ǀGapiǁnaetsanas 3 - Khoekhoegowab 2020

¹ Tsuxuba ta ge ti kharob ǃnâ ǁnāb ǀnam ta aba ǁhapo tsî ge ôa; xawe ta ge hō bi tama ge i.

² Tita ge khâi tsî ǃāsa ge ǃgûǃnâǃganu ti ǀnamsaba ra ôase. ǁÎba ta ge ôa xawe ta ge hō bi tama ge i.

³ ǃÛi-aogu ǃāsa ra ǃûigu ge ǃās ǃnâ gu ra ǃgûma hîa ge hō te. O ta ge ǁîga ge dî: “ǁNāb, ǁîba ta ǀnam hâba go mû tama hâ?”

⁴ ǁÎga xu ta ra ǃkharu hîa ta ge ǁnāb ǀnam ta hâb ǀkha ge ǀhao. ǁÎba ta ge ge ǁnam, tsî ǁnāxū bi tama ge i. Ti îs oms tawa ta ge ge hā-ū bi tita ge ǃnaeǃnâ ǃnā-oms ǃnâs kōse.

⁵ Mîmâiba te re Jerusalems khoeso nū re ǀgaen tsî ǁgûn tawa sim ǀnamma so toa tamab hâ hîa ǁara tidesa.

ǃNonaǁî ǁnaetsanas Tarekhoes

⁶ Tare-e ǁnā ǃgaroǃhūba xu ǃgoaxa-i, ǀanni khami ī-i, mireb tsî ǃgâihamxūn, ǁamaǂharugu-aob din ǀkha hamhamhe hâ-e?

⁷ Salomob di sâ-aikharob ge ǁnāba, ǃnanidisi toroǃkhamaogu, Israeli ǀgaisagu digu xa tanihe hâse.

⁸ Hoagu ge gôagu ǀkha ǁâtanisen hâ toroǃkhamaogu, torodī ǁkhāga. Mâb hoab kamanab âb ai gôaba ūhâga tsuxub di ǁnāǂamdi ǃoagu.

⁹ Gao-aob Salomob ge Libanonni hain ǀkha sâ-aikharoba ge kurubasen.

¹⁰ ǀHaiǀurib ǀkhab ge ǂkhâǃnâga ge dī; ǃgâsenǃkhaib ge ǃhuniǀurib ǀkha ǃkhûǀkhāhe hâ. Tsî di ge ǂkhapide ǂhoaǀapa ǃkhai-i ǀkha îsase Jerusalems tarekhoedi xa ge ǂgapuhe hâ i.

¹¹ Sions khoeso, ǂoaxa î so gao-aob Salomoba mû re. ǁÎb ge ǃgameb ge tsēs, ǁîb di ǃgâiaǂgaob tsēs ais ge ǁgûsa ǀgapa bi kronsa danas âb ai ūhâ.