ǂHaiǂhais 15 - Khoekhoegowab 2020

ǀUniga hû tsûtsû-aidi

¹ Tsî ta ge ǀnî kai tsî buruxa sao-e ǀhommi ǃnâ ge mû. Hû ǀhomǃgāga, hû tsûtsû-aidi, ǁîdi ǀunigadi, ǁîdi ǃnâb Elob di ǁaiba ra toa di ǀkha.

² Tsî ta ge xlāhurib hîa ǀaes ǀkha habasab khami ī xū-e ge mû. Tsî ta ge ǁkhāti ǁnān hîa ǀgurub tsî ǁîb di īb tsî ǁîb ǀons di ǃgôasa ge danna xlāhurib ai Elob di harpde ūhâse ge mûmâ.

³ ǁÎn ge Elob di ǃgāb Moseb tsî ǁKhaob di ǁnaetsanasa gere ǁnae: “ǃKhū, Elo Hoaǀgaixatse mâtikōse gu sa sîsenga kai tsî buruburuxa! Gao-aots ǃhaodi hoadi ditse, ama tsî ǂhanu-ai gu ge sa daoga!

⁴ Tari-e satsa ǃao tsî sa ǀonsa ǂkhaiǂkhai tide, ǃKhūtse? Sats ǀguits ge ǃanu. Tsî di ge hoaraga ǁaede hā tsî satsa nî ǀgoreǀî, sa ǂhanu-ai sîsengu hoana a ǂhaisaba amaga.”

⁵ Nēs khaoǃgâ ta ge Tempeli hîa ǀhommi ǃnâ hâb, Elob di Tentommi a ǁkhowa-amsa ǃkhaisa ge mû.

⁶ Hû ǀhomǃgāgu, hû tsûtsû-aide ūhâgu ge ǃanu, ǂkhai ra saraba ǂgaeǂgāhe hâse tsî ǃhuniǀuri ǃgaesenga ǁkhaigu ai ǃgae hâse Tempela xu ge ǂoaxa.

⁷ Ob ge haka ûitsama kurusabegu di ǀguiba hû ǀhomǃgāga hû ǃhuniǀuri ǃoredi Elob, hîa ǀamosib kōse ûi hâb di ǁaib xa ǀoa hâde ge mā.

⁸ Tempeli ge Elob di ǀgaib tsî ǂkhaisib di ǀanni xa ge ǀoa tsî-i ge khoe-i xare-e Tempeli ǃnâ ge ǂgâ ǁoa i, ǁnā hû tsûtsû-aidi, hû ǀhomǃgāgu xa ǀkhī-ūhedi nî toas kōse.