1 Kroniks 24 - Khoekhoegowab 2020

Pristergu ge māhe sîsengu

¹ Aronni ôananôagub ge nē ǃnandi ǃnâ ge ǀgoraǂgāsa i. Aronni ge haka ǀgôagu, Nadab, Abihub, Eleasari tsî Itamar hâga ge ūhâ i.

² Nadab tsî Abihu hâkha ge ǁîkha îb nî ǁōs aiǃâ ge ǁō, tsîkha ge ǀgôa-e ge ūhâ tama hâ i. ǁNā-amaga kha ge ǁîkha di ǃgâsakha, Eleasari tsî Itamari tsîkha ge prister kai.

³ Gao-aob Davidi ge Aronni ôananôaguba ǃnandi ǃnâ, ǁîgu di ǃoabade ǃoa ge ǀgoraǂgā. Nēs ǃnâb ge ǁîba Eleasari ôab Sadoki tsî Itamari ôab Ahimelexi tsîkha xa gere mâxōǀkhāhe.

⁴ Eleasari di ôananâgub ge disiǃnaniǀa ǃnandi ǃnâ ge ǀgoraǂgāhe tsî Itamari diba ǁkhaisa ǃnandi ǃnâ. Nēs ge ǁnāti ge dīhe Eleasari di ôananôagub ge ǃnāsa danakhoegu, ǀaokhoen diga ūhâ i amaga.

⁵ Tempeli ǂamkhoegu tsî gagasi ǂgaeǂgui-aogu tsîn ge Eleasari tsî Itamar hâkha hoakha di ôananôagub ǃnâ hâ i, xui-aos ge nē ǀgoraǂgāsa, ǀkhūsa ǂnaus ǀkha ge dīhe.

⁶ Eleasari di ôananôagub tsî Itamari dib tsîkha ge ǀkhūsa ǂnausa gere māgu. ǁNās khaoǃgâ gu ge Netaneli ôab Semajab, Leviǁî xoa-aob xa gere xoamâihe. Gao-aob, ǁîb ǂamkhoegu, prister Sadoki, Abiatari ôab Ahimelexi, tsî pristegu tsî Leviǁîgu di ǀaokhoen danakhoegu tsîn mûǁaes ge nēsa gere ī.

^7-18 Nēs ge ǀgamdisihakaǀa ǀaokhoen ǃnandi ge ǀgoraǂgāhe ǀgausa: ǂGurose Jojarib ǀGamǁîse Jedajab ǃNonaǁîse Harimmi Hakaǁîse Seorimmi Koroǁîse Malkiab ǃNaniǁîse Mijaminni Hûǁîse Hakosi ǁKhaisaǁîse Abiab Khoeseǁîse Jesuab Disiǁîse Sekanjab Disiǀguiǀaǁîse Eljasib Disiǀgamǀaǁîse Jakimmi Disiǃnonaǀaǁîse Hupab Disihakaǀaǁîse Jesebeab Disikoroǀaǁîse Bilgab Disiǃnaniǀaǁîse Imeri Disihûǀaǁîse Hesiri Disiǁkhaisaǀaǁîse Hapisesi Disikhoeseǀaǁîse Petajab ǀGamdisiǁîse Esekieli ǀGamdisiǀguiǀaǁîse Jakinni ǀGamdisiǀgamǀaǁîse Gamuli ǀGamdisiǃnonaǀaǁîse Delajab ǀGamdisihakaǀaǁîse Masiab

¹⁹ Nē khoegu ge ǁîgu ge māhe ǃoabade ǃoa ge xoamâihe, Tempeli ǁga ǃgû tsîgu ǁîgu aboxab Aronni ge ǂnûiǂgā ǁguiǂamde, ǃKhūb, Israeli di Elob ge mîmā khami nî dīse.

Leviǁîgu di ǃgôakhâib

²⁰ Nēgu ge ǀaokhoen danagu Levib ǃhaos diga: Jedejab, Sebueli ǃnâ-u Amrammi ôananôagub dib;

²¹ Isiab, Rehabiab ôananôagub dib;

²² Jahati, Selomiti ǃnâ-u Ishari ôananôagub dib;

²³ Jeriab, Amariab, Jahasieli tsî Jekameam hâgu, Hebronni ôaga kaibagu gu ase;

²⁴ Samiri, Mikab ǃnâ-u Usieli ôananôagub dib;

²⁵ Saxariab, Mikab ǃgâsab Isiab ǃnâ-u Usieli ôananôagub dib;

²⁶ Malib, Musib tsî Jasia hâgu Merarib ôananôagub digu.

²⁷ Jasiab ge ǃnona ǀgôagu, Sohammi, Sakuri tsî Ibri hâga ge ūhâ i.

^28-29 Malib ge ǀgam ǀgôakha, Eleasari tsî Kisi tsîkha ge ūhâ i. Eleasari ge aore ǀgôa-e ge ūhâ tama hâ i, xawe Kisi ge ǀgui ǀgôab, Jeramela ge ūhâ i.

³⁰ Musib ge ǃnona ǀgôagu, Malib, Ederi tsî Jerimoti tsîga ge ūhâ i. Nēn ge Leviǁîn di ǀaokhoena.

³¹ Mâ danakhoeb ǁîb ǀaokhoen dib hoab tsî ǁîb di ǃgâsab tsîkha ge ǀgoraǂgās ǃaroma ǀkhūsa ge ǂnau, ǁîgu di ǀaokhoegu, Aronni ôananôaguba xu hâ pristergu ge dī khami. Gao-aob Davidi, Sadoki, Ahimelexi, tsî pristergu tsî Leviǁîgu di ǀaokhoen danakhoegu mûǁaes ge nēsa gere ī.