Jesaja 56 - Khoekhoegowab 2020

Elob ǁaes ge hoa ǁaede nî ǃkhōǂgā

¹ Nētib ge ǃKhūba ra mî: “ǂHanu-aisiba aiǃgû kai, î ǂhanu xūna dī! Ti ores ǃhaese nî hā tsî ti ǃnora kais nî ǂhaiǂhaihe xuige.

² ǀKhaehesa i ge ǁnā khoe-i nēsa ra dī-e, ǁnā-i nēsa ra ǃkhōǀgaipe-i, Sabbattsēsa ra ǃgôaǃgâ-i, ǁîsa ǃanuoǃnâ kai tama i tsî ǂkhaba-e dīsa xu ra ǁkhaesen-e.”

³ A i ǃhaokhoe-i ǃKhūb ǁani kai ra-e tā nēti mî: “ǃKhūb ge amase ǁîb khoena xu nî ǀgora te” tib dabisa khoeba tā mî: “Tita ge ǂnâsa haita,”

⁴ Nētib ra ǃKhūba mî xui-ao: “Dabisa khoegu ti Sabbattsēsa ra khaigu tsî tita ǃgâiba xūna ra ǁhûigu tsî ti ǃgaeǀhaosa a ǂgomǂgomsabagu ǃaroma,

⁵ ta ge ti ommi tsî ǂnubiǂgoagu ǁaegu, ǃkhai-i tsî ǀonsa nî mā, ǀgôagu tsî ǀgôadi tsîn ǃgâ-ai a ǃgâi-e. ǁÎna ta ge ǀamo ǀons tātsēs tsîna ǀariǂuihe tidesa nî mā.”

⁶ “ǃHaokhoen ǁî-aitsamaba xu ra ǃKhūba saon, ǁîba ǃoabas ǃaroma, ǃKhūb ǀonsa nî ǀnamn tsî ǁîb ǃoaba-ao kai nîn, hoan sabbatsēsa nî ǃkhōǀgaipen tsî ǁîsa ǃanuoǃnâ kai tiden tsî ti ǃgaeǀhaosa nî ǃkhōǀgaran;

⁷ ǁîna ta ge ti ǃanu ǃhommi ǃoa ūsī tsî ǁîna ti ǀgore-ommi ǃnâ nî ǃgâiaǂgao kai. ǁÎn khauǁguibadi tsî ǂāǁguibadi tsîn ge ti altars ai nî ūǃoahe. Ti ommi ge hoaraga khoen ǃaroma, ǀgore-ommi ti nî ǂgaihe.”

⁸ Nētib ge ǃKhūb Elob Israels ǂhāǂuisana ra ǀhaoǀhaoba ra mî: “Tita ge nauna ǁîn tawa, ǀnai ge ǀhaoǀhaohe hâ in xōǀkhā nî ǀhaoǀhao.”

Israels ǂgaeǂgui-aogu ra ǀgoraǃgâhe

⁹ ǃAub ǃnâ hâ ǀgurudu hoado, haiǀgoms ǃnâ hâ ǀgurudu hoado, hā î du ǁîna hapu!

¹⁰ Israels ǃûi-aogu hoagu ge a ǂgī, ǁîgu ge ǂan-i xare-e ūhâ tama hâ. ǁÎgu hoagu ge ǃgome arigu ǁhū tamaga. ǁÎgu ge ǁgoes ǀguisa ra hî tsî ǁom ǂgaos ǀguisa ra hî.

¹¹ Nē arigu ge kaise ǂûna; ǁîgu ge tātsēs tsîna ǂâu tama hâ. ǁÎgu ge ǁnâuǃā-i xare-e ūhâ tama ǃûi-aoga; ǁîgu daogu ǀguiga gu ge ra sao, aitsama ǃkhūǃkhūsens ǃaroma.

¹² ǁÎgu ge “Hā, î ge ǂauxûiba hōbasen; a ge xûib ǀkha ǀoaǀoasen. Tsî ǁaris ge nētsēs khami nî ī, ǁîs ge ǀnōhe ǁoase nî kai” ti ra mî.