Hosea 6 - Khoekhoegowab 2020

ǁAes di ǂhumi ǃhobasens

¹ “Hā, î da ǃKhūb ǃoa oa re, ǁîb ge sada go ǀkhauǃā tsîb ge sada nî ǂuruǂuru; ǁîb ge sada go ǂnau, tsîb ge sada nî ǃgae-aiba.

² ǀGam tsēra khaoǃgâb ge nî ûi-ûi da; ǃnonaǁî tsēs aib ge nî ūkhâi da, tsî da ge ǁîb aiǃâ nî ûi.

³ A da ǂan, î da ôa-am ǃKhūba ǂansa; ǁîb di hās ge ǁgoaǂnobos khami a ǁaposa; ǀnanub khamib ge sada ai nî hā, ǃkhāǁaeb di ǀnanub, ǃhūba ra ǀâǀâb khami.”

ǃKhūb di ǃereams

⁴ “Efraimtse, tare-e ta kha nî dī-ū tsi? Judatse, tare-e ta kha nî dī-ū tsi? Sa ǀnammi ge ǁgoaǀnanu-i khami ī, ǀaub ǁgoaga ra khâib khami.

⁵ ǁNā-amaga ta ge ǁîna kēbo-aogu ǃnâ-u nî ǂnau; ti ams di mîdi ǃnâ-u ta ge ǁîna ge ǃgam tsî sa ǀgoraǃgâdi ge ǃnâ-i ase ība te tsî ra aiǃgûba te.

⁶ Tita ge hâhâ ra ǀnamma ǂhâba hâ, ǁguibadi âdu ose; Elob di ǂansa, khauǁguibadi ose.

⁷ “ǁÎn ge Adammi khami ǃgaeǀhaosa ge ǃûǂam; ǁnāpan ge tita ǀkha ǂgomǂgomsa tamase ge sîsen.

⁸ Gileads ge ǂkhababa ra sîsenn xa ǀoa hâ, ǁîs ge ǀaob ǀkha dā-aihe hâ.

⁹ ǁKhâuǁnâ-aogu ra khoe-e ǃâuǁgoe khamis ge pristergu ǂnubisa ī; ǁîgu ge Sexems daob ai ra ǃgam, ǁîgu ge taotaosa dīga ra dī.

¹⁰ Israeli ommi ǃnâ ta ge ui-uisa xū-e ge mû. Efraimmi ǀaib ge ǁnāpa hâ, tsîb ge Israela ǃanuoǃnâ kaisen hâ.

¹¹ “Sadu Judab didu ǃaromas tsînas ge ǃgaosa ǂnûihe hâ, tita ga ǃkhōsaben ti ǁaes dina oahā-ūo.”