Zefania 1 - ÎVUKU RÎA ÛVORO MWARO

¹ Îno nî ndûmîrîri ya Ngai-Mûnene îrîa yakinyire Zefania mwana wa Kushi, mwana wa Gedalia, mwana wa Amaria, mwana wa Hezekia, vîndî îrîa Josia mûvîcî wa Amoni, aarî mûthamaki wa Juda.

Mûthenya wa îtuîro wa Ngai-Mûnene

² Ngai-Mûnene arauga atîrî, “Nîngaathiria ciûmbe cionthe cia nthî:

³ Andû, nyamû, iconi cia rîerarî na nthamaki cia îriarî; cionthe nîngaicûkangia. Andû arîa aganu nîngamacûkangia viû; andû onthe nîngamathiria gûkû nthî.

⁴ Nîngaverithia andû onthe a Juda na arîa onthe matûûraga Jerusalemu; nîngacûkangia matigari monthe ma Baali kuuma gûkû nthî, marîtwa ma athînjîri-Ngai arîa matungatagîra ngai cia mîvuanano mariganîre.

⁵ Nîngaacûkangia arîa onthe magoocaga marî îgûrû rîa nyomba, makîgooca ciûmbe cia îgûrû. Nîngaverithia arîa mangoocaga makîîvîtaga na rîîtwa rîakwa na makevîta na rîîtwa rîa ngai îrîa îtagwa Moleku.

⁶ Nîngacûkangia arîa onthe mandiganîrîtie nie Ngai-Mûnene, onthe arîa mandiganîrie na matambûragia ûtaaro.”

⁷ Kirani mbere ya Ngai-Mûnene, nîûndû mûthenya ya Ngai-Mûnene ûrî vakuvî. Ngai-Mûnene nîavarîrîtie kîgongoona, na akamûra ageni ake a gîtîîo.

⁸ Ngai-Mûnene arauga atîrî, “Mûthenya wa îgongoona rîakwa, nîngaverithia anene na ciana cia athamaki, na arîa onthe marûmagîrîra mîtugo ya ûgeni.

⁹ Mûthenya ûcio ngamaverithia onthe, arîa onthe magoocaga ngai cia mîvuanano; na arîa onthe mecûragia nyomba ya mwathi wao, na indo irîa macunanîte na vinya na kwîa.”

¹⁰ Ngai-Mûnene arauga atîrî, “Kîrîro nîgîkeguîka kuuma Kîvingorî Kîam Nthamaki, kîrîro kuuma Gîcagi gîa Kaîrî, na kîrîro kînene kuuma irîmarî.

¹¹ Rîrani mue arîa mûtûûraga Moritari, nîûndû avûri mbiacara onthe nîaûrage, arîa onthe mathimaga sîlûva nîathirie.

¹² Vîndî îo nîngoca taa na nthiî Jerusalemu ngîcaragia; Nîngaverithia andû arîa meganaga na makeîraga na ngoro atî, ‘Ngai-Mûnene ndarî ûndû ekaga: mwaro kana mûcûku.’

¹³ Nîmagacunwa ûtonga wao na indo ciao cia nyomba. Matigatûûra nyombarî irîa maratuma, kana manyue ndivei ya mîtî îrîa maravanda rîu.”

¹⁴ Mûthenya mûnene wa Ngai-Mûnene nîûkuvîvîrie, ûrî vakuvî na ûraûka narua mûno. Mûgambo wa mûthenya wa Ngai-Mûnene nî mûrûrû mûno, athigari arîa aûmîrîru mûno nîmakaarîra na mûgambo mûnene.

¹⁵ Ûcio ûkethîrwa wî mûthenya wa marakara, nî mûthenya wa mathîna na marûrû, nî mûthenya wa nduma na kîeva, nî mûthenya wa gûcûkangua, nî mûthenya wa matu na nduma nene,

¹⁶ mûthenya ûcio nî wa tûrumbeta na mbaara, kûrî matûûra marîa marî nthingo nene na nthingo ndaca.

¹⁷ Ngai-Mûnene arauga atîrî, “Nîngareta mûthiro kûrî andû, nîguo mathiîcage ta atumumu nthakame yao îgetûrûrwa ta rûkûngû, nacio ciimba ciao ciîtûrûrwe ta mai.

¹⁸ Mûthenya ûcio wa marakara ma Ngai-Mûnene sîlûva ciao kana thaavu ciao itikaavota kûmavonokia. Nîûndû wa mwaki wa wîru wake, nthî yonthe nîîkavîa. Nîakaathiria na îvenya arîa onthe matûûraga nthî.”