Jesaja 55 - Khoekhoegowab 2020

ǃKhūb ǀkhommi di ǁguibas

¹ ǃKhūb ge ra mî: “Sadu, ǁgâ hâdu hoado, ǁgam-i ǃoa hā re; tsî sadu mari-e ūhâ tamado, ǀkhī î hā ǂû tsî ā! Hā î, ǂauxûi-i tsî dai-i tsîna marioǃnâse tsî ǂganǀgau-i ose hā ǁama.

² Tare-e du sadu mari-e pere tama-i ai ra ǁamaxūba tsî ǂâu kai taman ǃaroma ra sîsen? ǂŌrisase ǃgâ te, î ǃgâi a-e ǂû, tsî ǂoaǂamsa ǂû-i ǀkha ǃgâiǃgâisen.

³ “ǃGaoǃgâ, î tita ǃoa hā; ǃgâ, î du ûi ǁkhā! Tita ge sadu ǀkha ǀamo ǃgaeǀhaosa nî dī, ti ǁaposa, hâhâ ra ǀnammi Davida ta ge mîmâibaba.

⁴ Mû, tita ge ǁîba ǁaedi ǃkhō-amaose ge dī, ǁaedi ǂgaeǂgui-ao tsî mîmā-aose.

⁵ Mû, ǀū du a ǁaede du ge nî ǂgai tsî ǁaedi hîa du a ǀūdi ge sadu ǁga nî ǃkhoehā, ǃKhūb sadu Elob ǃaroma. ǁNāb Israels di ǃAnub ge sado ǂkhaiǂkhai xui-ao.”

⁶ ǃKhūba ôa re, hōhe ǁkhāb a hîa, ǁîba ǂgaiǀî re, ǀgūseb hâ hîa.

⁷ An eloxoresana ǁîn daoga ǁnāxū tsî ǂkhabadī-aona ǁîn ǂâide. An ǁîna ǃKhūb ǃoa ǃhobasen, îb ǁîna ǀkhomma mā tsî sada Elob ge ǁîna ǃnāǂamsase nî ǀûba.

⁸ ǃKhūb ra mî xui-ao: “Ti ǂâidi ge sadu ǂâi tamade tsî sadu daogu ge ti dao tamaga.

⁹ ǀHommi ǃhūbaib xa a ǀgapi, khami gu ge ti daoga sadu daogu xa a ǀgapi tsî ti ǂâide sadu ǂâidi xa xui-ao.

¹⁰ “ǀNanub tsî tsamaros tsîra ǀhomma xu ǁgôaxa, tsî ra ǃhūbaiba ǀâǀâ tamas kōse oa tide. ǁÎra ge ǀom kai tsî ra ǁhao kai tsî tsoro-aoba ǃkhomna mā tsî ǂû-aona ǂû-e ra mā.

¹¹ ǁNātis ge ti amsa xu nî ǂoaxa mîsa nî ī; ǁîs ge ǀkhaiǃnâse tita ǃoa oahā tide, xawe ti ǂâibasensa nî dīǀoaǀoa tsî ǁîsa ta ge sîba ǃaromasa nî dītoa.

¹² “Sadu ge ǃgâiaǂgao rase ǂoa tsî ǂkhîb ǃnâ nî ǂgaeǂguiǂuihe. Sadu aiǃâ ǁgoe ǃhomgu tsî ǃnâugu ge ǁnaeb ǃnâ nî ǂariǃā tsî ǃaub di hain hoan ge nî ǁapunǃom.

¹³ Siprehaidi ge ǁkhūn ǃās ǃnâ nî ǁhai; mirdehaidi ge ǀkhininin ǃās ǃnâ nî ǁhai. Nēs ge ǃKhūb di ǂâiǂâisen xūse nî ī, ǀamo sao-i hîa ǀariǂuiheǁoa-i ase.”