ǀGapiǁnaetsanas 1 - Khoekhoegowab 2020

¹ ǁNaetsanadi xas ǁîsa a îsa ǁnaetsanas Salomoba xu hâs.

ǂGuro ǁNaetsanas Tarekhoes

² As sa amsa tita ǁoa, sa ǀnammi ǂauxûi-i ǃgâ-ai a ǃgâi xuige.

³ Sa ǃgâihamxū-i di ǁamab ge a ǃgâi, tsî sa ǀons di ǀōb ǁnâuheb kao ǃgâi ǁamaba ra mā xui-ao di ge ǂkham khoede a mâǃoa tsi ǁoa.

⁴ Ūsao te re, îm ǃkhoe ti gaose ī, î sa ǃnā-oms ǃoa ū te. Am sats ǃnâ ǃgâiaǂgao tsî dâǀhao. Sa ǀnammi ǂauxûib ǃgâ-ai a ǃgâi xui-ao di ge hoaraga ǂkham khoede a ǀnam tsi.

⁵ Jerusalems khoeso, ǂnū tsî ta ge a îsa Kedars tentomdi khami, Salomob gao-ommi di mûǂuidaolapigu khami.

⁶ Tā ti khōb di īsib ǃaroma mûǃhara te sores ge khau te xuige. Ti ǃgâsagu ge tita ǁaixaǂam tsî draibeǃhanab ǃûi-aose ge mâi. Tsî ta ge ti draibeǃhanaba ǃûis tsîna ǁae-e ūhâba tama ge i.

⁷ Mîba te re ti ǀnamsatse, mâpats gūn âtsa ǃûn nîse nî ǂgaeǂguisa? Mâpan ǁîna tsēǃgâǁaeb ai nî sâ? Tare-i ǃaroma ta kha sa ǃûi-aohoresagu aiǃâ, ǃgū-aisen hâse satsa nî ôa?

Aorekhoeb

⁸ Os kha mâpas asa a ǀū, sas, tarekhoedi hoadi ǃgâ-ai a îsasa? O ǁnâi gūn ǂaib ǃnâ ǃgû, î piriron âsa ǃû kai re ǃûi-aogu di hâǃkhaidi ǀgūse.

⁹ Ti ǀhōsase, sas ge Faraob gaokunidi ǃnâ ǂgāǃaohe hâ hā-i khami ī.

¹⁰ Sa xōra ge ǂgaerara ǁaegu a îsa tsî ǃaob âsa anixūn ǁaegu.

¹¹ Sida ge ǃhuniǀuri anixūn, ǀhaiǀurib ǀkha anisana nî kuruba si.

Tarekhoes

¹² Ti gao-aob sâ-aikharob âb ai ǁgoe hîab ge ti narduba ǃgâi ǁamaba ra mā.

¹³ Ti ǀnamsab ge tita mireǃgaeǀkhā-i, ti samra ǁaegu ǁgoe i ase ība.

¹⁴ Ti ǀnamsab ge ǃgâise ra ham ǃkhā-i Engedis draibeǃhanagu ǃnâ hâ-i khami ība te.

Aorekhoeb

¹⁵ Mâtikōses a îsa, ti ǀhōsase; mûdi âs ge ǂnabu-i didi khami ī.

Tarekhoes

¹⁶ Mâtikōsets a îsa, ti ǀnamsa; tsîts tita ra ǃgâiaǂgao kai. ǃAm ǀgâb ge a sam di ǁgoeǃkhai.

¹⁷ Sam oms di ǂamǃnâb ge a sederhai, sipreshaigu ǀkha ǁguiǂamǃnâhe hâba.