ǀGapiǁnaetsanas 8 - Khoekhoegowab 2020

¹ Ae, ots ga ǁnâi ti ǃgâsa i, ti îs di samsa ge daitsa î ta ǃauga ta ga ǀhao-ū tsi xawe ǁoa tsi, în ga khoena tā ǃharaxū te.

² O ta ge ti îs oms ǁga ūsao tsi ǁkhā tsîts ge ǁkhāǁkhā te ǁkhā tsî ta ge ǁnāpa ti ǀnamma tsâtsâ kai tsi ǁkhā.

³ ǁÎb di ǁareǀkhāb ǁôab ai ta ge ǂkhapi hâ tsîb ge ǁîb amǀkhāb ǁôaba ǁnamǂgā te hâ.

⁴ Jerusalems ǀgôaso, ǂgan so ta ge ra î so tā ǁaeb aiǃâ sim ǀnamma ǁara.

ǃNaniǁî ǁnaetsanas Tarekhoedi

⁵ Tarisa ǁnā ǃgaroǃhūba xu ǃgoaxas, ǀnamsab âs ai ǃkhōbasen hâsa? Apelhais ǃnaka, sa îs ge ǁora tsipa ǁnāpa ta ge ge ǂkhaiǂkhai tsi.

Tarekhoes

⁶ ǂGanamxūs khami sa ǂgaob ai ǂgā te re ǂganamxūs ase ǁôab âts ai; ǀnammi ǁōb khami a ǀgaisa tsîb ge ǁŌhân Hâǃkhaib khami tauxa. ǀAes ǁhabub khami ra ǁhabu, khau ra ǀaes dib khami.

⁷ ǂGui ǁgamgu ge ǀnamma a ǀari ǁoa tsî ǃāgu ge a dâuǂam bi ǁoa. Tsî i ga khoe-e hoaraga ǃkhūsib oms â-i dib ǀkha ǀnamma ǁama ǂgao o-i ge khoen xa nî ǃharaxūhe.

Tarekhoes di ǃgâsagu

⁸ Sige ge ǂkham ǃgâsaros, noxopa samra ūhâ tamasa ūhâ. Mâti ge sige ǁnâi nî dī ǁîs ga dî-amhe tsēs ai?

⁹ ǁÎs ga ǂnubiǂgoa hâ o ge ge ǁîs ai ǀhaiǀuri ǂgō-omma ga ǂnubi hâ. Dao-ams ga hâ o ge ge sederǃnaogu ǀkha ǁîsa ga ǂganam hâ.

Tarekhoes

¹⁰ Tita ge a ǂnubiǂgoa tsî ra ge ti samra ǂgō-ommi khami ī. Tsî ta ge ti ǀnamsab mûǁae ǂkhîba ra hōs ase ī.

Aorekhoeb

¹¹ Salomob ge draibeǃhanaba Baal-Hamons tawa ge ūhâ i tsî nē ǃhanaba ǁamaǀkhupi-aona ge mā. Mâ-i hoa-i ge ǁî-i ǂûn ǃaroma ǀoadisi ǀhaiǀuri marina nî matare.

¹² Xawe ti draibeǃhanab, ti aiǃâ hâb ge a ti tsî ǀguiǀoadisi ǀhaiǀuri marin ge a sa, Salomotse tsî di ge ǀgamkaidiside ǁnān hîa ǁîn ǂûna ra ūhân di.

¹³ Sas ǃhanagu ǃnâ ra ǃgûmas, ti ǀhōsagu ge ra ǃgâ si xuige ǃhoa-ū te re.

Tarekhoes

¹⁴ Ti ǀnamsatse ǃhaese tita ǃoa hā re, ǀgae-i tamas ka io ǁgûro-i ǃgâihamxūn ǃhomgu di-i khami.