Jesaja 50 - Khoekhoegowab 2020

¹ Nētib ge ǃKhūba ra mî: “Sadu îs di ǀgoraǂkhanis, ǁîsa ta ge sîbē-ūsa mâpa hâ? Tamas ka io mâb ti surude ôa-aob, ai ta ge ǁamaxū du? Ā, sadu ǁoren ǃaromas ge ǁamaxūhe du gesa, tsî sadu tsūdīgu ǃaromas ge sadu îs ge sîbēhesa.

² “Tare-i ǃaroma-i ge khoe-e ǀkhai i, hā ta geo? Tare-i ǃaroma-i khoe-e ge ǃeream tama hâ i ǂgai ta geo? Ti ǁôaba kha ǃnubu, ore ǁoab ase? Tamas ka io ta ores di ǀgaiba ūhâ tama? Ti ǁkhāsiba xus ge huriba ta ge ǂnâ kaisa; ǃāga ta ge ǃgaroǃhūse dīsa. ǁGam-i ǀkhai ǃkhais ge ǁîgu ǁaun ra ǀō, tsî ǁgâs xa ǁōsa.

³ Tita ge ǀhomma ǃkhaenas ǀkha ana tsî ǃoasarab ǀkha ra ǃgū-ai.”

ǃKhūb ǃgāb di ǁnâuǀnamxasib

⁴ ǃKhūb Elob ge ǁgauǃnâ-ao-i namma ge mā te, î ta ǂan mâ ǀgaus ai ta ǂkhabusana nî ǂkhâǃnâsa. ǁGoas hoasab ge ra ǂkhaiǂkhai te, ǁîb ge ti ǂgaesa ǁnâus nîse ra ǂkhaiǂkhai, ǁkhāǁkhāsabe-i khami.

⁵ ǃKhūb Elob ge ti ǂgaesa ge ǁkhowa-am tsî ta ge khâikhâisen tama ge hâ i, tita ge dabasen tama ge i.

⁶ Tita ge ti ǁâba ǂnau te gena ge mā tsî ti xōra ǁnān ti ǀhō-amga ge ǂgaeǂuina; ti aisa ta ge mîǁgaiǁgaihes tsî ǂara-aihesa xu sâu tama ge i.

⁷ ǃKhūb Elob ge tita ge hui, ǁnā-amaga ta ge taotaohe tama ge i. ǁNā-amaga ta ge ge mâǀgai tsî taotaohe ta tidesa ge ǂan i.

⁸ Tita nî ǂnoabab ge a ǀgū. Tari-e tita nî ǂnoaǃoa? A da mâǀhao. Tarina ti ǂnoaǃoa-aona? An tita ǁgoaǂui!

⁹ ǃKhūb Elob ge tita ge huiba; tari-e tita ǀhapixase nî hō? Hoan ge sara-i khami nî ǀoro; ǁgurib ge ǁîna nî hapu.

¹⁰ Tari-i sadu di-e ǃKhūba ra ǃaoǃgâ-e tsî ǁî-i ǃgāb domma ra ǁnâuǀnam-e? Tari-e ǃkhaenas ǃnâ ǃgû tsî ǃnâ-e ūhâ tama-e, xawe ǃKhūb ǀons ǃnâ ǂgomǃgâ tsî Eloba xu ra ǃâubasen-e?

¹¹ Xawe sadu hoadu ge ǀaes ǃamamaodu; ǀaes nanide ra ǃamamdo. Sadu ǀaeǁhabub ǃnâ ǃgû tsî sadu ge ǃamam nanidi ǁaegu! Nēs ge ti ǃomma xu du nî ǃkhōǃoasa; tsûb di ǃkhais ǃnâ du ge nî ǁgoe.