ǀGapiǁnaetsanas 4 - Khoekhoegowab 2020

Aorekhoeb

¹ Mâtikōses a îsa, ti ǀnamsase! Sa mûra ge ǂnabura, ǀhāb ǃgâb ai ra ǂkhaira. ǀÛn âs ge pirin, Gileadǃhommi tawa ra ǂgamǁgôaxan khami ra ǂnā.

² Sa ǁgûdi ge ǀase go ǂkhomhe gū-i, ǁāhetoa tsî ǃgoaxa-i khami ī. Mâ-i hoa-i ǀgēna ūhâ; tsî-i ǀgui-i tsîna ǀgôao tama.

³ Sa amǁgaukha ge skarlakǀapa ǁapa-i, ǃhoas kao kaise îsa-i khami ī. Sa ams ge îsa tsî ǃgâbǀkhāba xu, ǃkharese ǃgaohe hâ xranatǂûs khami ī.

⁴ Sa ǃaos ge Davidi di ǂgō-ommi, ǂgâǃnâgu ra ǀuidi ǀkha ǂnubisab ǁîb ain ǀoadisi ǀgaisa khoegu di ǁâtanina ra ǂgāmâiheb khami ī.

⁵ Samra âs ge ǀgam ǁgûron ǀgaes di ǀgēron, leliǃkhādi ǃnâ ra ǃûn khami ī.

⁶ Tsēs nî ǃnâ tsî gu somga nî ǂgōs kōse ta ge nî ǃgû miren di ǃhommi kōse tsî ǃgâihamxūn di ǃnâus kōse.

⁷ Sas ge hoaragase a îsa, ǂnao-i xare-i ge sa ǃnâ a ǀkhai.

⁸ Tita ǀkhas ge Libanonna xu nî hā, ti ǀnamsase Libanonna xus ge tita ǀkha nî ǁgôaxa; Amanaǃhommi di ǂaoba xu tita ǀkha ǁgôaxa; Senirǃhommi tsî Hermonǃhommi di ǂaoba xu, xamgu ǁanǃkhaide xu tsî ǀgarugu di ǀgapi ǁgoeǃkhaide xu.

⁹ Ti ǂgaobas ge go ǃnari ti ǀnamsase ti ǂgaobas ge ǀgui ǃnās di kōs ǀkha go ǃnari, ti ǀnamsase; sa ǃaos ai hâ ǁgāxūb di ǀgui khedeb ǀkha.

¹⁰ Mâtikōseb a îsa sa ǀnamma ti ǀnamsase, ae ti ǀnamsase! Mâtikōseb a ǃgâi sa ǀnamma ǂauxûi-i ǃgâ-ai tsî sa ǁamaba hoaraga ǃgâihamxūn ǃgâ-ai.

¹¹ Sa amǁgaukha xub ge daniba ra ǂnâ, ti ǀnamsase. Danib tsî daib tsîkha sa nammi ǃnakaba xu; tsî ǁamab sa anaxūn diba Libanonni dib khami.

¹² Ti ǃgâsas, ti ǀnamsas ge a ǁgâuǂnamisa ǃhana, ǂganamsa ǀaus, ǂganamǁapoǁaposa ǀausa.

¹³ Sas ge paradys ǃhanab, xranatǂûn, narduba ra hamn khami ī.

¹⁴ Nardub tsî safranǁnuib, kalmus-i tsî kanel-i hoaraga ǃgâihamhaide mireb tsî aukoreb ǀkha hoaraga ǃkharaga ǃgâihamxūn ǀkha.

¹⁵ Sas ge ǀausa ǃhanagu ǃnâ tsaus, ûitsama ǁgammi, Libanonǃhomga xu ra dâuǁgôaxab disa.

Tarekhoes

¹⁶ ǂKhai re, ǀApas ǂoatse î hā re, ǃKhawagas ǂoatse Ti ǃhanab ai ǃgom îb ǃgâihamxūn ǁamab âba dâuǂoa, îb ti ǀnamsaba hā ǁîb ǃhanab ǃoa tsî ǂû re ǃkharagaǃnâgu ǂûn âba.