1 Kroniks 18 - Khoekhoegowab 2020

Davidi di dandi

¹ Nēn khaoǃgâb ge gao-aob Davida Filisteǁîn ǃoagu ǃkham tsî ǁîna ge dan. Tsîb ge Gats tsî ǁîs ǂnamipe ǁgoe ǃārodi tsîna Filisteǁîna xu ge ū.

² ǁÎb ge ǁkhāti Moabǁîn tsîna ge dan tsîn ge ǁîb ǃgāsis ǃnâ hâ tsî ǁgui-aimarina gere matare bi.

³ Sao raseb ge Davida, Sobab di gao-aob Hadad-Eseri ǃoagu Hamats ǀgūse ge ǃkham, Hadad-Eseri ge Eufratǃāb tawa ǁgoe ǀkhariba gere ūbasen ǂgao amaga.

⁴ Davidi ge ǀguiǀoadisi torokunidi, hûǀoadisi hāǃgapi-aogu tsî ǀgamdisiǀoadisi ǀnūtoroǃkhamaogu tsîna ge ūbasen. ǁÎb ge ǁkhāti ǂgui hān tsî ǀguikaidisi torokunidi tsîna ge ǃgaubasen tsîb ge naugu hoaga ge ǃkhaiǃnôa.

⁵ Siriaǁîgu Damaskus digu ge gao-aob Hadad-Esera gu nî huise a hā, xaweb ge Davida ǁîgu ǃoagu ǃkham tsî ǀgamdisiǀgamǀaǀoadisi khoega ge ǃgam.

⁶ Tsîb ge toroǂnubide Damaskus, Siriab dis ǀkharigu ǃnâ ge ūhâ i, tsîn ge Siriaǁîna ǁîb ǃgā kai tsî ǁgui-aimarina gere matare bi. ǃKhūb ge Davida torodīǃgûb gere ǃkhaidi hoadi tawa dansa gere mā.

⁷ Davidi ge ǃhuniǀuri ǁkhaukhōdi Hadad-Eseri toroǃkhamaogu dide ū tsî Jerusalems ǁga ge ǃgû-ū.

⁸ Hadad-Eseri di ǃāra, Tibhats tsî Kuns tsîra xub ge gao-aob Davida kaise ǂgui brons-e ge ū. (Salomob ge ega ǁgamxapas, ǂkhâǃnâgu tsî brons sîsenūxūn Tempeli din tsîna nē brons-i ǀkha ge kuru.)

⁹ Tsî Hamats gao-aob Toib ge Davidi ge hoaraga toroǂnubis Hadad-Eseri disa dan ǃkhaisab ge ǁnâuo,

¹⁰ ǁîb ôab Joramma gao-aob Davidi ǁga ge sî, ǁîba ǂkhaisidî tsîb ǃgâiǃgâba nî ǁkhoreba biga, Hadad-Eserab ge dan ǃkhais ǀkha, Hadad-Eseri ge hoaǁae Toib ǃoagu gere torodī amaga. Jorammi ge Davida ǃhuniǀuri, ǀhaiǀuri tsî brons ǀkhaexūna ge hā-ūba.

¹¹ Gao-aob Davidi ge nēn hoana ǃKhūba ge khaiba, ǃhaodi hîab ge dandi, Edomǁîn, Moabǁîb, Amonǁîn, Filisteǁîn tsî Amalekǁîn tsîde xub ge ū ǀhaiǀurib tsî ǃhuniǀurib tsîn hoan ǀkha.

¹² Serujas ôab Abisaib ge Edomǁîna ǂŌxaǃgoaǃnāb ǃnâ dan tsî disiǁkhaisaǀaǀoadisi khoega ge ǃgam.

¹³ ǁÎb ge toroǂnubide hoaraga Edommi ǃnâ ge ūhâ i tsîn ge Edomǁîna ge gao-aob Davidi di ǃgā kai. ǃKhūb ge Davida ǃgûǂoab ka ǃkhai-i hoa-i ai dansa gere mā.

¹⁴ Davidi ge hoaraga Israeli ǂama ge gao-ao i, tsî ǁaes âba ǂhanub tsî ǂhanu-aisib ǀkha gere ǂgaeǂgui.

¹⁵ Abisaib di ǃgâsab Joab ge ge toroǂnubis ǂgaeǂgui-ao i; Ahiludi ôab Josafati ge ge gao-aob ra ǂanǂan xūn di ǂhôaǂui-ao i;

¹⁶ Ahitub ôab Sadoki tsî Abiatari ôab Ahimelexi tsîkha ge ge prister i, tsî Sausab ge ge xoa-ao i.

¹⁷ Jojadab ôab Benajab ge ge gao-aob ǃûi-aogu di mûǂamao i tsî Davidi ôagu ge ge prister i.