ǀGapiǁnaetsanas 6 - Khoekhoegowab 2020

Tarekhoedi

¹ Mâǀîb kha ǁnâi sa ǀnamsaba ǃgû hâ tarekhoedi ǁaegu îsabese? Mîba se re mâ ǀkhābǀîb go sa ǀnamsaba ǃgûsa, î se ǁîba sas ǀkha ôa.

Tarekhoes

² Ti ǀnamsab ge ǃhanab âb ǁga go ǁgôa; ǃgâihamxūn ǃhanab ǁga. ǃHanab ǃnâ ǃû tsîb lelina nî ǀhaoǀhaose.

³ Tita ge a ti ǀnamsab di tsî ti ǀnamsab, lelin ǁaegun ǀgoan âba ra ǃûb ge a ti.

Aorekhoeb

⁴ Ti ǀhōsase sas ge Tirsas khami îsa, Jerusalems khamis ge ǀnamǀnamsa tsî ǂnubidi, ǃkhaugu ǀkha hâdi khami a ǀgaisa.

⁵ Sa mûra tita xu ūbē ǁîra ra tita ǀgomaǂâi kai xuige. Sa ǀûn ge piridi Gileadǃhomma xu go ǁgôaxadi khami ī.

⁶ ǁGûdi âs ge ǀase go ǁāhetoa ǃuri gūdi, hoadi hîa ǀgēna ūhâdi, ǀguis âdi tsîn ǀgôao tamadi khami ī.

⁷ Sa Tempeli ge ǀhāb di ǃgâbǀkhāba xu ǃkharese ǃgaohe hâ xranatǂûs khami ī.

⁸ ǁNāpa di ge ǃnanidisi gaodi, ǁkhaisadisi xōǀkhātaradi tsî ǃgôaheǁoasa ǂgui ǃgôab di ǂkham khoede hâ.

⁹ Xawes ge ti ǂnabus, ti dīǀoaǀoasa ǀgui tarekhoes ǀguisa hâ ǁgûs di ǀgui ǀgôas, ǁnās ǁîsa ge ǁoras di ǃanu ǀgôasa. ǁÎsa ra mû ǂkham khoedi hoadi ge ǁîsa ǀkhaehesas ti ra ǂgai. Gaodi tsî xōǀkhātaradi ge ǁîsa ra koa.

¹⁰ Tarisa kha ǁgoaǀgamiros khami ra kōǁnâs, ǁkhâb khami îsa, sores khami ǃanu tsî ǃkhaugu ǀkha hâ ǂnubidi khami a ǀgaisasa?

¹¹ Nietǃhanab ǃoa ta ge ra ǁgôa, ǃam ǁhaon ǃgoaǃnāb dina nî sī kōse. Draibeǃhanab ǁhare hâ, tsî xranatǂûn di ǃkhādi ǂoaxa hâ ǃkhaisa nî mûse.

¹² ǀŪ ta a hîas ge ti ǀomsa ti khoen di gaokunis ai ge ǂnûihe.

Tarekhoedi

¹³ Oahā re, oahā re Sulamǁîse Oahā re, oahā re, î se kō si. Tare-i ǃaroma so Sulamǁîs ra ǀgam ǃgubira ǁaegu ǂnā ǀgausa nî kō?