Hosea 14 - Khoekhoegowab 2020

Hoseab ge Israela ra ǀkhoma

¹ Oahā re Israeli dido, ǃKhūb sadu Elob ǃoa. Sadu ǂhanuoǃnâsib ǃaroma du ge ǃnôa xuige.

² Mîde ūsao î ǃKhūb ǃoa oa tsî mî re: “ǂHanuoǃnâsib hoaba ūbē re, î ǀkhomxase ūǃoa da re, î da sida amǁgaugu ǂûtaniba mā tsi ǁkhā.

³ Asiriab ge sida sâu tide; hāgu ai da ge ǃgapi tide tsî da ge ǁkhawa ‘sida elogu’ ti ǃomgu âda di sîsenga mî tide. ǃGuniǀgôan sats xa ra ǀkhomxahe xui-ao.”

ǃKhūb ge Israela ǀasa ûiba ra mîmâiba

⁴ Nētib ge ǃKhūba ra mî: “ǁÎn di ǂhanuoǃnâsiga ta ge nî ǂuruǂuru, ti ǂgaob hoab ǀkha ta ge ǁîna māsenxase nî ǀnam; ti ǁaixasib ge ǁîna xu bē amaga.

⁵ Tita ge Israeli dina ǀaub ase nî ība; ǁîn ge leliǃkhās khami nî ǃkhā. Tsîn ge nî ǃnomaǃkhō, Libanonni di sederhaidi khami.

⁶ ǁÎn di ǂkham ǁnâugu ge ǀomkhâi tsî ǀkherahaidi khami nî ī. ǁÎs di ǂkhaisib tsî ǃgâi ǁamab âs ge Libanonni din xase nî ī.

⁷ ǁÎn ǁnā sommi ǃnâ ge ǁan hâ in ge nî oahā; ǁîn ge ǃhoroba nî ǀomkhâi kai, draibeǃhanab khami tsîb ge ǁamab âsa Libanonni di ǂauxûib xase nî ī.

⁸ Efraimtse, tare-e ta tita ǁgôa-elon ǀkha ǁae hâ? Tita ge ǃeream tsî ra kōǀî tsi ta. Hoaǁae a ǃam siprehais khami ta ge ī tita xus ge ǂûnats ra hōsa” tib ge ǃKhūba ra mî.

ǀUnis

⁹ Tari-e a gā-ai, tsî nē xūna ra ǁnâuǃā? Tari-e a ǁnâuǃāxa tsî nē xūna nî ǂanǃā? ǃKhūb di daogu ge a ǂhanu-ai tsîn ge ǂhanu-ai khoena ǁîgu ǃnâ ra ǃgû, xawe ǃûǂamaon ge ǁîgu ǃnâ ra ǁnā.