Hosea 4 - Khoekhoegowab 2020

ǃKhūb di ǀhapiǂnûiǀkhās, Israeli ǃoagu

¹ Israelǁaese ǁnâu re ǃKhūb di mîsa, ǂnoagu-eb ǃhūb di ǁanǂgāsaben ǀkha ūhâ xuige. “ǂGomǂgomsasib, hâhâ ra ǀnammi tsî Eloba ǂans ge ǃhūb ǃnâ a ǀkhai.

² Nūs, ǂhumib, ǃgams, ǃnarib, ǃgamekhôas; nēn ge ī ra xūna, tsîb ǀaoba ǀaob xa ra saohe.

³ ǁNā-amagab ge ǃhūba nî ǂnâ tsîn ge ǁîb ǃnâ hân hoana nî ǁō; ǃgarob di xamarin tsî ǀgurun, ǀhommi di anin tsî ǁkhāti hoaraga ǁaun hurib din ge nî ūbēhe.”

ǃKhūb ge pristera ra ǀhapiǂnûiǀkhā

⁴ Xawe a-i tā khoe-e nau khoe-e ǀhapiǂnûiǀkhā, sadu on ǁnān hîa pristera ra ǀhapiǂnûiǀkhān khami ī xuige.

⁵ Sats ge tsēa nî ǃnôa tsîb ge kēbo-aob ona tsuxuba nî ǃnôa tsî ta ge tita sa îsa nî hîkākā.

⁶ Ti ǁaes ge ra hîkākāhe, ǂans ǃnubusib xa. ǂAnsats ǂhara hâ xui-ao ta ge tita nî ǂhara tsi pristersets tita ǃoaba tidese. Tsî Elob ǂhanubats ǀuru hâ ǃkhais ǃaroma ta ge sa ôana nî ǀuru.

⁷ “ǀArosen gu ra khami gu ge pristerga ti ǃoagu ra ǁore; ǂkhaisib âga ta ge taosib ǃnâ nî ǀkharaǀkhara.

⁸ ǁÎgu ge ti ǁaes di ǁoren ai ra ǂû; tsî gu ge ǃûǂamdi âna ra tura.

⁹ ǁAes ī khamib ge pristeri ona nî ī tsî ta ge daogu âb ai sari bi tsî dīgu âb ama nî mādawa-am bi.

¹⁰ ǁÎn ge nî ǂû, xawen ge ǁâ tide, ǀain nî xawen ge ǀarosen tide, ǃKhūba ǃkhōǀgaipesan ge ǁnāǃgâ amaga.”

ǃKhūb ge ǀūbe eloǃoabasa ra ǂhara

¹¹ ǃKhūb ge ra mî: “ǂAuxûi-i ge, nēsi i ga ǀasas, ǀoro i kas hoasa ti khoen ǁnâuǃāba ra ūbē.

¹² Ti ǁaes ra hais ân ai dî tsîs ǁgâibasenhais âna ǃereamsa ra mā. ǀAigagas ge ǁîna ge ǂgaeǂhapu tsîn ge ǀai-aosis ǃaroma ǁîn Eloba ge ǁnāxū.

¹³ ǃHomgu ǂamǃnân ra ǁguibade dī, ǃnâugu ai ǀanna, aikehaidi ǃnaka, populirhaidi ǃnaka tsî terpentinhaidi ǃnakab ge ǃgâi somma hâ. “ǁNā-amaga di ge sadu ôade ra ǀai tsî di ge ǃgametarade ra ǃgamekhôa.

¹⁴ Sadu ôade ta ge ǀai-aosis ǃaroma tsî ǃgametarade ǃgamekhôas ǃaroma ǀgoraǃgâ tide. Aorekhoegu ǂûgu ra ǀai-aodi ǀkha ūǂuisen tsî tempelǀai-aodi ǀkha ǁguiba; ‘ǁaes ǁnâuǃā tamas ge nî hîkākāhe.’

¹⁵ “Sadu Israeli didu ga ǀai xawen tā Judab dina ǀhapixa; î tā Gilgals ǁga ǃgû tsî Bet-Avens ǁga ǃgûǃapa tsî ‘ǃKhūb ûitsama ǃkhais ao’ ti nū.

¹⁶ Israeli ge ǃnâudanaxa tsâu-i khami a ǃnâudanaxa. Mâtib ǃKhūba nî ǃû kai, ǁkhao-i hara ǃkhai-i ai hâ-i khami?

¹⁷ Efraimmi ge ǁgôa-elogu ǀkha ǃgaeǁaresen hâ; ǁîba ǁnāxū re!

¹⁸ Ātoan ga on ge ra ǀai; ǁîn ge ǃgôaoǃnâsiba ǂkhaisib xa a ǀnam.

¹⁹ ǂOab ge ǁîna ǁgabogu âb ǃnâ ǁgaboǂgā hâ tsîn ge ǁguibadi ân xa ra tao.