’ tamas ka io ‘Ti îse,’ ti nî mîs aiǃâb ge Asiriab gao-aoba Damaskus ǃkhūsib tsî Samariaba xu ge ǀhanahe xūn hoana nî tanibē.”

Asiriab di ǂgaeǂgui-aob ge ra hā

⁵ ǃKhūb ge ǁkhawa tita ǃoa ge mî:

⁶ “Nē ǁaes ge ǃgâi ǀgaub ai ra dâu ǁgammi Siloas diba ǂhara tsîb ge Resinni tsî Remaliab ôab tsîkha ǃaob xa ǀkhū xui-ao.

⁷ ǁNā-amagab ge ǃKhūba ǁîn ǃoagu kai ǀgaisa ǁgammi Eufratǃāb, Asiriab gao-aob tsî ǁîb hoaraga ǂkhaisib tsîkha diba nî ǁgôaxa kai; ǁîb ge ǀoaǃnō tsî ǁîb ǀnomamkha nî dâuǃkhū.

⁸ Nē kai ǁgammi dâus ge Judaba dâuǃkhū tsî nî hara.” ǁÎb di khoraǂuisa ǁgapokha hoakha ge ǃhūb âdu ǂamai nî ǃāǂuihe, Immanueltse.

⁹ ǂHomisen î du ǂgaeǀhao, sa khoedo, î ǃaob xa ǀkhū! Sadu ǃnū ǃhūgu dido, ǃgâise ǃgâ! ǃKhams ǃaroma ǂhomisen, xawe ǃaob xa ǀkhū; ā, ǃkhams ǃaroma ǂhomisen, xawe ǃaob xa ǀkhū!

¹⁰ ǀApeǀhao! Xawen ge xū-i xare-e ǃoaǂui tide. Sîǂui mîmādi âdo, xawe sîsenǂuihe tide! Elob sida ǀkha hâ xui-ao!

ǃKhūb ge kēbo-aoba ra ǃkhâikhom

¹¹ Amase, nēs ge ǃKhūb ge tita mîbasa. ǁÎb ge ǁaposase ǃkhō te tsî khoen ra dī khami ta dī tidesa ge ǃkhâikhom te:

¹² “Tā nē khoen ra ‘ǀapeǀhaos’ ti ǃgapaǀî xū-i hoa-e ‘ǀapeǀhaos’ ase mû. Tā ǁîn ra ǃao xūn xa ǃaoǃaohe, tā ǃhuri.

¹³ Xawets ge ǃKhūb Hoaǀgaixab ǀgaiba nî ǂanǃgâ. ǁÎbats ge nî ǃgôa; ǁîbats ge nî ǃaoǃgâ.

¹⁴ ǁÎb ge nîra ǃanu ǃkhai, xawe khoen xa nî ǃnôa-aihe ǀuis ase tsî khoen xa nî ǂgâusenaihe ǃgareǀuis ase; Israeli ǀgam ǃhaora ǃaroma. ǁÎb ge Jerusalems khoen ǃaroma ǃnuis tsî ǁnoas ase nî ī.

¹⁵ ǂGuin ge ǃnôa tsî nî ǁnā; ǁîn ge ǁnā tsî nî khôa; ǁîn ge ǃnuihe tsî nî ǃkhōhe.”

ǁŌ hân ǀkha ǃhoas ǃoagu hâ ǃkhâikhoms

¹⁶ Ti ǀhûǀguitimîsa ǂōrisase sâu, î Elob ge mā te ǁguiǂamde ti saoǃgonaoga mā.

¹⁷ Tita ge ǃnūǃnâxase ǃKhūb ǁîb aisa Jakob di omarisa xu gaugau hâba nî ǃâu; tita ge ǁîba nî ǃâu.

¹⁸ Mû, nē ta ge a ǃKhūb ge mā te ǀgôan hoan ǀkha, ǂâiǂâisens tsî Israeli ǁkhāǁkhās ase, ǃKhūb Hoaǀgaixab, Sionǃhommi ai ǁan hâba xu sîhe hâse.

¹⁹ Xawe khoen ga mîba du, î du aimûǀgaru-aon tawa ǀape-ôa tsî ǃgai-aon mîde ǃgâ; ǁaesa kha ǁîn Elob tawa ǀape-ôa tide, ǁō hân tawa ûitsaman di ǃgoaxaǁaeb xa dîs xa?

²⁰ Ots ge ǃKhūb di ǂHanub tsî kēbosi ǀhûǀguitimîs ǃoa oa. ǁÎn ǂâidi gagasise ǃkhae, amagan ge ǁnāti ī xūna ra mî.

ǂŌǂōsib ǁaeb

²¹ Khoen ge kaise ǃan hâse tsî ǃâ hâse ǃhūb ǃnâ-u nî ǃkharu; ǃâs xan ge ǁîna ǁaixa tsî ǁîn gao-aob tsî ǁîn Eloba nî ǀâxare ǀgapikab ǁgan ra kōkhâise.

²² ǃHūb ǃoan ga kō, on ge ǂōǂōsib tsî ǃkhaenas ǀguisa ra mû; ǃaoǃaosa ǃkhaenas hîan nî ǁgariǂgāǃnâhesa.