Jesaja 35 - Khoekhoegowab 2020

ǃAnusib daob

¹ ǃGaroǃhūb tsî ǂnâsa ǃhūb ge nî dâ, ǀgopaǃhūb ge ǃgâiaǂgao tsî nî ǁhare, lelib khami.

² ǁÎb ge ǃnāǂamsase nî ǁhare tsî ǃgâiaǂgaob tsî ǁnaeb ǀkha nî dâ. Libanonni ǂkhaisibab ge nî māhe, Karmeli tsî Saronni tsîkha ǁkhāsib ǀkha. ǁÎn ge ǃKhūb ǂkhaisiba nî mû, sada Elob di ǁkhāsiba.

³ ǂKhabusa ǃomga ǀgaiǀgai, î ǀkhū ra ǁgoade ǁapoǁapo!

⁴ ǃAnaǂgao hâna mîba: “ǀGai, î tā ǃao! Nēb ge sadu Eloba. ǁÎb ge ǀkhaob nîse ra hā, ǁkhō mādawa-ams ǀkha. ǁÎb ge hā tsî nî ore du.”

⁵ O di ge ǂgīn di mûde nî mû tsî ǂganaǂgae hân ge nî ǁnâu.

⁶ ǃHoran ge ǁkhama-i khami nî uri tsî ǃgomen namgu ge dâxase nî ǁnae. ǁGamgu ge ǃgaroǃhūb ǃnâ nî dâu tsî ǁgamǃāga ǀgopaǃhūb ǃnâ.

⁷ ǀGamsa ǀgopaǃhūb ge nî ǃkhubi kai tsî ǂnâsa ǃhūb ge ǁgamǀaudi xa nî ǀoa. ǀGirin gere hâ ǃkhaidi, ain ge ǀgân tsî ǂāgu tsîna nî ǁhai.

⁸ Kai daob ge ǁnāpa nî ǁgoe, tsî “ǃAnu Daob” ti nî ǂansa. ǃAnuoǃnân ge ǁîb ai ǃgû tide, xaweb ge Elob khoen dise nî hâ; ǃgû-aon tamas ka io gâren ge ǁîb ai kāma tide.

⁹ Xam-i tamas ka io ǁaixa ǀguru-i xare-i ge ǁîb ai hōhe tide; ǁîn ge ǁnāpa hōhe tide, xawe orehe hân ge ǁîb ai nî ǃgû.

¹⁰ ǃKhūb di orehe hân ge oahā tsî ǁnae rase Sions ǃnâ nî ǂgâ. ǀAmo ǃgâiaǂgaob ge ǁîn danadi ai nî hâ; ǁîn ge ǃgâiaǂgaob tsî dâba nî hō, tsî ǃoab tsî ǃgaeb ge nî kābē.