ǀGapiǁnaetsanas 2 - Khoekhoegowab 2020

¹ Tita ge Sarons di ǃkhāta ǃgoaǃnāgu di lelita.

Aorekhoeb

² Lelis ra ǁkhūn ǁaegu mâǂoa khamis ge ti ǀnamsasa khoedi ǁaegu ra mâǂoa.

Tarekhoes

³ Apelhais ra ǃgarob hain ǁaegu mâǂoa khamib ge ti ǀnamsaba ǂkham khoegu ǁaegu ra mâǂoa. ǁÎb sommi ǃnâ ǂnûsa ta ge ra ǁkhore tsî ǂûn âb ge ti namǃhanaba a ǂkhonba.

⁴ ǁÎb ge tita ǂauxûib di oms tawa hā-ū tsî ǀnammi âb ǀkha ge ǃgū-ai te.

⁵ Rosainjin ǀkha ǀgaiǀgai, î apeln ǀkha ǀasaǀasa te re, ǀnammi xa ta ǀaesen hâ xuige.

⁶ ǁÎb ǁareǀkhāb ǁôab ge ti danas ǃnaka hâ tsî amǀkhāb ǁôab âb ge ǁnam te hâ.

⁷ Mîmâiba te re Jerusalems khoeso nū re ǀgaen tsî ǁgûn tawa sim ǀnamma so toa tamab hâ hîa ǁara tidesa.

ǀGamǁî ǁnaetsanas Tarekhoes

⁸ Ti ǀnamsab di domma ta ge ra ǁnâu. ǁÎb ge ǃnâugu ai ra urise tsî ǃhomgu ai ra ǂgamse ǃkhoeǃgoaxa.

⁹ Ti ǀnamsab ge ǀgae-i khami ī; ǁgûdi di ǂkhamro-i khami. ǁNāb ge ǂnubiǂgoab xōǀkhā mâ, mûǂuidaodi ǃnâ kō tsî tralidi ǃnâ-u ra ǂuise.

¹⁰ Ti ǀnamsab ge ra ǃhoa-ū te. Hā re, ti ǀnamsase, ti îsabese.

Aorekhoeb

¹¹ Saoǁaeb ge go ǃkharu; ǀnanub ge go ǀapiǀû;

¹² ǃgarob ǃnâ di ge ǃkhāde ra ǃkhā. Nēb ge ǁnaes ǁaeba tsîb ge ǂnabun ǁnaeba ǃhanagu ǃnâ ra ǁnâuhe.

¹³ ǀNomahais di ǂguro ǂûn ge ra ǁantsoatsoa tsî ǂoab ge draiben di hammi xa ǀoa hâ xuige hā re ti ǀnamsase, ti îsabese tita tawa hā re.

¹⁴ Sas ge ǂnabus ǃhaob di ǁhāb ǃnâ ra gaus khami ī. A ta ais âsa mû tsî ǃgâise ra ǀō dommi âsa ǁnâu re.

¹⁵ ǀGirina ǃkhō, ǀgirirona sam di îxa draibeǃhanagan nî hîkākās aiǃâ ǃkhō.

Tarekhoes

¹⁶ Ti ǀnamsab ge a ti, tsî tita ge ǁîb di. ǁÎb ge ǀgoan âba lelin ǃnâ ra ǃûsi

¹⁷ ǁgoaǂoab ra sauǀau tsîb ǃkhaeba ra bēs kōse. Ti ǀnamsase, oahā re ǁgû-i khami, ǂkham ǁkhama-i Beters ǃhomgu ai hâ-i khami.