ǂHaiǂhais 4 - Khoekhoegowab 2020

ǀHommi ǃnâ hâ ǃoabas

¹ Nēn khaoǃgâ ta ge ǁkhowa-amsa dao-amsa ǀhommi ǃnâ ge mû. Tsîb ge ǁnā dommi xâiǁnâs khami ra ǀōb, ǀnai ge ǃhoa-ū te hâ iba, tita ǃoa ge mî: “Nēpa ǃapa hā re, o ta ge nēn khaoǃgâ nî īna nî ǁgau tsi.”

² Tsî ta ge ǁnātimîsi Gagab ǃnâ ge hâ. Tsî mû, tita ge tron-i ǀhommi ǃnâ hâ-i, khoe-i xa ǂnôa-aihe-e ge mû.

³ Tsî ǁnāpa ge ǂnôa ib di ais ge jaspis tsî sardiu ǀuira di ǂkhaiba ge ūhâ i tsî trons ǂnamipeb ge emeraldǀûba ūhâ ǀapiǃhanaba ge hâ i.

⁴ Tsî trons ǂnamipe di ge ǀgamdisihakaǀa tronde ge hâ i tsî gu ge ǀgamdisihakaǀa ǂnomdomgu,* ǃuri sarana ǂgaeǂgā tsî ǃhuniǀuri kronde danadi âgu ai ūhâga ǁîdi ai ge ǂnôa i.

⁵ Tronsa xub ge napagu tsî ǃgurub di ǀōb tsîna gere ǂoaxa tsî gu ge trons aiǃâ hû ǃamǀaega gere khau, ǁnāgu ge hû gagagu Elob diga.

⁶ ǁKhāti i ge trons aiǃâ xlāhurib ase ī xū-i, ǃgāsa ǁgamǁgamsa īsiba ūhâ-e ge hâ i. Hoa ǀkhākha trons dikha ǂnamipe gu ge haka ûitsama kurusabega* ge mâ i, aisǀkhāb tsî ǃgâbǀkhāb ai ge mûdi xa ǀoa hâ iga.

⁷ ǂGuro ûitsama kurusabeb ge xammi khami ge ī i, ǀgamǁîba tsâub khami, ǃnonaǁîb ge khoe-aisa ge ūhâ i tsî hakaǁî kurusabeb ge ǁkhana ra ǃariǃkhās khami ge ī i.

⁸ ǁÎgu ge mâb hoaba ǃnani ǁgabogu, ǃnakab tsî ǀgapikab tsîkha ai mûdi xa ǀoa hâga ge ūhâ i. ǁÎgu ge tsēb tsî tsuxuba ǀû tamase nēti gere ǁnae: “ǃAnu, ǃanu, ǃanub ge ǃKhūb Elob, Hoaǀgaixab, hâ ge ib, hâ ab tsî hā nîba.”

⁹ Tsî gu ge nē ûitsama kurusabega ǂkhaisib, ǃgôasib tsî gangantsanade ǁnāb, trons ai ǂnôaba gere ǁnaeba, ǁîb ǀamosib kōse ûi hâba.

¹⁰ O gu ge ǀgamdisihakaǀa ǂnomdomga ǁnāb, trons ai ǂnôab aiǃâ ǁnāǁgoe tsî ǁîb, ǀamosib kōse ûi hâba ge ǀgoreǀî. ǁÎgu di kronde trons aiǃâ ǂnûi tsî gu ge ge mî:

¹¹ “Sida ǃKhū tsî Elotse! Sats ge anu ǂkhaisib, ǃgôasib tsî ǀgaib tsîna ǃkhōǃoasa. Sats ge hoaraga xūna kuru xui-ao, tsî sa ǂâisa xun ge ge kuruhe tsî hâ.”