Zakaria 4 - ÎVUKU RÎA ÛVORO MWARO

Kîoneki kîa vandû va kwigîrîrwa taa

¹ Mûraika ûrîa waragia nanie nîwaûkire rîngî na akînamûkia ta ûrîa mûndû aramûkagua arî toro.

² Nake nîwambûririe atîrî, “Nîndûî ûrona?” Nanie nînaamûcokerie atîrî, “Nînîrona vandû va kwigîrîra taa varûthîtwe na thaavu na îgûrû rîavo vaigîtwe mbakûri. Îgûrû rîa vandû vau vaarî na taa mûgwanja na wa taa îrî na vandû va gwîkîra rûtambi.

³ Vakuvî na vandû vau va kwigîrîrwa taa vaarî na mîtî îîrî ya mîtamaiyû. Mûtî ûmwe ûrî mwena wa ûrîo wa mbakûri naguo ûcio wîngî ûrî mwena wa ûmotho wa mbakûri.”

⁴ Nînaacokire ngîûria mûraika ûcio wambaragîria atîrî, “Mwathi wakwa, indo ino ironania ndûî?”

⁵ Nake nîwambûririe atîrî, “Anga ndwîcî?” Nanie nînaamûcokerie atîrî, “Mwathi wakwa, nie ndicî.”

Kîîranîro kîa Ngai-Mûnene kûrî Zerubabeli

⁶ Nake mûraika ûcio nîwambîrire nginyîrie Zerubabeli ndûmîrîri îno yumîte kûrî Ngai-Mûnene mwene vinya wonthe nîmwîre atîrî, “Ndûkaavootana nîûndû wa vinya kana ûvoti waku, nwatî ûkaavotithua nî Roho wakwa.”

⁷ Gûtirî kîndû gîgaakûrigîrîria wana kîethîrwa kîrî kînene ta kîrîma, nwatî nîgîkaavaraganua. We nîûgatuma hekarû rîngî, na ûkîmîrîkia andû nîmakaugîrîria atîrî, “Nî mbaro! Nî mbaro!”

⁸ Ngai-Mûnene nîwambarîrie atîrî,

⁹ “Zerubabeli nîke ûtumîte mûcingi wa nyomba îno, na nîke ûkaamîrîkia. Namue nîmûkaamenya atî Ngai-Mûnene mwene vinya wonthe nîke ûndûmîte kûrî mue.

¹⁰ Mûtikaanyarare ûndû ûrîa wambagîrîria na njîra nini, nîûndû Ngai-Mûnene akenagua nî wîra rîrîa ûrathiî na mbere. Andû nîmagaakena mona Zerubabeli akîmîtuma. “Taa icio mûgwanja nî metho ma Ngai-Mûnene marîa aroragia nthî yonthe namo.”

¹¹ Nînacokire ngîûria mûraika ûcio atîrî, “Mîtî îno ya mîtamaiyû ûmwe ûrî mwena wa ûrîo na wîngî mwena wa ûmotho wa vandû va kwigîrîrwa taa nîyakwonania ndûî?”

¹² Nînaamûririe rita rîa kaîrî atîrî, “Mvûa iirîa igîrî cia mîtî ya mîtamaiyû irî vakuvî na mîverethi îîrî ya thaavu ya gwîtûrûra maguta ironania ndûî?”

¹³ Nake nîwambûririe atîrî, “Anga ndwîcî?” Nînaamûcokerie atîrî, “Mwathi wakwa, nie ndicî.”

¹⁴ Nîwacokire akîmbîra atîrî, “Aya nî andû aîrî arîa athuure na magetîrîrua maguta nîguo matungatagîre Mwathani wa nthî yonthe.”