Jeremia 18 - Khoekhoegowab 2020

Jeremiaba sūǂnubi-aob oms tawa

¹ Mîs ǃKhūb dis ge Jeremiaba ge hāba:

² “Khâi, îts sūǂnubi-aob oms ǁga ǃgû, ǁnāpa ta ti ǂhôasa nî mā tsi xuige.”

³ O ta ge sūǂnubi-aob oms ǁga ge ǁgôa tsî ta ge ǀnūs tawab ra sîsen ǃkhaisa ge mû.

⁴ ǂGoab ǀkhab ra kuru xū-i ga ǁgais hoasab ge ǁkhawa ǀkhara soa-e gere kuru, ǁîba a ǃgâiba khami.

⁵ Ob ge ǃKhūba tita ǃoa ge mî:

⁶ “Tita xare sadu ǀkha dī ǁoa ta a, nē sūǂnubi-aob ra ǂgoa-i ǀkha dī khami, sadu Israelǁaes dido? ǂGoab sūǂnubi-aob ǃomǁae īs ǁkhās xase du ge sadu tsîna ti ǃomǁae ī.

⁷ ǃNapetaman hâ hîa ta ge tita ǁae-i ǃoagu tsî gaosi-i ǃoagu nî ǃhoa, ǁî-e ta ǃhomǂui, khôaǁnâ tsî nî hîkākā ti;

⁸ xawe ǁnā ǁae-i, ǁî-i ǂama ta nēsa ra ǃhoa-i ga ǂkhabasib â-e xu ǃhobasen, o ta ge nî ǃhausen ǁnā ǂkhabab, ǁîna dī-ūsa ta ge ǂâibasen hâ ib xa.

⁹ ǃNapetaman hâ hîa ta ga ǁaes tsî gaosiba ta ǂnubi tsî nî ǁapoǁapo ti a mî,

¹⁰ xawen ga ti mûǁae a tsūna dī, o ta ge ǁîna ta nî dībase ta ge ǂâibasen hâ i ǃgâina nî ǀû.

¹¹ Îts ǁnâi nēsi aogu Judab digu ǃoa tsî Jerusalems ǁanǂgāsaben ǃoa ǃhoa: ‘Nētib ra ǃKhūba mî: “Mû! Tita ge ǂkhaba-e sadu ǃoagu ra kuru, tsî ta ge ǂkhaba-e sadu ǃoagu ra ǀape-e. Î du ǁnâi nēsi ǃhobasen, mâ-i hoa-e ǁî-i ǂkhaba daoba xu, î du daogu tsî dīgu âdo dīǃgâiǃgâi.”

¹² Xawen ra ǁîna mî: “ǁAu a, sida di ǂâide ǃoa da nî tanisen. Mâ-i hoa-e âda ge ǁî-i ǂkhaba ǂgaob di ǂâibasens ǃoa nî dī.” ’ ”

ǁAes ge ǃKhūba ra ǂhara

¹³ ǁNā-amaga nētib ra ǃKhūba mî: “Dîǃgâ re ǁaedi ǃnâ, tari-e nēti ī xūna ge ǁnâu. ǂKhamkhoes Israels ge kaise ui-uisa xū-e dī.

¹⁴ Tsamaros Libanonni disa xare ǃhaoba xu ǃaub ǃoa dâuǁgôaǀûs ra? ǁNā ǃhao tsî ǃkhai dâu ra ǁgamga xare ǂnâ gu ra?

¹⁵ Xawe ti ǁaes ge tita ge ǀuru; ǁîn ge ǁgôa-eloga ge ǀanǀanba, ǁîn ge daogu ai ge ǃnôa, ǁnā ǀoro daogu ai, dao-i ǂhanuǂhanuhe tama hâ-i di ǃgangu ain nî ǃgûse.

¹⁶ ǁÎn ǃhūban nî ǃū-aisa ǃkhaise ǂnûise, ǀamo ǃharaxūxūse; ǃgû-īǀkhā si ka khoe-i hoa-i ge ǃhurigâ tsî nîra ǃnabindana.

¹⁷ Aiǂoas di ǂoa-i axase ta ge tita ǁîna nî ǀgaruǀgaru khākhoeb ais aiǃâ; tita ge ǁîna ǃaoba nî mû kai tsî aisa mû kai tide tsūǀkhāb ân di tsēs ai.”

Jeremiab ǃoagu hâ ǀapeǀhaos

¹⁸ On ge ge mî: “Hā î da Jeremiab ǃoagu ǀapeǀape. ǂHanub pristera xu kā tide tsî ǀapesa gā-aiba xu tsî mîsa kēbo-aoba xu kā tide xuige. Hā î da ǁîba nams ǀkha ǂnau, î da tā ǁîb mîdi hoade ǃgâ.

¹⁹ “ǃKhūtse, tita ǃgâ re, îts tarenan ti mâǃoasabena tita xa ra ǃhoasa ǁnâu re!

²⁰ ǃGâi-i ama-i kha ǂkhaba-e nî mādawa-amhe? ǁÎn ge ti ǀomsa ā-e ge khaoba. ǂÂi re, sa ais aiǃâ ta ge mâ i ǃkhaisa, ǁîna ta ǃgâi mî-e nî ǃhoabase, ǁgôasib âtsa ta nî ǁîna xu ǁkhaedawaga.

²¹ ǁNā-amaga ǁîn ôana ǃâtsūǀkhāba mā; îts ǁîna gôab di ǀgaib ǃnâ māǁnâ. Îts ǁîn tarade ǀgôana ūǀhanahe hâ ǃoatara kai; î gu ǁîn aoga ǂhīǁōb xa ǃgamhe, î gu ǂkham khoegu âna gôab ǀkha ǃgamhe torob ǃnâ.

²² A-i ǀō-e ǁnâuhe ǁîn omde xu, ǃhaesets ga satsa ǁîn ǂama toroǂnubi-e hā kaio, ā-en ge khao amaga, titan nî ǃkhōse, tsî ti ǂaiden nî ǁnoaga ǁguibase.

²³ Xawe sats ǃKhūts ge ǁîn di ǀapes, ti ǃoagun ǃgam te nîse ūhâs hoasa a ǂan. Tā ǃgū-ai ǁîn di ǂhanuoǃnâsiba, îts ǁîn di ǁoreba tā ǀari, sa ais aiǃâba xu. Xawen ǁîna ǁnā sa ais aiǃâ; ǁnāti ǁîna sîsenū ǁaib âts di ǁaeb ai.”