Zakaria 5 - ÎVUKU RÎA ÛVORO MWARO

Kîoneki kîa îvuku rîa gîkûnjo rîgûrûkîte

¹ Nînaacokire ngîroria rîngî, na ngîona îvuku rîa gîkûnjo rîrî rîerarî rîgûrûkîte!

² Mûraika nîwambûririe atîrî, “Nîndûî ûrona?” Nanie nînaamûcokerie atîrî, “Nîrona îvuku rîa gîkûnjo rîrî rîerarî rîgûrûkîte. Ûraca warîo nî wa mita kenda na wariî warîo nî wa mita inya na nuthu.”

³ Nîwacokire akîmbîra atîrî, “Îvukuurî rîu rîa gîkûnjo nîkwandîke kîrumi kîrîa gîkaanyita vûrûri wonthe. Îvuku rîu rîa gîkûnjo, mwena ûmwe riugîte mûndû wa wonthe ûkaîa nîakaaûragwa. Naguo mwena ûcio wîngî riugîte mûndû wonthe ûkevîta na njîra ya maveeni nîakaaûragwa.

⁴ Ngai-Mûnene mwene vinya wonthe augîte ke mwene nîke ûgaatûma kîrumi kîu kîthiî na gîtonye nyomba ya mûndû wa wonthe mwîi na gîtonye nyomba ya mûndû wa wonthe wîvîtaga na njîra ya maveeni akîgwetaga rîîtwa rîa Ngai-Mûnene. Nîgîgekara nyombarî yake na kîmîcûkangie, kîthirie mbaû wana mathiga.”

Kîoneki kîa mûndûmûka arî gîkavurî

⁵ Mûraika ûrîa twaragia nake nîwaûkire na akîmbîra atîrî, “Taroria wone kîndû kîîrîa gîûkîte.”

⁶ Na nînaamûririe atîrî, “Nîndûî?” Nake nîwanjokerie atîrî, “Nî gîkavu, na kîronania mevia ma vûrûrirî wonthe.”

⁷ Gîkavu kîu Kîamrî na gîkunîko gîa cuuma îrîa îrûthaga rithathi. Na rîrîa gîkunîko kîu gîaûkîrîrue, nînoonire mûndûmûka ekarîte nthî kûu gîkavurî!

⁸ Mûraika ûcio nîwambîrire atîrî, “Mûndûmûka ûyû aronania waganu.” Nîwacokire agîtindîka mûndûmûka ûcio na kûu gîkavurî ndaarî na agîgîkunîka na gîkunîko gîa cuuma îrîa îrûthaga rithathi.

⁹ Nînacokire ngîroria ngîona aka aîrî maûkîte na varîa naarî magûrûkîte na mathagu mekariî ta ma mwang'au. Aka acio nîmoocire gîkavu kîu na makîgûrûka nakîo rîerarî.

¹⁰ Nînacokire ngîûria mûraika ûcio wambarîrîtie atîrî, “Maavira gîkavu kîu kû?”

¹¹ Nake nîwanjokerie atîrî, “Makîvira vûrûri wa Shinari nîguo magagîtumîre nyomba kuo, na yarîka nîmagaakiga kûu ndarî.”