Jesaja 61 - Khoekhoegowab 2020

Ores di ǃgâiǂhôas

¹ Gagab ǃKhūb Elob dib ge tita ai hâ, ǃKhūb ge ǀnau te amaga. ǁÎb ge ǃgâiǂhôasa ta ǁgâiǀāhe hâna nî ǀkhī-ūbase ge sî te, khôaǂkhūhe hâ ǂgaoga ūhâna ta nî ǃgae-aibase, ǃnorasa ta ǃkhōsana aoǁnâbase tsî ǃkhōsabena nî ǃnoraǃnorahesa.

² ǃKhūb ǀkhomxaǂgaosib di kuriba ta nî aoǁnâse tsî sada Elob ǀkhaob di tsēsa ta nî ǂanǂanse, tsî ǃoa ran hoana ta nî ǁkhaeǂgaose.

³ Sions ǃnâ ra ǃoan nî ǀgaiǀgaiǃnâhese, ǁîna tsaob di amǃnâs ai anixū-e mā, ǃoab di amǃnâs ai ǃgâiaǂgaob oli-e, ǂōǂōhe hâ gagas amǃnâs ai ǃgâiaǂgaob saraba mā. ǁÎn ge aikehain ǂhanu-aisib din dise nî ǂgaihe, ǃKhūb xa ǃhanahe hâse, ǁîb ǂkhaisiba ǁgauǂuis ǃaroma.

⁴ ǁÎn ge ǀnai ge hîkākāhe ǃāde nî omkhâi, aibekam hîǀhuruden ge ǁkhawa nî ǂnubikhâi. ǁÎn ge hîkākāhe ge ǃāde ǁkhawa nî ǀasaǀasa, ǂgui ôananôagugu ǁaeba hîkākāhe hâde.

⁵ ǃHaokhoen ge sadu ǀgoana nî ǂûmā, ǃhaokhoen ge sadu ǃhanaga sîsenai tsî draibeǃhanaga nî kōǃgâ.

⁶ Xawe sadu ge ǃKhūb di pristerse nî ǂgaihe, sadu ge Elob sîsenaodu ase nî ǂanhe. ǁAedi ǃkhūsiba du ge nî ǀama tsî ǁîdi ǃkhūsib ǂkhaisib ǃnâ nî ǃgâiaǂgao.

⁷ Sadu taosib ge a ǀgamǃnâgu tsî sadu ǂhauǃnâoǃnâsib ge ǁîdi ǁkhara kai xui-ao. ǁNā-amagan ge ǁîn ǃhūba ǀgamǃnâguse nî ūbasen; ǀamo ǃgâiaǂgaob ge nî ǁîn di.

⁸ Tita ǃKhūta ge ǂhanuba a ǀnam, tita ge ǃnaris tsî tsūdīs tsîra a ǃhuisa. ǂGomǂgomsase ta ge ǁîna nî dīdawa-am tsî ta ge ǀamo ǃgaeǀhaosa ǁîn ǀkha nî dī.

⁹ ǁÎn ôananôagub ge ǁaedi ǃnâ nî ǂansa tsî ǁîn suriba khoen ǁaegu. ǁÎna nî mû khoen hoan ge ǃKhūb xa ge ǀkhaehe khoen ase ǁîna nî ǂanǃgâ.

¹⁰ Tita ge kaise ǃKhūb ǃnâ nî ǃgâiaǂgao, ti hoaraga khoesib ge ti Elob ǃnâ nî ǀgapiǀgapisen. ǁÎb ge tita ǃgâiǃōsib saraba ge ǂgaeǂgā, ǁîb ge ǂhanu-aisib sarab ǀkha ǃgū-ai te xui-ao. ǃGame-aob ǁî-aitsama ra anisen khami, tsî ǃgame-aos ǃgomǀgausa anixūn ǀkha ra anisen khami.

¹¹ ǃHūb ra ǁîb ǁhaona ǁhai kai khami tsî ǃhanab ra ǁîb ǃnâ ge ǃhanahena ǀomkhâi kai khami, ǁnātib ge ǃKhūb Eloba ǁaedi mûǁae ǂhanu-aisib tsî koas tsîna nî ǁhai kai.