Zefania 2 - ÎVUKU RÎA ÛVORO MWARO

Andû gwîtwa mavere

¹ Ûnganani vamwe na mûgomane, mue rûrîrî rûtarî nthoni,

² mbere ya mûgûrûkue ta macaki makîgûrûkua nî rûkûngi, mbere ya marakara ma Ngai-Mûnene maûka kûrî mue, mbere ya mûkinyîrwa nî mang'ûrîka ma Ngai-Mûnene.

³ Cokererani Ngai-Mûnene mue muonthe arîa avoreri, mue arîa mwîkaga ûrîa kwagîrîrîte, cariani ûthingu cariani wînyivia. Kwavoteka ûkethîrwa ûtarî vamwe na andû arîa makaverithua, mûthenya ûrîa Ngai-Mûnene akonania marakara make.

Gûcûkangua kwa mavûrûri marîa marî vakuvî

⁴ Gûtirî mûndû ûgaatigwa îtûûrarî rîa Gaza. Ashikeloni nîrîgaatigwa rîrî rîtheri, Andû a Ashidodi nîmakaarutwa kuo mûthenya, na andû a Ekironi nîmakengatwa îtûûrarî rîao.

⁵ Mue Afilisiti, kaî mûrî na thîna-î, mue mûtûûraga Kirete. Ngai-Mûnene nîamûtuîrîrîte ciira mue Akanaani na Afilisiti. Nîakaamûcûkangia, na gûtirî wanarî ûmwe wa cienyu ûgatigwa.

⁶ Mue ndeererî cia îria nîmûgaatuwa kûndû gwa kûrîthua ng'ombe na ng'ondu, mûgatuîka ciomba cia arîthi na ciaga cia ng'ondu.

⁷ Andû a Juda arîa magaatigara nîo mageyocera vûrûri wenyu. Nîo makaarîthia mbûri ciao kuo na mamamage nyombarî cia Ashikeloni. Ngai-Mûnene nîakethîrwa arî Ngai wao, nîakethîrwa nao na amacokerie maûndû mao maro.

⁸ Ngai-Mûnene arauga atîrî, “Nîmbîguîte andû a Moabu na a Amoni makîruma andû akwa, na makîmaruma atî nîmagwîocera vûrûri wao.

⁹ Kwoguo, wata ûrîa nie ndûraga mwoyo nie Ngai-Mûnene mwene vinya wonthe, Ngai wa Isiraeli, nînîvîta atî Moabu na Amoni makethîrwa mekariî ta Sodomu na Gomora. Vûrûri wao ûkethîrwa wîcûrîte marima ma cumbî, na mîtî ya mîgua na ûgaatûûra ûrî werû tene na tene. Andû akwa arîa magaatigara nîmagaatava indo ciao, andû a vûrûri wakwa megwatîre vûrûri wao.”

¹⁰ Ûguo nîguo makaaverithua nîûndû wa kwîyenda kwao nîûndû wa kûnana na kûruma andû a Ngai-Mûnene mwene vinya wonthe.

¹¹ Ngai-Mûnene akethîrwa arî wa kûmakania kûrî o, agaatua ngai cia nthî ta îtarî kîndû. Mavûrûri monthe ma nthî nîmakaamûtîîa, wa vûrûri ûrî vandû va guo.

¹² Wana mue andû a Kushi nîmûkaaûragwa nî rûviû rwake.

¹³ Ngai-Mûnene nîagaatûmîra vinya wake gûcûkangia Asîria. Nîagaatûma îtûûra rîa Nineve rîtuîke rîa gûtiganîrua, îtûûra rîtarî manjî na rîkariî ta werû.

¹⁴ Nyamû cionthe cia kûrîthua nîikaamama kuo. Nyamû cionthe cia kîthaka nîikaamama kûrîa gûcûkangie. Ndundu ikaagambaga irî ndiricarî na ndiiû igambe irî matîrirî, nîûndû nyomba ciao cia mîtarakwe nîigaatiganîrua.

¹⁵ Ûguo nîguo gûgekîka kûrî îtûûra rînene rîrîa rîîtîaga nîûndû wa vinya warîo na rîgeciria atî nîrîgitîre. Îtûûra rîu rîciragia atî nîrîo rînene mûno nthî îno. Rîgaatuîka îganjo, varîa nyamû cia kîthaka ikaavurûkaga! Mûndû wa wonthe ûkaavîtûkîrîra vo nîakaavavûka na etigîre.