Zakaria 7 - ÎVUKU RÎA ÛVORO MWARO

Ûvoro wîgiî kwînyerekia

¹ Mûthenya wa kana mwerirî wa kenda, (mweri ûcio nîguo wîtagwa na Kîhibirania Kisilevu), mwaka wa kana Dario atuîka mûthamaki, Zakaria nîwakinyîrîrwe nî ndûmîrîri ya Ngai-Mûnene.

² Vîndî îo andû a Betheli nîmaatûmîte Sharezeri na Rege-mumeleki na andû ao mathiî makathaithe Ngai-Mûnene ameguîre ntha,

³ na maûrie athînjîri-Ngai arîa matungataga hekarûrî ya Ngai-Mûnene mwene vinya wonthe na arathi atîrî, “Nîwaro tûthiî na mbere gûcakaya na kwînyerekia mwerirî ûyû wa gatano ta ûrîa tûtwîre twîkaga mîaka mîîngî?”

⁴ Ngai-Mûnene mwene vinya wonthe nîwacokire akînginyîria ndûmîrîri îno,

⁵ na akîmbîra atîrî, “Ûria andû onthe a Isiraeli na athînjîri-Ngai kana rîrîa menyerekagia na magacakaya mweri wa gatano na wa mûgwanja îvinda rîa mîaka mîrongo mûgwanja îthirîte, mekaga ûguo nîûndû wakwa?

⁶ Na rîrîa makûrîa na makanyua, kinthî matirîcaga na makanyua nîûndû wao o ene?”

⁷ Ndûmîrîri îo nîyo Ngai-Mûnene aamûkinyîîrie na njîra ya arathi arîa maarî kuo mbere. Vîndî îo îtûûra rîa Jerusalemu nîrîagaacîrîte na rîgatûûrwa nî andû eengî. Wanamo matûûra marîa maarigicîrîtie Jerusalemu, vûrûri wa mwena wa îveti, na vûrûri ûrîa ûrî nthî ya irîma nîgwatûûraga andû eengî.

Andû maavirirwe îthamîriorî marega kwathîka

⁸ Ngai-Mûnene nîwakinyîrie Zakaria ndûmîrîri na akîmwîra atîrî,

⁹ “Tucanagîrani ciira wa kîvooto, îgucanagîrani ntha, na mûtuganage mûndû na mûndû ûrîa wîngî.

¹⁰ Mûtikaavinyîrîrie aka a ndigwa, ciana cia ndigwa, ageni arîa matûûraga kwenyu, na andû arîa athîni. Mûndû wana ûrîkû ndakavange ûndû mûcûku ûngîcûkia mûndû ûrîa wîngî.

¹¹ “Nwatî nîmaaregire kûnthikîrîria na makîûmia ciongo ciao, na makîvinga matû mao nîguo matikegue.

¹² Nîmaaûmirie ngoro ciao ta mathiga, kwoguo matingîathîkîra watho kana ndûmîrîri îrîa nie Ngai-Mûnene nwene vinya wonthe naamatûmîre na njîra ya arathi arîa maarî kuo mbere. Kwoguo nie Ngai-Mûnene mwene vinya wonthe nînaarakarire nîo.

¹³ Nîmaaregire kûnthikîrîria rîrîa naamaragîria, kwoguo wananie mamvoya ndiamacokeria.

¹⁴ Nînaamanyaganirie na njîra ta ya rûkûngi rûnene mavûrûrirî mataicî na magîtûûra kuo marî ageni. Vûrûri ûrîa maatigire watuîkire werû, na gûtirî mûndû wathiîcaga kana akauma kuo. Vûrûri ûcio mwaro gûtirî mûndû watûûrire kuo.”