2 Kroniks 10 - Khoekhoegowab 2020

ǀApas ǃhaodi di khâikhâisens

¹ Rehabeammi ge Sexems ǃoa ge ǃgû; hoaraga ǃhaodi Israeli didi ge ǁîba di nî gao-aodīse ǁnāpa ge ǀhao hâ i.

² Nebati ôab Jerobeammi ge gao-aob Salomoba xu ǃhū, tsîb Egipteb ǃnâ hâ hîab ge nē ǂhôasa ǁnâu, o ge oa.

³ ǀApas ǃhaodi ge ǁîba ge ǂgaihā kai tsîn ge ǁîn hoana sī tsî Rehabeamma ǃoa ge mî:

⁴ “Sa îb Salomob ge ǃgom ǃnaoba ge ǁgui-ai da; sats ga sa îb ge ǁgui-ai da ǃgom ǃoabas tsî ǃnaoba supusupubada, o da ge sa ǃoabasabese nî hâǀgara.”

⁵ Ob ge ǁîba ge ǃeream: “ǃNona tsēdi khaoǃgâ du ǁkhawa tita ǃoa hā re.” On ge ge ǃgû.

⁶ Ob ge gao-aob Rehabeamma, ǁnā kaira ǀapemā-aogu, ǁîb îb Salomob ǃoabas ǃnâ ge hâ igu ai ge dî: “Mâti go ra ǂâi, mâti ta nē khoena nî ǃeream?”

⁷ O gu ge ǁîb ǃoa ge mî: “Nē khoenats ga ǂhanuse ǃoaba ǂgao, o ǁîna ǃgâi ǃereamsa mā re, on ge hoaǁae sa ǃoabasabese nî hâ.”

⁸ Xaweb ge ǁîba kaira aogu ge mā bi ǀapesa ǁnāxū tsî ǂkham khoegu, ǁîb ǀkha ge kai tsî ǁîb ǃoabas ǃnâ mâ igu ai sī ǀape-ôa,

⁹ tsî ge mî: “Mâti go sago ra ǂâi, mâti ta nē khoen, sa îb ge ǁgui-ai da ǃgom ǃnaoba supusupubada, ti ra mîna nî ǃeream?”

¹⁰ O gu ge ǁîga ge ǃeream: “Nētits ge ǁnā khoen, ‘Sa îb ge sida ǃnaoba ge ǃgomǃgombada, satsa ǁîba supusupubada’ ti ge mîna nî ǃeream: ‘Ti ǂkharigaǂenneb ge ti îb di kamanab ǃgâ-ai a ǁau.

¹¹ Ti îb ge sado ǃgom ǃnaoba ge ǁgui-ai, tita ge ǁîba ǃaruǀîǀgui nî ǃgomǃgomba du. Ti îb ge sado ǃnabagu ǀkha gere ǂnau, tita ge sado ǀhūgu ǀkha nî ǂnau.’ ”

¹² ǃNona tsēdi khaoǃgân ge gao-aob Jerobeammi tsî ǁaes hoas tsîna, mîb ge hâ i khami Rehabeammi tawa a hā,

¹³ ob ge ǁîna ǁkhōse ge ǃeream. ǁÎb ge kaira aogu di ǀapemāsa ǃharaxū

¹⁴ tsî ǁaesa ǂkham khoegu ge ǀapemā bi khami ge ǃeream: “Ti îb ge sado ǃgom ǃnaoba ge ǁgui-ai, tita ge ǁîba ǃaruǀî nî ǃgomǃgomba du. Ti îb ge sado ǃnabagu ǀkha gere ǂnau, tita ge sado ǀhūgu ǀkha nî ǂnau.”

¹⁵ Gao-aob ge ǁaes ge ǂgan bi khami dī tama ge i, nē ǃkhais ge ǃKhūba xu hâ i xui-ao; ǃKhūb di mîs, Ahiab, Silos dib ǃnâ-ub ge Nebati ôab Jerobeamma ǃoa mî hâ is nî dīǀoaǀoahese.

¹⁶ Tsî khoen ge gao-aob, ǁîna ǃgâ ǂgao tama ǃkhaisa mûo, on ge ǁîb ǃoa ge mî: “Mâ mî-amǃnâ-e da Davidi tawa ūhâ. Xū-i xare-e da kom Isaib ôab tawa ūhâ tamao. Israelǁîdo sadu omdi ǁga oa, îb Davidi ôaba aitsama mûbasen.”

¹⁷ Rehabeammi ge Judab ǃādi ǃnâ ǁan hâ Israelǁîn ǀguin ǂama ge gao-ao kai.

¹⁸ Gao-aob Rehabeammi ge Adorammi, ǁgarisîsenni mûǂamaoba Israelǁîn ǁga ge sî, xawen ge Israelǁîna ǁîba ge ǀuiǁhomǃan. Ob ge gao-aob Rehabeamma ǃhaese torokunis âb ai ǂoa tsî Jerusalems ǁga ge ǃhū.

¹⁹ ǁNātin ge Israelǁîna nētsēs kōse, Davidi di ǂgaeǂguisa xu ge ǁnāǁgôa.