1 Timoteub 2 - Khoekhoegowab 2020

Eloǃoabas ǂnamipe hâ ǁgui-aidi

¹ ǂGurosa ta ge ra ǂgan du, hoa khoen di ǂhâga du nî ǀgoreba tsî Eloba ǂgan ǃkhaisa, îb hoadu ǂamai ǁîb ǀkhaeba ǁhōǂui. Tsî du Eloba mâ khoe-i hoa-i ǃaroma koasa nî māsa.

² Hoa gao-aon tsî ǂgaeǂgui-aon ǃhūbaib dina ǀgoreba re, ǂkhîb tsî ǃnōsasib tsî eloǃaoǃgâxasib tsî ǃgôasib ǃnâ da nî ûise.

³ Nēs a ǃgâi tsîb sada Elob tsî ǃGâiǃōdī-aoba ǁîs ǃnâ ǃgâiǃgâibasensa ū hâ xui-ao,

⁴ mâ khoe-i hoa-i nî ǃgâiǃō kaihe tsî amaba ǂan ǃkhaisab ra ǂgao amaga.

⁵ ǀGui Elob tsî ǁAegumâ-aob ǀguib hâ xui-ao, Elob tsî khoen tsîna nî ǂkhîbagu kaiba. ǁÎb ge Xristub* Jesub,

⁶ hoan ǃaroma xoremarib ase ge māsenna, Elob ǂâibasensa ǂhanu ǁaeb ai ǂhaiǂhais ase.

⁷ ǁNā-amaga ta ge tita amase, ǃGâiǂhôas di aoǁnâ-aose tsî apostelse* ge ǁhûiǂuihe, Jodeǁî tamana* ta ǂgoms tsî amab tsîna nî aoǁnâbase.

⁸ Aoga ta ge ra ǂgan, î gu mâ ǀhaos hoas tawa ǃanu ǃomgu âga ǀgores ǃnâ Elob ǃoa ūkhâi, ǁaixasi-i tsî ǂnoagu-i ose.

⁹ ǁKhāti ta ge tarade ra ǂgan, î di ǀgau ra tsî ǃamku sara-anaba ūhâ, xawe tā ǂâisa ra ǂgaeǁnâ danaǀû-îsa-îsasenǃnôan, ǀgapiǀgau sara-anab tsî ǃhuniǀuri karaga ǁgas tamas ka io perelde ǂnûis ǀkha anisen.

¹⁰ Eloǃoabas ǃnâ îǂhôa taradi di îsasib ge ǃgâidī di ra xūn ǃnâ nî mûhe ǁkhā.

¹¹ Tsî a di tarade hoa ǃgamǃgamsens tsî ǃnōsasib ǃnâ ǁkhāǁkhākaisen.

¹² ǁÎde ta ge ǁkhāǁkhā di nîsa mā-am tama hâ, tamas ka io di aogu ǂamai ǁkhāsiba nî ūhâ ǃkhaisa, a di ǃnō.

¹³ Elob ge Adamma ǂguro kuru tsî ǁnās khaoǃgâ Evasa xui-ao.

¹⁴ Taras ge ǁgâuab* xa ǂgaeǂhapuhe tsî ǁoreba ge ǃaromasa, Adammi ose.

¹⁵ ǁNā-amaga di ge tarade ǀgôahōsa xu nî ǃgâiǃō kaihe, hoaǁae di ga ǂgoms, ǀnammi, ǃanusib tsî ǀgausa ûiba ūhâo.