1 Johaneb 5 - Khoekhoegowab 2020

ǃHūbaib ǂama hâ dans

¹ Jesub a Xristu* ǃkhaisa ra ǂgom-i hoa-i ge Eloba xu ǃnae hâ, tsî mâ-i hoa-i hîa ǁGûba xu ǃnae hâ-e ǀnam-i ge ǁkhāti ǁîba xu ǃnae hâ.

² Nēs ǀkha da ǂans ge Elob ôana da a ǀnamsa, Eloba ǀnam tsî da ga ǁîb mîmāde ǁnâuǀnamo.

³ Nēb a Elob di ǀnam, ǁîb mîmāde da nî ǁnâuǀnamsa tsî di ge ǁîde ǃgom tama hâ.

⁴ Eloba xu ǃnae hân hoan ra ǃhūbaiba dan xui-ao, tsîs ge sada di ǂgomsa a ǁnā dan, ǃhūbaiba ra dansa.

⁵ Tari-e kha ǁnâi ǁnā-i hîa ǃhūbaiba ra dan-e, ǁnā-i Jesub a Elob Ôa ǃkhaisa ra ǂgom tama-i ka io?

Jesub Xristub xa hâ ǃkhō-ams

⁶ Jesub Xristub ge a ǁnā, ǁgam-i tsî ǀaob ǃnâ-u ge hāba, ǁgam-i ǃnâ-u ǀgui tama, xawe ǁgam-i tsî ǀaob ǃnâ-u. Tsî Gagab ge ǁnāb, nēn a ama ǃkhais di ǃkhō-amsa ra māba, ǁîb a ama xui-ao.

⁷ ǃNonan, Jesub xa ra ǃkhō-amn hâ xui-ao:

⁸ Gagab, ǁgam-i tsî ǀaob tsîna, tsîs ge ǁîn di ǃkhō-amsa ra ǀhûǀgui.

⁹ Khoen di ǃkhō-amsa da ga ǃkhōǃoao, Elob di ǃkhō-ams ge ǁnās ǃgâ-ai a kai, nēs a Elob di ǃkhō-am, ǁîb Ôab xab gere ǃkhō-amsa xui-ao.

¹⁰ ǁNā-i hîa Elob Ôab* ǃnâ ra ǂgom-i ge ǁî-i ǃnâ ama ǃkhō-amsa ūhâ; xawe Elob ǃnâ ǂgom tama-i ge ǁîba ra ǂhumi-aodī, Elob ge ǁîb Ôab xa mā ǃkhō-amsa i ǂgom tama xui-ao.

¹¹ Nēs ge a ǃkhō-am: Elob ge sada ǀamo ûiba ra mā tsî nē ûib ge ǁîb Ôab ǃnâ hâ.

¹² ǁNā-i ǀGôaba ūhâ-i ge ûiba ūhâ, tsî Elob Ôaba* ūhâ tama-i ge ûiba ūhâ tama hâ.

ǀAmo ûib

¹³ Sadu hîa Elob Ôab di ǀons ǃnâ ǂgom hâdo ta ge nē xūna ra xoaba, î du ǀamo ûiba du ūhâ ǃkhaisa ǂan.

¹⁴ Nēs ge ǂgomǃgâs ǁîb ǃnâ da ūhâsa, mâ xū-i hîa da ga ǁîb ǂâis ǃoa ǂgan-i hoa-eb nî ǁnâu-am da ǃkhaisa.

¹⁵ Tsî da ga ǂan ǁîb ra ǁnâu-am da ǃkhaisa, o da ge a ǂan tare-i ǀgui-i ka, xawe da ǁîb ai da ga ǂgan-i hoa-e nî ǃkhōǃoa ǃkhaisa.

¹⁶ Khoe-i ga ǃgâsa-i hîa ǁōba ǃaroma tama ǁore-e ra dī-e mûo, o i ge ǁî-e nî ǀgoreba, îb Eloba ǁî-i hîa ǁōba ǃaroma tama ǁore-e ra dī-e ûiba mā. ǁKhātib ge ǁōba ǃaroma hâ ǁoreb tsîna hâ, o ta ge ǁîba ǀgoreba ti mî tama hâ.

¹⁷ Mâ ǂhanuoǃnâsib hoab ge a ǁore tsîb ge ǁōba anu tama ǁoreb tsîna hâ.

¹⁸ Sada ge a ǂan Eloba xu ǃnae hâ-i ǁorehâhâ tama ǃkhaisa, xaweb ge Eloba ǁî-e ra sâu tsîb ge ǂKhababa ǁî-e tsâǀkhā tama hâ.

¹⁹ Sada ge a ǂan Elob dida a ǃkhaisa tsîb hoaraga ǃhūbaiba ǁnāb hîa a ǂKhabab ǃnâ hâsa.

²⁰ Tsî da ge ǁkhāti a ǂan Elob Ôab ge hā tsî amaba da nî ǂan ǃkhais di ǁnâuǃāba mā da ǃkhais tsî sada ǁnāb hîa a amab tsî ǁkhāti ǁîb Ôab, Jesub Xristub hîa a amab ǃnâ hâ ǃkhaisa. ǁÎb ge a ama Elo tsî ǀamo ûi.

²¹ Ti ǀgôado, ǁgôa-eloga xu ǃûisen.