Jesaja 53 - Khoekhoegowab 2020

¹ Khoen ge ra ǃeream: “Tari-e sida ge ǁnâuna a ǂgom ǁkhā? Tsî ǃKhūb ǁôaba tari-eb ge ǂhaiǂhaibahe?

² Elob aiǃâs ge ǁîb ge ǂgonaro-i khami ǀomkhâisa tsî ǃnoma-i khami ǂnâsa ǃhūba xu ǂoaxasa. ǁÎb ge ī-i tamas ka io ǂkhaisi-i hîa da nî kōǀî-e ūhâ tama, ī-i hîa da nî ǁkhore-eb ge ūhâ tama hâ.

³ ǁÎb ge naun xa ǁgaiǁgaihe tsî ge ǂharahe; khoeb tsâb tsî ǀaesenni tsî ǃâitsâb diba. ǁNāb khoen ǁîn aide ǁîba xu gaugaus ǀkha gere ǁgaiǁgaiba da ge xū-e harebe tamab ase gere ǃgapaǀî.

⁴ “Amase ǁîb ge sada ǀaesenga ǁîb ai tani tsî sada tsâga ǁîb ai ge ū, xawe da ge ǁkharaheb hâse ǁîba gere ǃgapaǀî, Elob xa ǂnauǁguihe tsî tsûtsûhe hâb ase.

⁵ Xawe ǁîb ge sada ǁoren ǃaroma ge tsuihe, ǁîb ge sada tsūdīn ǃaroma ge ǂnauhe. ǁÎb di ǁkharab ge sada ge ǂgauǂgau tsî ǁîb ǂnauǀhapidi ge ge ǂuruǂuru da.

⁶ Sada hoada ge gūn khami ge kāǁhapu, sada ǂhunuma daogu ǃoa da ge ge dabasen tsîb ge ǃKhūba ǁîb ǂûb ai sada dīsade ge tani.

⁷ “ǁÎb ge ǁgâiǀāhe tsî ge tsâ kaihe, xaweb ge ams âba ǁkhowa-am tama ge i. ǂĀǃkhaib ǁga garu-ūhe ǁkhao-i khami tsî gū-i ǁî-i ǂkhomaogu aiǃâ ǃnōsase ǁgoe i, khamib ge ams âba ǁkhowa-am tama ge i.

⁸ ǁÎb ge ǁgâiǀāb tsî ǀgoraǃgâs tsîra ǃnâ-u ge ūbēhe. Tari-e ǁîb ǃgoaxaǁaeb xa ga ǂâiǃgâ hâ? ǁÎb ge ûitsaman ǃhūba xu ge ǁaraǁnâhe, ti khoen ǁoren ǃaromab ge ǂnauhe amaga.

⁹ ǁÎb ǀhobasan ge ǂkhabadī-aon ǀkha ǀguipa ge dī tsî ǁîb ǀhobasa ǃkhū hân ǀkha; ǂkhaba-i xare-eb dī tama hîa tsî ǁîb ams ǃnâ i ge ǀhôagaosi-i xare-e ge ǀkhai i.”

¹⁰ “Xawe ǃKhūb ǂâi ge is ge tsûb ǀkha tsâ kai bisa, ǁîb ge ǁîba kaise ge ǃoa kai; ǁîb ûiba du ga ǁoreǁguibas ase dī, ob ge ǁîb suriba nî mû tsî tsēdi âba nî gaxugaxu. ǁÎb ǃnâ-us ge ǃKhūb ǂâis nî aiǃgûsa.

¹¹ ǃAob âba xus ge ǃnâbab nî mûsa, ǂans âba xus ge ǃnāǂamsasibab nî hōsa. ǂHanu-aib, ti ǃoaba-aob ge ǂguina nî ǂhanu-ai kai tsîb ge ǁîn dīsāde nî tani.

¹² ǁNā-amaga ta ge kain ǀkha ǃhūǃâ-e nî mā bi tsîb ge ǀgaisan ǀkha ǁkhâuǁnâxūna nî ǀgoragu; ǁōb kōseb ge ǁî-aitsama a ǁhōǂuisen tsî tsūdī-aon ǀkha ǃgôaǀhaohe hâ i xui-ao. Xaweb ge ǂguin di ǁorena ge tani tsî tsūdī-aona ge mâǂgâba.”