Esekiel 4 - Khoekhoegowab 2020

Esekieli ge Jerusalems ǃkhōsisa ra dīǂui

¹ Tsî satsa khoenôa ǀgôatse, ǂnubiǀuisa ū, î sa aiǃâ ǂnûi. ǁÎs ǃnâ ǃās Jerusalemsa xoaǂgā;

² îts ǁkhaubasens di ǁaposa ǃkhaiga ǁîs ǃoa-ai ǂnubi, îts ǂnubiǂgoaba ǁîs ǃoa-ai ǂnubi tsî toroǂnubi-e ǁîs ǃoagu ǂgaikhâi, îts ǂkhūǂkhūǃnaoga ǁîs di ǂnamipe ǁgui.

³ Îts ǀuripanna ū, îts sats tsî ǁnā ǃās tsîro ǁaegu ǀuriǂnubiǂgoaba ǂnubimâi. Îts ais âtsa ǁîs ǁga ǃoa, îs ǁîsa xāǂgās ǃnâ hâ, sats xāǂgā si hâ xui-ao. Nēs ge Israeli omma saos ase nî ība.

⁴ “ǁNās khaoǃgâ sa ǁareǀkhāb ǃnammi ai ǁgoe, tita ge Israeli ommi ǁkharaba sats ai nî ǁgui. ǁÎn di ǁkharabats ge ǁîb aits ǁgoe tsēdi hoade nî tani.

⁵ Mâtikō tsēdi asa ta ge nî ǁgui-ai tsi, ǃnonakaidisi tsî khoesedisi tsēdi, hîa ǁîn di ǁkharab di kurigu ǀkha a ǀguitikōde; tsî ǁnātits ge Israeli ommi ǁkharaba nî tani.

⁶ Nēsats ga dītoa, ots ge ǁkhawa ǀgamǁî ǃnāsa nî ǁgoe, xawe sa amǀkhāb ǃnammi ai tsî Judab ommi ǁkharaba nî tani. Hakadisi tsēde ta ge ra ǁgui-ai tsi, ǀgui tsēsa mâ kurib hoab ǃaroma.

⁷ “Sa aisats ge Jerusalems xāǂgās ǁga nî ǃoa kai tsîts ge ǀkhaiǀkhā ǁôab ǀkha ǁîs ǃoa-ai nî kēbo.

⁸ Mû, tita ge tsuriga sats ai nî ǁgui, îts tā nē ǃnamma xu naub ǁga dabasen ǁkhā, sa tsēdi xāǂgās didi nî toas kōse.

⁹ “Satsa ǃhorob, gerstǃhorob, bonkin, lensinn, mahangu-i tsî ǀkhoaǃhorob tsîna ū, î ǀgui xapas ǃnâ tsoroǀhao, î ǁnāpa xu pere-e ambasen. Sa ǁareǀkhāb ǃnammi aits ǁgoe tsēdi hoade, ǃnonakaidisi tsî khoesedisi tsēdets ge ǁî-e nî ǂû.

¹⁰ Tsēs ǃnâts nî ǂû ǂûn ge ǀgamkaidisi tsî ǃnonadisi xramgu di ǃgomma nî ūhâ, tsîts ge mîǁguisa ǁaegu ai ǀgui ǁî-e nî ǂû.

¹¹ ǀNōǁnâsa ǁgam-i ǀgui-ets ge nî ā, mîǁguisa ǁaegu ai ǀgui, ǀgam āǃnâxapara ǀguira di-e.

¹² ǁÎ-ets ge gersttsampere-i ase nî ǂû, tsîts ge ǁîn mûǁae, ǁî-e ǂnâsa khoexaub ai nî am.”

¹³ ǃKhūb ge ge mî: “Nē ǀgaub ain ge Israelǁîna ǁîn pereba ǀurisase nî ǂû, ǁnā ǁaedi ǁîn ǃoa ta nî ǁîna doeǁgadi ǁaegu.”

¹⁴ O ta ge tita ge ǃeream: “Okha ǃKhū Elotse, tita ge tātsēs tsîna ge ǃanuoǃnâ kaisen tama hâ i; ti ǂkhamsisa xu nēsis kōse ta ge aitsama ge ǁō xū-i tamas ka io xamari-i xa ǀkhauǃāhe hâ xū-i tsîna ge ǂû tama hâ i. Ui-uisa ǁgan-i xare-e ta ge ti ams ǃnâ ge ǂgā tama hâ i.”

¹⁵ Ob ge Eloba tita ǃoa ge mî: “Mû, tita ge ǂnâsa khoexaub ǃās ǃnâ ǂnâsa gomaxaub ai sa pereba nî aiǂhomi kai tsi.”

¹⁶ ǁÎb ge ǃaruǀî tita ǃoa ge mî: “Khoenôa ǀgôatse, tita ge Jerusalems ǃnâ pere-i di amhesa nî ǀam kai. ǁÎn ge pere-e ǃgommi tsî ǃaob ǃnâ nî ǂû tsî ǁgam-e ǀorosib tsî burugâs ǀkha nî ā.

¹⁷ Pere-i tsî ǁgam-i di ǀorosib xan ge burugâs ǀkha nî kōgu tsîn ge ǁîn ǁoren ǃaroma nî ǃâǁō.”