Amos 3 - Khoekhoegowab 2020

¹ ǁNâu re Israelǁîdo nē mîs ǃKhūb sadu ǃoagu ra mîsa; sadu Egipteba xu ta ge ǂgaeǂguiǂui ǁaes didu hoado.

² “Sadu ǀguido ta ge ǃhūbaib di ǁaedi hoade xu ge ǁhûiǂui, ǁnā-amaga ta ge sadu di ǁoren hoan ǂama nî ǁkhara du.”

Kēbo-aob di ǁguiǂams

³ ǀGam khoena ǀguipa ǃgûn nî, ǁnāsan ga ǁnâugu tama io?

⁴ Xamma kha ǃgurub nî ǃaub ǃnâ, amǀnē-eb ga ǃkhō tama io? ǂKham xamma kha ǁîb hâǃkhaisa xu ǃgurub nî, xū-eb ǃkhō tama hîa?

⁵ ǀHomani-e ǃhūb ai ǁnoas ǃnâ ǃkhōhe i nî, ǁnoa-i ga ǁî-i ǃaroma ǀkhaio? ǁNoasa ǃhūba xu ǃaekhâis nî, xū-es ǃkhō tama hîa?

⁶ Xâiǁnâsa ǃās ǃnâ xâihes nî, khoenas ǃhuri kai tamase? ǃĀsa ǂōǂōsi-i xa hāǂamhes ra, ǃKhūb ga ǁnāsa ī kai tama io?

⁷ ǃKhūb Elob ge tātsē xū-i xare-e dī tama hâ, ǁîb di ǃgāgu kēbo-aogab ǁîb ǀapesa ǂanǂan tamase.

⁸ Xammi ga ǃguruo, tari-e ǃao tide? ǃKhūb Elob ga ǃhoao, tari-e kēbo tide?

Samarias di hîkākāhes

⁹ Nē ǃkhaisa Asdods di gao-omgu tsî Egipteb di gao-omgu ǃnâ ǂanǂan: “Samarias ǂnamipe ǁgoe ǃhomgu ai ǀhao, î kai ǀgomaxasib tsî ǁgâiǀāb ǁîs ǃnâ hâba mû re.”

¹⁰ ǃKhūb ge ra mî: “ǁÎn ge ǂhanuse dīs tsîna a ǀū. ǁÎn ge ǂkhabadīb tsî ǁkhâuǁnâs ǀkhan ge hō xūn ǀkha ǁkhui-omgu âna ra ǀoaǀoa.”

¹¹ ǁNā-amagab ge ǃKhūb Eloba ra mî: “Khākhoeb ge ǃhūba nî ǃnamiǂgā tsî sa ǀgaisa ǂnubiǂgoaga khôaǁnâ tsî sa ǁkhui-omga nî ǃnariǂuiǃnâ.”

¹² Nētib ge ǃKhūba ra mî: “ǃÛi-aob ra xammi amǃnâba xu ǀnūkha kas, ǂgaes ǃâro-i kas hoasa ores ǁkhās khamin ge Samariab ǃnâ hâ Israelǁîna kharo-i di ǃâs tsî sâ-aikharo-i di ǁhôas ǀkha nî orehe.

¹³ Nēsa ǃgâ, î Jakob ommi ǃoagu ǃkhō-am re” tib ge ǃKhūb Elob, Hoaǀgaixa Eloba ra mî.

¹⁴ “Israelǁaesa ta ga ǁîs di ǁoren ǃaroma ǁkhara tsēs ai ta ge Betels di altarde nî hîkākā; ǁîdi ǁnâgu ge ǁhāǁnâhe tsî ǃhūb ai nî ǁnā.

¹⁵ Tita ge saob ǁaeb di oms tsî soreb di oms tsîra nî khôaǁnâ; ǂkhoaǁgûgu ǀkha anisa omdi ge nî hîkākāhe, ǂgui omdi ge nî bē” tib ge ǃKhūba ra mî.