Zakaria 9 - ÎVUKU RÎA ÛVORO MWARO

Nthû cia Isiraeli gûtuîrwa ciira

¹ Îno nî ndûmîrîri ndito ya Ngai-Mûnene îgiî vûrûri wa Hadiraki. Ngai-Mûnene nîatuîte kûverithia Hadiraki wana îtûûra rîa Damesiki. Andû onthe nî a Ngai-Mûnene, wana mîvîrîga yonthe ya Isiraeli.

² Hamathi wana rîo, rîrîa rîvakanîte na Hadiraki, Turo na Sidoni, wana ethîrwa marî aûgî nî ake.

³ Turo nîîthiûrûrûkîrîtie na rûthingo rwa vinya mûno, îkeyûnganîria sîlûva nyîngî ta rûkûngû, na thaavu nyîngî ta ndaka njîrarî.

⁴ Nwatî Ngai-Mûnene nî agaacuna îtûûra rîa Turo indo ciarîo, na ûtonga wakuo awikie îriarî, na rîvîvue na mwaki rîthire.

⁵ Îtûûra rîa Ashikeloni nîrîkoona Turo îkîgwa na rîîtigîre; Îtûûra rîa Gaza narîo rîona ûguo nîrîkaagwatwa nî ûrûrû mwîngî, wana Ekironi nîûndû mwîvoko warîo ûkethîrwa wathira. Mûthamaki wa Gaza nîakaaûragwa, nakuo Ashikeloni kûthamwe viû.

⁶ Ageni nî o magaatûûra Ashidodi, na nîngathiria mwîtîîo wa andû a Filisiti.

⁷ Nîngamagiria kûrîa nyama irî na nthakame, kana marîa indo irîa irî mûgiro. Andû arîa magaatigara magaatuîka andû a Ngai, na matuîke ta mbarî îmwe ya mûvîrîga wa Juda. Andû a Ekironi nîmagaatuîka ta andû a Jebusi.

⁸ Nîngaagitîra hekarû yakwa ndîkaatharîkîrwe nî nthû; Gûtirî mûndû ûgaacoka kûvinyîrîria andû akwa rîngî, nîûndû rîu nînîreyonera na metho makwa nie mwene.

Gûka kwa mûthamaki wa Zayuni

⁹ Mue andû a Zayuni kenani mûno; Mue andû a Jerusalemu ugîrîriani na vinya. Taroriani, mûthamaki wenyu nîaûkîte kûrî mue, aûkîte akenete na arî na ûvootani. Nî mwînyivia na akuuîtwe nî mvunda, akuuîtwe nî njaû ya mvunda.

¹⁰ Ngai mûnene nîakaathengutia ikaari cia mbaara ciume Efiraimu, na athengutie mbarathi cia mbaara ciume Jerusalemu, naguo ûta ûrîa ûvûthagîrwa vîndî ya mbaara nîûkaaunangwa. Mûthamaki nîagaatûma ndûrîrî igîe na thayû, wathani wake ûkaauma îriarî kûthiî nginya îriarî, na kuuma rûnjîrî nginya mîthiia ya nthî.

Andû a Ngai nîmaacokanîrîrue

¹¹ Ngai-Mûnene augîte atîrî, “Nîûndû wa kîrîkanîro gîakwa namue, kîrîa gîakindîrue na nthakame ya magongoona, nîngaarekereria andû enyu arîa ove, nîmarute kûu marî îrimarî rîtarî manjî.

¹² Mue andû arîa ove na mûrî na kîîrîgîrîro, cokani kwenyu kûrîa kûgitîre. Nîûndû wa mathîna marîa mwanona, nîngaamûrathima maita meengî.

¹³ Nîndûmîra Juda ta ûta wakwa, Efiraimu nîmûtuîte ta mîguî yakwa. Mue andû a Zayuni, anake enyu nîngaamatua ta rûviû rwakwa rwa njûra, makethîrwa mekariî ta rûviû rwa mbaara, rwa kûtharîkîra andû a Ngiriki.”

¹⁴ Ngai-Mûnene nîakeyonithania arî îgûrû rîa andû ake, mîguî yake îthiîcaga ta rûveni; Mwathani Ngai nîakaavuva karumbeta, na athiî arî rûkûngirî rwa mwena wa îveti.

¹⁵ Ngai-Mûnene mwene vinya wonthe nîakaagitîra andû ake, na nîmakaavoota nthû ciao na mathiga ma ikûtha. Makaaugagîrîria marî mbaararî ta mîrîu ya ndivei, magîtûrûra nthakame ya nthû ciao, ta îcûrîte mbakûrirî, îkanyûrûrûka mîthiiarî ya metha ya kîgongoona.

¹⁶ Mûthenya ûcio Ngai-Mûnene, Ngai wao nîakaamavonokia, nîûndû nî ndîthia ya andû ake. Andû ake magaakengaga marî vûrûrirî wake, ta ûrîa îthiga rîa goro rîkengaga rîrî ngoviarî ya mûthamaki.

¹⁷ Kaî makethîrwa marî aro na athaka-î! Andû ethî nîmakaagîcaga na vinya nîûndû wa ngano na ndivei.