Zakaria 8 - ÎVUKU RÎA ÛVORO MWARO

Jerusalemu nîyarathimirwe

¹ Ndûmîrîri kuuma kûrî Ngai-Mûnene mwene vinya wonthe nîyanginyîre ngîrwa atîrî,

² “Mbîthîrîtwe nîrî na wîru wa îtûûra rîa Zayuni nîûndû wa ûrîa nîrîendete, wendo mûnene mûno warîo ûrîa ûtûmîte mbakanwe nî marakara nîûndû wa mavûrûri marîa mengî.

³ Nîngaacoka Zayuni nîguo ngatûûre Jerusalemu, nayo nîgaacoka gwîtagwa îtûûra rîvokeku, na kîrîma Kîammûre Kîam Ngai-Mûnene mwene vinya wonthe.

⁴ Athuuri na aka arîa mathiîcaga na mîragi ya gwîtirithia nî gûkûra, magaatindaga mekarîte nthî njîrarî cia Jerusalemu.

⁵ Nacio njîrarî cia îtûûra rîu nîgûgecûra anake na erîtu makîthaka kuo.

⁶ “Ûndû ûyû nwa woneke ûrî mûrito ta ûtangîvoteka methorî ma andû arîa matigarîte, nwatî kûrî nie Ngai-Mûnene mwene vinya wonthe tî ûndû mûnene.

⁷ Nîngaavonokia andû akwa maume mavûrûrirî marîa marî mwena wa îrathîro na marîa marî mwena wa îthûîro,

⁸ na nîmacokie matûûrage Jerusalemu marî na thayû. Nîmagaatuîka andû akwa nanie nduîke Ngai wao nîmathage na njîra ya ma na ya wîvokeku.”

⁹ Ngai-Mûnene augîte atîrî, “Mue arîa rîu mûregua ndûmîrîri îrîa yarirue nî arathi arîa maarî vo vîndî îrîa mûcingi wenjagwa wa gûtuma rîngî hekarû ya Ngai-Mûnene mwene vinya wonthe, îîyûmîrîrieni nîguo hekarû îtumwe.

¹⁰ Nîûndû mbere ya kavinda kau gûtirî mûndû ûngîavotire kwandîka mûndû wîra kana gûkombora nyamû cia kûruta wîra. Gûtirî mûndû wethagîrwa arî mûgitîre kuuma kûrî nthû yake akiumagara kana agîcoka. Nînatûmîte andû maûkanîrîre wa mûndû na mûndû ûrîa wîngî.

¹¹ Nwatî rîu ndigwîka andû a rûrîrî arîa matigarîte ta ûrîa nekire tene.

¹² Nîmakaavanda marî na thayû. Mîthavibu yao nîîgaciara thavibu, mîgûnda yao nîîkaagîa na maketha meengî na nîgûkethagîrwa na mbura ya kwîgana. Andû akwa arîa matigarîte nîngaamava irathimo ino cionthe.

¹³ Mue andû a Juda na a Isiraeli, kavinda kavîtûku andû a ndûrîrî methîrîtwe makîmwona mûrî andû agwate nî kîrumi. Nîngaamûvonokia na nîmûgaatuîka kîrathimo. Kwoguo îyûmîrîrieni na mûtigetigîre.”

¹⁴ Ngai-Mûnene mwene vinya wonthe augîte atîrî, “Rîrîa methe menyu maatûmire ndakare nînatuire nîmathirie na ndiameguîra ntha.

¹⁵ Rîu nînduîte mavinda mama gwîka Jerusalemu maûndû maro wa vamwe na nyomba ya Juda. Kwoguo mûtigetigîre.

¹⁶ Maûndû marîa mwagîrîrwe nîgwîka nî kwaranagîria ûûma mûndû na mûndû ûrîa wîngî, gûtua ciira na kîvooto kîrîa kîngîrete thayû.

¹⁷ Ngororî cienyu mûtikavange mîvango mîcûku ya gûcûkia mûndû ûrîa wîngî, kana mûkenue nî mwîvîtwa wa maveeni nîûndû nînthûrîte maûndû mau monthe.”

¹⁸ Ndûmîrîri ya Ngai-Mûnene mwene vinya wonthe nîyakinyîre Zakaria rîngî na akîrwa atîrî,

¹⁹ “Kwînyerekia mweri wa kana, mweri wa gatano, mweri wa mûgwanja, wa mweri wa îkûmi igaatuîka irugo cia gîkeno na thayû kûrî andû a Juda. Kwoguo rûmagîrîrani ûvoro wa ma na wa thayû.”

²⁰ Ngai-Mûnene mwene vinya wonthe augîte atîrî, “Andû kuuma mavûrûrirî na matûûrarî meengî nîmagaaûka Jerusalemu.

²¹ Andû a îtûûra rîmwe nîmakaathiî îtûûrarî rîngî na nîmakaauga atî, ‘Tigani tûthiî Jerusalemu nîguo tûkagooce Ngai-Mûnene mwene vinya wonthe na tûmûvoe atûrathime. Tûthiîcanie vamwe.’

²² Andû eengî na mavûrûri marî na vinya nîmagaaûka Jerusalemu kûngooca nie Ngai-Mûnene mwene vinya wonthe na kûvoya irathimo.

²³ Vîndî îo, andû îkûmi kuuma mavûrûrirî na mîarîrie yonthe nîmagetonyereria varî Mûyahudi ûmwe na mamwîre atîrî, ‘Tiga tûthiîcanie nawe nîûndû nîtwîguîte atî Ngai arî vamwe namue.’ ”