ǀGapiǁnaetsanas 5 - Khoekhoegowab 2020

Aorekhoeb

¹ Tita ge ti ǃhanab ǃoa go hā ti ǀnamsase. Ti mireba ta ge ti ǃgâihamxūn ǀkha go ǀhaoǀhao; tita ge ti danib tsî daniǂnaoba ra ǂû; ti ǂauxûib tsî daiba ta ra ā. ǀNamsago ǂû î go ǁâ, ā, ǀnammi xa go nî ǀhoros kōse!

Tarekhoedi Tarekhoes

² Tita ge ge ǁom hâ i xaweb ge ti ǂgaoba ǂkhaikari ge hâ i tsî ta ge ti ǀnamsab ra dao-ams tawa ǃgubu ti ge ǁhapo. A ta ǂgâ re ti ǀnamsase, ti ǀhōsase, ti ǂnabuse, ti ǂnao-ose. Ti danas ge ǀaub xa go ǀâ ti ǀûn ge tsuxub di ǀaub xa ǀâ.

Aorekhoeb Tarekhoes

³ ǀNai ta ge ti anaǂamsaraba go ǂgaeǂui mâti ta ǁkhawa nî ǂgaeǂgā bi? ǀNai ta kom go ǁānǂaio, mâti ta ǁkhawa ti ǂaira nî ǀuriǀuri?

⁴ Ti ǀnamsab ge ǃommi âba ās ǃnâ ge ǂgā ob ge ti ǃnākhoesiba ǁîb ǃaroma ge gon.

⁵ Tita ge ti ǀnamsaba nî ǁkhowa-ambase ge khâi. Mireb ge ti ǀkhunuga xu gere ǂnâ, dao-ams di ǃkhō-aixūsa ta ge ǃkhō-o.

⁶ Dao-amsa ta ge ǁkhowa-amba bi xaweb ge ti ǀnamsaba ǃaruǀî ǁnāpa xu dabasen tsî ge ǀkhai i. ǁÎb ge dabasen ǃkhais xas ge ti ǀomsa ge ǃoa tsî ta ge ge ôa bi, xawe ta ge hō bi tama ge i; ǂgai bi ta ge, xaweb ge ǃeream tama ge i.

⁷ ǃĀsa ra ǃgûmaǃnâ ǃûi-aogu ge hō te tsî ǂnau tsî ge tsui te; nē ǃûi-aogu ge ti anaǂamsaraba ge ǂgaeǂuiǀkhā te.

⁸ ǀKhoma so ta ge ra Jerusalems ǂkham khoeso ti ǀnamsaba so ga hō, o mîba bi re ǁîba ta ūba hâ ǀnammi xa ta ra ǂkhabu ti.

Tarekhoedi

⁹ Mâtib sa ǀnamsaba naugu ǃgâ-ai ǀnamǀnamsa, tarekhoedi ǃnâ îxa khoese? Tare-i ǁîb di-e ǁnātikōse a ǀō-aisa ǁî-i ǃaromas sise ra ǀkhoma-e?

Tarekhoes

¹⁰ Ti ǀnamsab ge îxa tsî a ǂuru; disiǀoadisigu ǃnâ ǃkhōǂuisaba.

¹¹ Danas âb ge a ǃhuniǀuriǀgui, ǃūmû ǃhuniǀuriba. ǀÛn âb ge ǂgomasen hâ tsî gorab khami a ǂnū.

¹² Mûra âb ge ǂnaidi, ǁgamǃāb tawa hâdi dai-i ǃnâ ǁāsen hâdi khami ī.

¹³ ǁÎb xōra ge ǃhanab, ǃgâihamxūn dib khami ī. Tsî amǁgaukha âb ge leliǃkhā-i ǁî-e xub mireba ra ǂnâ-i khami ī.

¹⁴ ǁÎb ǃomkha ge ǃhuniǀurib, krisolitǀuide ǂgāǃnâhe hâb khami ī. Tsî soros âb ge safirǀuidi ǀkha anisa ǂkhoaǁgûb khami ī.

¹⁵ ǀNūkha âb ge marmerǂkhâǃnâkha ǃūmû ǃhuniǀuri ǂaidi ai ǃgaoǃgaosakha khami ī. ǁÎb ai-īsib ge Libanonni khami ī ǃkhōǂuisaba, sederhain khami.

¹⁶ Ams âb ge a ǂkhon khoesib âb ge turahesa anu; ǁNāb ge ti ǀnamsab, ti ǀhōsaba Jerusalems ǂkham khoeso.